Read Kaqchikel Jos 9 Bible Online

Jos 9 - Kaqchikel bible

Jos 9

¹Y xk'uluwachitej k'a chi toq konojel ri winaqi' aj-Canaán xkak'axaj ronojel ri xbanatej, jari' toq ri rey ri ek'o pa qajbel-q'ij chire ri raqen-ya' Jordán, ri ek'o pa taq'aj kojol juyu', y chuwa taq juyu', y ri taq'aj ri k'o chuchi' ri palou; ri ek'o pe kere' chuwech ri juyu' Líbano, ri hitita, ri amorreo, ri cananeo, ri ferezeo, ri heveo y ri jebuseo,

²xkimol k'a ki' richin nibekibana' oyowal rik'in ri Josué y ri e ruwinaq.

³Jak'a ri winaqi' ri ek'o pa tinamit Gabaón, toq xkak'axaj ri xkiben ri Josué y ri achi'a' chike ri aj-Jericó y ri aj-Ai,

⁴jari' toq xkinojij xkikusaj jun nowineq na'oj. Xebe k'a y xkiben chi e taqon-el y xkiya-el chikij ri taq kibur rijlej taq costal y rijlej taq tz'um richin vino, tzeretzeq y k'ojon chik,

⁵y chuqa' xkikusaj-el rijlej taq xajab y e kik'ojon chik. Y chuqa' kikusalon-el tzeretzeq taq tzieq. Ri kikaxlan-way ri kik'uan-el richin nikitej pa bey chaqi'j-chaqi'j y pus-pus chik.

⁶Y keri' xe'apon chuwech ri Josué, akuchi ek'o-wi-qa pa Guilgal, y xkibij chire rija' y chike ri ruwinaq: Roj oj peteneq pa jun ruwach'ulew janila nej-nej. Tibana' k'a utzil tijunamatej-iwech qik'in, xecha'.

⁷Y ri winaqi' aj-Israel xkibij chike ri achi'a' heveo: Rik'in k'a juba' rix xa ke taq re' naqaj ixk'o-wi, ¿achi'el ta k'a yojtikir nijunamatej-qawech iwik'in?, xecha'.

⁸Rije' xkibij chire ri Josué: Roj kan oj asamajela-wi, xecha'. K'ari' ri Josué xuk'utuj chik chike ri e achike k'a rije' y akuchi e peteneq-wi.

⁹Rije' xkibij chire: Roj ri oj asamajela' oj peteneq pa jun ruwach'ulew janila nej, roma kela' qak'axan ri nima'q taq rubanobal ri Jehová ri i-Dios: Ri nima'q taq rubanobal ri xuben pan Egipto,

¹⁰y ronojel ri xuben kik'in ri e ka'i' rey kichin ri amorreo, ri ek'o juk'an chire ri raqen-ya' Jordán, nel chi tzij: Ri Sihón rey richin ri tinamit Hesbón y ri Og rey pa ruwi' ri ruwach'ulew Basán, y pa ruwi' ri tinamit Astarot.

¹¹Roma ri' ri achi'a' ri k'o kiq'ij y konojel ri qawinaq ri ek'o pa qaruwach'ulew xkibij chiqe: Tik'uaj ikaxlan-way ri janipe' nik'atzin chiwe richin nitej pa bey. Kebe'ik'ulu' y tibij chike: Roj oj isamajela'; roma ri' tijunamatej-iwech qik'in, kixcha' chike, xecha-pe chiqe.

¹²Ri q'ij toq xojel pe pa qachoch, re qakaxlan-way re xeqak'en-pe richin niqatej pa bey k'a meq'en na, y titz'eta' wakami xa chaqi'j-chaqi'j y pus-pus chik.

¹³Chuqa' re tz'um richin ri qa-vino, k'a e k'ak'a-k'ak'a' na toq xeqanojisaj-pe, y titzu' wakami xa xeretzetej yan. Y re qatziaq y re qaxajab xetziaqir yan roma yalan nej ri bey oj peteneq-wi, xecha' rije'.

¹⁴Y ri e rijatzul ri Israel xkinimaj k'a, roma xkitz'et ri kikaxlan-way man utz ta chik, jak'a rije' man xkik'utuj ta na chire ri Jehová ri ruk'amon richin nikiben.

¹⁵Ri Josué kan xjunamatej k'a ruwech kik'in y xuya' rutzij chi man yerukamisaj ta. Keri' chuqa' ri e tata'al kan xjunamatej k'a kiwech kik'in ri winaqi' ri' y xkiya' kitzij chi man yekikamisaj ta.

¹⁶Y toq xik'o yan oxi' q'ij chi tijunamatej-kiwech kik'in rije', k'ari' xkinabej chi ri achi'a' ri xe'apon kik'in xa e aj chikinaqaj.

¹⁷Y ri achi'a' e rijatzul ri Israel xe'el k'a el, y pa rox q'ij xe'apon pa kitinamit ri achi'a' ri', y ri kitinamit ja ri Gabaón, Quefirá, Beerot y Quiriat-jearim.

¹⁸Jak'a ri israelita man xekikamisaj ta ri winaqi' richin ri e kaji' tinamit ri', roma ri e tata'al kiya'on-kitzij pa rubi' ri Jehová ri ki-Dios chi man yekikamisaj ta. Roma ri' konojel k'a ri winaqi' yexebexot chikij ri e tata'al ri'.

¹⁹Y konojel ri tata'al ri' xkibij chike konojel ri kiwinaq: Roj kan qaya'on qatzij pa rubi' ri Jehová ri qa-Dios chi man yeqakamisaj ta. Roma ri' man jun yojtikir niqaben chike.

²⁰Jare' k'a ri xtiqaben kik'in: Xtiqaya' k'a q'ij chike richin yek'ase', richin chi man nipe ta k'a ruk'ayewal pa qawi' roj roma ri ya'on-tzij ri xqaben, xecha'.

²¹Chuqa' ri e tata'al xkibij: Tiqaya' q'ij richin yek'ase', jak'a xa xke'ok banoy si', y erey taq ya' qichin roj, xecha', roma kan keri' kisujun ri e tata'al chike ri e kiwinaq.

²²K'ari' ri Josué xeroyoj k'a ri aj-Gabaón y xch'on kik'in y xubij chike: ¿Achike roma xojiq'ol toq xibij chi ix peteneq janila nej, y xa naqaj chiqe roj ixk'o-wi?

²³Roma ri', wakami itzel k'a ruwa-iq'ij y kan beneq k'a ruwech xkixok samajel chiqakojol roj. Jantape' k'a xkixok banoy si' y erey taq ya' richin ri rachoch ri qa-Dios, xcha' ri Josué.

²⁴Y rije' xkibij k'a chire ri Josué: Roj kan xqetamaj k'a chi ri Jehová ri i-Dios xubij chire ri ánima Moisés, ri rusamajel richin nuya' chiwe ronojel re ruwach'ulew re' y chuqa' kan k'o chi xke'ikamisaj konojel ri ek'o chuwech. Roma ri' janila xqaxibij-qi' richin yojikamisaj, y roma ri' roj xqaben kere'.

²⁵Wakami k'a, jare' ojk'o pan iq'a'. Tibana' k'a qik'in ri xtiqa' chiwech, xecha' rije'.

²⁶Kere' k'a xuben ri Josué kik'in re winaqi' re': Man xuya' ta q'ij chike ri ruwinaq richin xekikamisaj.

²⁷Chupan ri q'ij ri' xuben chike chi ri kisamaj rije' ja ri banoj si' y eran-ya' kichin ri winaqi' israelita y chuqa' xtikiben ri xtik'atzin chupan ri rachoch ri Jehová, xabakuchi ta k'a xtubij ri Jehová ri akuchi xtik'oje-wi ri rachoch. Y ri winaqi' ri' kan ja kisamaj ri' k'a re wakami.