Read Kaqchikel 1 Timoteo 2 Bible Online

1 Timoteo 2 - Kaqchikel bible

1 Timoteo 2

¹Pa ruwi' ronojel re' ninbij k'a chawe chi kan jantape' tiban ch'owen rik'in ri Dios: Tik'utux chire ronojel ri nik'atzin chike konojel, y timatioxix chire koma ri winaqi'.

²Tiqak'utuj k'a chire ri Dios chi keruto' ri rey, y chuqa' ri ch'aqa' chik q'atoy taq tzij, richin keri' xqojk'ase' rik'in ch'uch'ujil, y man ta k'o q'axomal xtiqak'owisaj, richin xtiqaya' ruq'ij-ruk'ojlen ri Dios.

³Roma re' kan utz y kan niqa' chuwech ri Dios.

⁴Rija' nrajo' chi kan ta qonojel niqetamaj ta ri qitzij y yojkolotej.

⁵Kan xaxe jun Dios k'o y chukojol ri Dios y roj ri winaqi', xaxe jun k'o ri nibanon chi yojapon rik'in ri Dios, y ri' ja ri Jesucristo ri xok wineq achi'el roj,

⁶rija' xuya-ri' pa kamik richin xutoj ri qamak qonojel. Y ri' xchap rutzijoxik toq xapon ri q'ij.

⁷Y yin xirucha' ri Dios richin xinok jun taqon roma ri Cristo y richin xinchop rutzijoxik ri qitzij ruch'abel rija' chike ri winaqi' ri man e judío ta y richin chi yentijoj chire ri kuqubabel-k'u'x rik'in ri Cristo. Ri ninbij kan qitzij, y man nintz'uk ta.

⁸Ninwajo' k'a chi ri achi'a' kech'on rik'in ri Dios xabakuchi ek'o-wi, tikitzeqej ri loq'olej kiq'a' chikaj, y man ta jun oyowal ri niq'aton ri kich'owen.

⁹Keri' chuqa' ri ixoqi', kekikusaj tzieq ri kan e choj, ri ruk'amon chi nikikusaj. Man tikibanala' ruchojmil ri rusumal taq kiwi' xaxe richin chi ketz'et koma ri winaqi', ni man kekikusaj wiqobel ri e banon rik'in q'anapueq, o rik'in perla, y man yekikusala' jebelej taq tzieq ri jotol kajel.

¹⁰Pa ruk'exel ri' xa tikiwiqa-ki' rik'in utzilej taq banobel achi'el ruk'amon chi nikiben ri ixoqi' ri nikiben ri rurayibel ri Dios.

¹¹Y toq nimol-iwi' richin yixtijox, ri ixoqi' xaxe tikak'axaj y tikinimaj tzij.

¹²Man ninya' ta q'ij chi jun ixoq nitijon kichin ri achi'a', o nik'oje' pa kiwi', ri ixoqi' xaxe tikak'axaj,

¹³roma toq ri Dios xeruben ri winaqi', nabey xuben ri Adán, y k'ari' xuben ri Eva.

¹⁴Y chuqa' man ja ta ri Adán ri xq'olotej roma ri kumetz, xa ja ri Eva y keri' xuq'ej ruwi' ri rupixa' ri Dios.

¹⁵Jak'a ri ixoq xtikolotej rik'in xtok te'ej, wi kan nukuquba' ruk'u'x rik'in ri Dios, k'o ajowabel pa ránima, y nuk'uaj jun k'aslen ch'ajch'oj.