Read Kaqchikel Jos 6 Bible Online

Jos 6 - Kaqchikel bible

Jos 6

¹Jak'a ri tinamit Jericó jebel tz'apen; kan jebel tz'apen richin man jun rijatzul kan ri Israel xtok-apo. Kan man jun k'a nok-apo y ni man jun k'a nel-pe.

²Y ri Jehová xubij chire ri Josué: Tawetamaj k'a kan chi ri Jericó xinjech yan pan iq'a', y keri' chuqa' ri rey y chuqa' ri e aj-labal.

³Xtisutij k'a rij ri tinamit kik'in konojel ri aj-labal, y waqi' q'ij keri' xtiben xaxe jun bey pa jun q'ij.

⁴Y wuqu' sacerdote xtikik'uaj jujun xupubel ri banon rik'in uk'a' richin karne'l. Rije' xkebe chuwech ri káxa ri k'o ri nujikibel-tzij chupan. Y chupan k'a ri ruwuq q'ij, wuqu' mul xtisutij-rij ri tinamit, rokik ri sacerdote xtikixupuj ri xupubel.

⁵Y chirij ri' toq xtiwak'axaj chi yeyaloj xtikixupuj ri uk'a' richin karne'l, konojel ri achi'a' xkesik'in rik'in ronojel kuchuq'a', y ri tz'aq richin ri tinamit Jericó xtitzaq jumul k'a pan ulew; jari' toq ri achi'a' choj xke'ok-apo, xcha' ri Jehová chire ri Josué.

⁶K'ari' ri Josué ri ruk'ajol ri Nun, xeroyoj k'a ri e sacerdote y xubij chike: Xtik'uaj ri káxa ri k'o ri rujikibel-tzij ri Jehová chupan, y ri wuqu' chik sacerdote xtikik'uaj ri xupubel banon rik'in uk'a' richin karne'l y xke'ik'o-el chuwech ri káxa.

⁷K'ari' ri Josué xubij chike ri ch'aqa' chik achi'a': Kixik'o y tisutij-rij ri tinamit; y ri jujun ri k'o kikamisabal xke'ik'o chuwech ri káxa ri richin rujikibel-tzij ri Jehová, xcha'.

⁸Y jari' toq ri Josué xch'on yan kik'in ri achi'a', chuqa' kik'in ri wuqu' sacerdote ri kik'uan ri wuqu' xupubel ri banon rik'in uk'a' richin karne'l, richin xe'ik'o chuwech ri káxa richin ri Jehová y xkixupuj ri xupubel. Y ri sacerdote ri uk'uayon ri káxa e beneq chikij.

⁹Y ri jujun chike ri achi'a' ri k'o kikamisabal ik'owineq-el chikiwech ri e sacerdote ri nikixupuj ri xupubel, y ri ch'aqa' chik aj-labal e beneq chirij ri káxa rokik ri yexupun ri xupubel man yetane' ta qa.

¹⁰K'ari' ri Josué xubij k'a chike ri achi'a': Man jun chiwe rix xtisik'in, ni man jun ch'abel tibij, k'a toq xtinbij na yin chiwe chi kixsik'in, k'ari' xkixsik'in rik'in ronojel iwuchuq'a', xcha'.

¹¹Keri' ri Josué xuben chi ri káxa richin ri Jehová xsutin jun bey chirij ri tinamit Jericó: K'ari' xetzolin konojel ri akuchi ek'o-wi-qa y chiri' xkik'owisaj-wi ri aq'a'.

¹²Y ri Josué xuben k'a chike chi xeyakatej nimaq'a' yan. Y ri sacerdote xkik'uaj k'a el ri káxa richin ri Jehová.

¹³Y ri wuqu' sacerdote ri kik'uan-el ri wuqu' xupubel ri e banon rik'in uk'a' richin karne'l e ik'owineq-el chuwech ri káxa, jantape' yebiyin y nikixupuj ri kixupubal. Y ri jujun chike ri aj-labal e ik'owineq chikiwech rije', y ri ch'aqa' chik achi'a' e beneq chirij ri káxa. Y ri yexupun ri xupubel man yetane' ta qa.

¹⁴Y keri' k'a ri ruka'n q'ij xkisutij chik rij jun bey ri tinamit y xetzolin chik ri akuchi ek'o-wi-qa; y keri' k'a xkiben chi waqi' q'ij.

¹⁵Pa ruwuq q'ij, xeyakatej nimaq'a' yan toq k'a q'equ'm na juba', y xkisutij-rij ri tinamit achi'el ri kibanon-pe ri ch'aqa' chik q'ij; xaxe k'a ri q'ij ri' xkisutij-rij ri tinamit wuqu' mul.

¹⁶Y toq xtz'aqet yan wuqu' mul xesutin chirij ri tinamit, jari' toq ri e sacerdote xkeyaloj richin nikixupuj ri xupubel, y chuqa' jari' toq ri Josué xubij chike ri achi'a': Kixsik'in, roma ri Jehová xujech yan pa qaq'a' re tinamit re'.

¹⁷Ri tinamit y ronojel ri k'o chupan, ri Jehová kan rubanon chire chi nik'is jumul, xaxe k'a ri Rahab, ri ixoq itzel ruk'aslen, ri xtik'ase' kan kik'in konojel ri ek'o pa rachoch, roma kan xerewaj ri nachanela' ri xeqateq-pe.

¹⁸Jak'a rix tichajij-iwi'; y man jun tichop-pe chire ri kan xajan nichop, ri kan banon chire chi nik'is jumul. Man xa roma ri' xtipe ri ruk'ayewal pa qawi' ri akuchi ojk'o-wi-qa y xa xqojk'is chuqa' roj.

¹⁹Jak'a ronojel ri saqipueq, ri q'anapueq y ri samajibel ri e banon rik'in q'eqapueq y q'enq'oj-pueq: Ronojel re' kan xkech'ar k'a chire ri Jehová y xke'ok chupan ri rubeyomel rija', xcha'.

²⁰Y ri achi'a' xesik'in rik'in ronojel kuchuq'a', toq ri sacerdote xeyaloj xkixupuj ri xupubel, y jari' toq ri achi'a' xkak'axaj y xesik'in-q'anej, ri tz'aq ri rusutin-rij ri tinamit kan xtzaq-qa jumul y jari' toq kan choj xe'ok-apo chupan ri tinamit y xkich'ek.

²¹Y ronojel ri xkil chupan ri tinamit ri', xekikamisaj rik'in espada; chi achi'a', chi ixoqi', chi ak'uala' y ri taq rijita'q, chuqa' ri bóyix, ri kokoj taq awej y konojel ri bur.

²²Jak'a ri Josué xubij yan chike ri e ka'i' nachanela': Xkixok chupan ri rachoch ri Rahab y xkebe'iwelesaj-pe, chuqa' konojel ri e rach'alal achi'el ri ya'on-tzij ri ibanon kan rik'in, xcha'.

²³Y ri nachanela' xe'ok-apo y xbekelesaj-pe ri Rahab, chuqa' ri rutata', ri rute', ri ruxibal y konojel ri ek'o rik'in; xekelesaj-pe chupan ri tinamit y xebeya'ox kan k'a chirij-el ri akuchi ek'o-wi-qa ri e rijatzul ri Israel.

²⁴Ri aj-labal xkiya' k'a ruq'aq'al ri tinamit y ronojel ri ek'o chupan. Y ri achi'a' xkik'en k'a pe ronojel ri saqipueq, ri q'anapueq y ri samajibel ri e banon rik'in q'eqapueq y q'enq'oj-pueq, y xekiyek kan chupan ri beyomel ri k'o pa rachoch ri Jehová.

²⁵Y ri Josué xukol ruk'aslen ri Rahab, jun ixoq itzel ruk'aslen, chuqa' ri rute-rutata' y konojel ri ek'o pa rachoch re ixoq re'; y xk'ase' chikikojol ri e rijatzul ri Israel k'a re wakami, roma xukol kik'aslen ri e ka'i' nachanela' ri e taqon richin xbeketamaj kan jebel ri tinamit Jericó.

²⁶Chupan k'a ri q'ij ri' ri Josué xuben k'a jun ya'on-tzij y xubij: Wi k'o ta jun achin ri xtuyek chik q'anej re tinamit Jericó, kan itzel k'a ruwa-ruq'ij, roma toq xtuya-qa ri ruxe' ri tz'aq, jari' toq xtiken ri nabey ruk'ajol; y toq xtuya' ri ruchi' ri tz'aq, jari' toq xtiken ri ruk'isibel ruk'ajol, xcha' ri Josué.

²⁷Ri Jehová kan xk'oje' rik'in ri Josué y ronojel ri xuben kan xel k'a rutzijol chuwech chijun ruwach'ulew.