Read Kaqchikel Jos 22 Bible Online

Jos 22 - Kaqchikel bible

Jos 22

¹K'ari' ri Josué xeroyoj ri tzobaj richin ri Rubén, ri Gad y ri nik'aj chire ri tzobaj richin ri Manasés,

²y xubij chike: Rix kan itaqen k'a pe ronojel ri xubij kan chiwe ri Moisés ri rusamajel ri Jehová, y chuqa' kan ibanon k'a ronojel ri xinbij yin chiwe.

³K'a re wakami man e imalin ta kan ri iwach'alal stape' k'iy yan q'ij ibanon-pe, roma kan itaqen-pe ri nubij ri pixa' ri ruya'on ri Jehová ri qa-Dios chiwe.

⁴Roma rija' wakami xuya' yan uxlanenri'il chiqakojol achi'el ri rusujun chiqe. Wakami k'a kixtzolej pa taq iwachoch chupan ri iruwach'ulew ri ruya'on kan chiwe ri Moisés ri rusamajel ri Jehová. Kixtzolej k'a pan iruwach'ulew ri k'o-apo juk'an chire ri raqen-ya' Jordán.

⁵Xaxe k'a ninchilabej chiwe chi kan tibana' ri nubij ri pixa' ri xuya' kan ri Moisés ri rusamajel ri Jehová. Tiwajo' k'a ri Jehová ri qa-Dios, y kan kixbiyin chupan ri ruchojmilal. Tiyaka' ronojel ri nubij chupan ri pixa': Kan titzeqelibej rija'. Kan tiya' k'a ruq'ij rik'in ronojel iwánima y tisamajij rik'in ronojel ik'u'x, xcha-el chike.

⁶Ri Josué kan xerurtisaj k'a el richin xkichop-el ri kibey richin xebe pa taq kachoch.

⁷Toq ri Josué xeruteq-el, xuya' k'a el urtisanik pa kiwi' richin xebe. Y xubij-el el chike: Wakami k'a, yixtzolej pa taq iwachoch rik'in janila beyomel, awej, saqipueq, q'anapueq, q'enq'oj-pueq, ri q'eqapueq, y ri janila chi tzieq. Kan titaluj k'a chiwech kik'in ri iwach'alal ri ek'o kan, ronojel re ximej-pe chuwi-kiq'a' ri etzelanel qichin, xcha'. Toq k'a k'es na ri Moisés, kan ruya'on chik k'a kan ri ruwach'ulew Basán chike ri nik'aj tzobaj richin ri Manasés richin xkichinaj kan, y ri nik'aj chik tzobaj, ja ri Josué xjachon chike y xkichinaj kan ri k'o pa qajbel-q'ij chire ri raqen-ya' Jordán, ri chikikojol ri ch'aqa' chik kach'alal.

⁹Keri' ri aj-labal e richin ri tzobaj richin ri Rubén, ri Gad y ri nik'aj tzobaj richin ri Manasés xkich'er k'a kan ki' kik'in ri kiwinaq israelita chiri' pa Siló ri k'o pa ruwach'ulew Canaán. Y rije' xkichop-el bey richin ye'apon pa kiruwach'ulew Galaad, ri ya'on kan chike richin xkichinaj achi'el xubij ri Jehová, toq k'a k'es na ri Moisés.

¹⁰Y toq xe'apon rik'in ri k'ulba't richin ri raqen-ya' Jordán ri k'o pa ruwach'ulew Canaán, ri tzobaj richin ri Rubén, ri Gad y ri nik'aj tzobaj richin ri Manasés, xkinuk'-q'anej abej chuchi' ri raqen-ya' Jordán; achi'el rubanik ri porobel ri k'o pa Siló y xaxe re', nim rujotolen xkiben chire.

¹¹Y ri ch'aqa' chik israelita ri ek'o pa qajbel-q'ij chire ri raqen-ya' Jordán xkinabej ri yetajin chubanik ri tzobaj ri'.

¹²Y toq xkak'axaj re', jari' toq ri ch'aqa' chik tzobaj xkimol-ki' pa tinamit Siló richin nibekibana' oyowal kik'in rije'.

¹³K'ari' ri israelita xkiteq-el ri Finees ri ruk'ajol ri sacerdote Eleazar richin xbe pa Galaad kik'in ri e ka'i' tzobaj rik'in nik'aj.

¹⁴Chirij ri Finees e beneq e lajuj tata'al, chikijujunal rije' e eleneq-pe pa jujun tzobaj ri ek'o pa qajbel-q'ij chire ri Jordán.

¹⁵Konojel ri e taqon-el xebe k'a pa ruwach'ulew Galaad, ri akuchi ek'o-wi ri e ka'i' tzobaj rik'in nik'aj. K'ari' xech'on kik'in y xkibij:

¹⁶Roj oj peteneq pa rubi' ri tinamit richin ri Jehová, y kere' bin-pe chiqe: ¿Achike k'a roma rix xich'er kan iwi' chuwech ri Jehová ri qa-Dios? ¿Y achike k'a roma rix xiben chire chi maneq rejqalen? ¿Y achike k'a roma xipaba-q'anej re jun porobel re' y xixmakun chuwech rija'?

¹⁷¿Kan man jun k'a chiwech rix, toq xojmakun roma xqaya' ruq'ij ri dios Baal-peor? Y k'a re wakami man jani qojch'ajch'ojir chuwech ri Jehová. Roma ri mak ri' rija' xuya' q'ij chi k'iy qawinaq xeken.

¹⁸¿Kan ximestaj yan k'a ri xqak'uluwachij richin kan ich'aron-iwi' chuwech ri Jehová? Re wakami, wi rix yixyakatej chirij ri Jehová, ri chua'q-kabij rija' xtiyakatej royowal pa ruwi' ri qatinamit Israel.

¹⁹Wi rix nina' chi man ch'ajch'oj ta ri ruwach'ulew ri xiwichinaj kan, más utz kixq'ax k'a pe wawe' pa qaruwach'ulew ri kan qitzij richin ri Jehová. Kixk'oje' k'a chiqakojol ri akuchi k'o-wi ri rachoch ri Jehová, y xtok iwichin jun chike ri qaruwach'ulew roj. Jak'a man kixyakatej chirij ri Jehová, ni chuqa' chiqij roj; y man tipaba' chik q'anej jun porobel ri xa k'o chik, ri kan richin ri Jehová ri qa-Dios.

²⁰¡Toqaqa k'a chi'ik'u'x ri xuben ri Acán, ruk'ajol ri Zérah toq xuchop-pe ri kan banon chire chi nik'is jumul! Y roma ri' xken y xojk'uluman chuqa' roj ri tinamit Israel. Man xaxe ta rija' xken roma ri itzel rubanobal, ek'o chik ch'aqa' xeken, xecha'.

²¹K'ari' ri tzobaj richin ri Rubén y ri Gad y ri nik'aj tzobaj richin ri Manasés xech'on y xkibij chike ri aj-raqen richin ri tinamit Israel:

²²Ri Jehová Dios ri k'o pa kiwi' ri ch'aqa' chik dios, xtuq'alajirisaj chiwech ri qach'obonik, chi roj man xqaben ta q'anej re jun porobel re' richin yojyakatej chirij rija', roma wi ta keri' kan ja k'a rix ri xkixkamisan qichin ri'.

²³Wi xqapaba-q'anej re jun porobel re' richin niqaya' kan ri Jehová o richin niqasuj poron chikop pa ruwi' o ri ch'aqa' sipanik richin nuq'alajirisaj chi junan qawech rik'in jun chik dios. Wi keri' xqaben ja ri Jehová ri xtiq'aton-tzij pa qawi'.

²⁴Roj xqaben kere' roma xqaxibij-qi' chi ri chiqawech-apo xtikibij ri iwijatzul chike ri qijatzul roj: ¿Achike ibanon rix rik'in ri Jehová Dios richin ri Israel?

²⁵Ri Jehová xuya' ri raqen-ya' Jordán richin k'ulba't chiqakojol roj y rix. Roma ri' rix ri tzobaj richin ri Rubén y ri Gad man ix richin ta ri Jehová, xkecha', xojcha' roj. Keri' ri chiqawech-apo ri iwijatzul rix xtikiben chike ri qijatzul roj richin man xtikitzeqelibej ta chik ri Jehová.

²⁶Roma ri' xqach'ob y xqabij: Tiqapaba-q'anej jun porobel man richin ta niqasuj poron chikop pa ruwi',

²⁷xa richin k'a jun retal chiqakojol roj y rix, y chikikojol chuqa' ri qijatzul ri xkepe chiqawech-apo, richin tiketamaj chi roj chuqa' niqasamajij ri Jehová y niqasuj chire ri poron chikop, ri kamelabel y ri sipanik richin nuq'alajirisaj chi junan qawech rik'in rija', xojcha'. Xqaben kere' richin ri chiqawech-apo man tikibij ri iwijatzul chike ri qijatzul roj: Rix man ix richin ta ri Jehová, man kecha'.

²⁸Roj xqabij-qa chiqawech: Wi k'o jun chiwe rix kere' xtubij chiqe roj o chike ri qijatzul ri chiqawech-apo, jari' xtikibij: Titzu' re porobel ri xkiben ri qate-qatata'. Re' xban man richin ta nisuj poron chikop, ni kamelabel pa ruwi', xa kan richin k'a jun retal chiqakojol roj y rix, xkecha' ri jun sol chik winaqi', xojcha'.

²⁹Man ja ta qach'obonik roj richin yojyakatej chirij ri Jehová ri qa-Dios, ni man xqapaba' ta q'anej richin jun porobel, ni man richin ta poron chikop, ni ch'aqa' chik sipanik chuwech ri Jehová. Re tz'aq re' man ruk'exel ta ri porobel richin ri Jehová ri k'o chuwech ri rachoch, xecha' chike ri kiwinaq israelita.

³⁰Toq xkak'axaj re' ri sacerdote Finees y ri e lajuj tata'al richin ri tinamit, kan xqa' k'a chikiwech ri xkibij ri tzobaj richin ri Rubén, ri Gad y ri nik'aj chire ri tzobaj richin ri Manasés.

³¹K'ari' ri Finees xubij chike ri ka'i' tzobaj rik'in nik'aj: Wakami xq'ax chiqawech chi ri Jehová kan k'o-wi chiqakojol. Rix man xiben ta re' richin xixyakatej chirij ri Jehová. Wakami xojijech'ej chuwech ri ruk'ayewal ri nuya' ri Dios pa qawi' roj, xcha'.

³²Chirij k'a ronojel re' ri Finees y ri e tata'al ri e beneq chirij, xekiya' kan ri tzobaj richin ri Rubén y ri Gad. Xkiya' kan ri ruwach'ulew Galaad, richin xetzolej pa ruwach'ulew Canaán, y xbekiya' rutzijol chike ri kiwinaq ri achike xbix chike.

³³Ri xbix-pe chike kan xqa' k'a chikiwech konojel ri winaqi', y xkiya' k'a ruq'ij ri Jehová ri ki-Dios. Man jun bey chik xkich'ob richin xejote-q'anej richin nibekibana' labal kik'in rije', y chuqa' richin nikiwulaj ri kiruwach'ulew.

³⁴Ri tzobaj richin ri Rubén y ri Gad xkiya' k'a rubi' ri tz'aq ri', y xkibij Retal chire, roma re' kan jun retal chikikojol rije' chi ri Jehová kan ki-Dios-wi.