Read Kaqchikel 2 Tesalonicenses 3 Bible Online

2 Tesalonicenses 3 - Kaqchikel bible

2 Tesalonicenses 3

¹Qach'alal, pa ruk'isibel niqak'utuj chiwe chi kixch'on rik'in ri Dios qawi' roj, y tik'utuj chire chi chi'anin ta xtibiyin rutzijoxik ri ruch'abel, y kan ta ninimex achi'el xinimaj rix.

²Tik'utuj chuqa' chire chi man yojqaqa pa kiq'a' ri itzel taq winaqi', roma xa man konojel ta kiniman ri Jesucristo.

³Toqaqa chi'ik'u'x chi ri ajaw man jun bey xkixruya' kan; xa kan xtuya' iwuchuq'a' y xkixruchajij chuwech ri etzelal.

⁴Ri Dios xuya' yan kuqubabel-k'u'x qik'in chi rix yixtajin chik chubanik ri xqabij chiwe y chi keri' xtiben jantape'.

⁵Ri Cristo xtuben ta k'a chiwe chi yixkoch'on achi'el xkoch'on rija', y chi kan nina' ta pa taq iwánima ri rajowabal ri Dios.

⁶Qach'alal, niqabij k'a chiwe pa rubi' ri qajaw Jesucristo chi wi k'o jun qach'alal chi'ikojol ri janila q'or, y kan man nuben ta ri xqabij chiwe, tich'ara-iwi' rik'in.

⁷Roma rix jebel iwetaman chi toq xojk'oje' iwik'in, kan man xojq'oran ta. Y achi'el ri xqaben roj, kan keri' k'o chi niben rix chuqa'.

⁸Toq xojk'oje' iwik'in, man jun xqak'utuj chiwe, xa xqatoj ronojel ri xqatej. Chi paq'ij chi chaq'a' xojsamej roma man xqajo' ta xqelesaj iway rix, y man jun bey xixqaya' pa k'ayew.

⁹Wi ta xqak'utuj qaway chiwe, ruk'amon ta chuqa', roma kan xqaben-wi ri rusamaj ri Dios chi'ikojol. Jak'a xa xojsamej richin xqach'ek qaway, richin xqak'ut chiwech chi kan keri' chuqa' tibana' rix.

¹⁰Y toq xojk'oje' iwik'in, xqabij chiwe chi wi k'o jun ri man nrajo' ta nisamej, chuqa' man tutej ruway.

¹¹Y wakami qak'axan chi ri chi'ikojol rix ek'o ri man nikajo' ta yesamej y nikijula-apo-ki' pa taq tzij ri man ruk'amon ta.

¹²Chike rije' niqabij k'a, y ri ajaw Jesucristo chuqa' nubij chike, chi xa kan kesamej k'a achi'el ri ruk'amon, richin nikich'ek kiway.

¹³Qach'alal, man yixkos chubanik ri utz.

¹⁴Wi k'o jun ri man nrajo' ta nuben ri xqabij yan qa, titz'eta' k'a achike ri' richin nich'er-el-iwi' rik'in y keri' nik'ixbitej.

¹⁵Jak'a man tiwetzelaj. Xa tipixabaj, achi'el ruk'amon chire jun qach'alal.

¹⁶Qach'alal, ri Jesucristo ri niya'on uxlanen, xtuya' ta k'a uxlanen pa taq iwánima richin jantape', chupan xabachike ri nik'uluwachij. Y xtik'oje' ta k'a iwik'in chi'iwonojel.

¹⁷Y pa ruk'isibel chire re wuj re' ninteq-el rutzil-iwech, ri kan rik'in nuq'a' yin Pablo, nubanon-wi-el. Kere' ninben chire ronojel nuwuj ri yenteq, roma kan kere' ri yitz'iban.

¹⁸Ri rutzil ri qajaw Jesucristo xtik'oje' ta k'a iwik'in chi'iwonojel. Kan keri' ta k'a.