Read Kaqchikel 1 Timoteo 5 Bible Online

1 Timoteo 5 - Kaqchikel bible

1 Timoteo 5

¹Wi k'o jun qach'alal achin ti ri'j chik, man rik'in ch'olinik kach'on rik'in, xa kan rik'in ch'uch'uj taq ch'abel tapixabaj, y tabana' chire chi achi'el xa ta atata'. Y chuqa' keri' tabana' kik'in ri alaboni'; tabana' chike chi kan achi'el e awach'alal.

²Y chuqa' ri ixoqi' ri e rijita'q chik, tabana' chike chi kan e achi'el ate'. Y ri xtani', tabana' chike chi kan e achi'el awana', rik'in ch'ajch'ojilej ch'obonik.

³Y wi ek'o malkani' taq ixoqi' ri kan kiyon y kan man jun nilin kichin, ke'ato'.

⁴Jak'a ri malkani' ri ek'o kal o ek'o kiy, ja rije' ri ke'ilin kichin, richin niketamaj yekilij nabey ri e aj pa kachoch, y yekito' ri kite-kitata' achi'el ri ruk'amon chi nikiben ri nimanela', roma jari' ri niqa' chuwech ri Dios.

⁵Jak'a ri kan man jun nilin kichin, y k'o nik'atzin chike, rije' chi paq'ij chi chaq'a' kikuquban kik'u'x rik'in ri Dios, y yech'on rik'in.

⁶Ri malkani' ri xaxe ri kikoten richin re ruwach'ulew nikich'ob, xa e kaminaqi' chik, stape' k'a e k'es na.

⁷Ronojel re' tabij chike ri malkani' richin man jun etzelal xtilitej chikij.

⁸Jak'a nik'atzin chi konojel yekito' ri e kach'alal, y kan más nik'atzin chi yekilij ri kan e aj pa kachoch. Roma ri man nuben ta keri' xa kan achi'el xa ta xumalij kan ri kuqubabel-k'u'x, y xa más itzel ke chikiwech ri winaqi' ri man ketaman ta ruwech ri Dios.

⁹Kan k'atzinel k'a richin yeto'ox ri malkani' taq ixoqi' ri k'o más oxk'al kijuna', y wi kan utz xkiben kik'in ri kachijilal,

¹⁰wi etaman chi kan e utz taq ixoqi', wi e kik'iytisan jebel ri kal, wi jebel e kik'ulun ch'aqa' chik winaqi' pa kachoch, wi ekilin rik'in qasanri'il ri qach'alal ri ye'apon pa kachoch, wi e kito'on ri nikitej poqon, y wi ronojel ruwech utzil e kibanalon.

¹¹Jak'a ri malkani' taq ixoqi' ri k'a e ak'uala' na, más utz man yeto'ox ta, roma rik'in juba' xa man xtikajo' ta chik nikiben ri rusamaj ri Cristo, y xa xtikirayij yek'ule' chik el jun bey,

¹²keri' xa xtikiq'ej-ruwi' ri kitzij y rik'in ri' yemakun.

¹³Xa xtikichop yeq'oran, yebe chi taq jay. Y man xaxe ta chik ri yeq'oran, xa nikichop nikikamulula' tzij, nikijula-apo-ki' xabakuchi y nikibila' tzij ri man e ruk'amon ta.

¹⁴Roma ri' ninbij chike ri malkani' taq ixoqi' ri k'a e ak'uala' na chi kek'ule' chik jun bey, kek'oje' chik kal y ke'ok rajaw taq jay, man tikiya' q'ij chike ri e etzelanel chi yech'on-pe chikij.

¹⁵Roma ek'o chike rije' ri kiya'on chik kan ri utzilej k'aslen y kichapon chik nikojqaj ri Satanás.

¹⁶Jak'a wi k'o jun qach'alal ixoq ri ek'o rach'alal malkani' taq ixoqi', ja rija' ri k'o chi nilin kichin, y man ja ta ri molaj qach'alal. Y keri' ri qach'alal yetikir yekito' ri malkani' taq ixoqi' ri kan kiyon y man jun nilin kichin.

¹⁷Ri uk'uey kichin ri molaj qach'alal ri kan jebel kik'uaxik nikiben chike ri qach'alal, kan ruk'amon chi ka'i' ta bey nikik'ul ri rajel ruk'exel. Y kan más ruk'amon chi nikik'ul keri', ri nikitzijoj ri ruch'abel ri Dios y ri yetijon.

¹⁸Roma ri ruch'abel ri Dios nubij;*f2* chi ri bóyix, toq nich'ayon trigo, man ruk'amon ta niya'ox ru-bosal. Y chi ri samajel k'o chi nitoj roma ri samaj ri nuben.

¹⁹Y chuqa', wi ta k'o jun uk'uey kichin ri qach'alal ri nibix chi xmakun, kan nik'atzin chi ek'o ka'i' oxi' ri yesujun chirij richin ninimex.*f3*

²⁰Wi k'o ta jun ri man nuya' ta kan richin nimakun, tabij k'a chire chikiwech ri qach'alal chi man utz ta ri najin chubanik, richin keri' ri ch'aqa' chik qach'alal nikixibij-ki' yemakun.

²¹Chuwech ri Dios y chuwech ri ajaw Jesucristo y chikiwech ri ángel ri e cha'on roma ri Dios, kan ninbij k'a chawe rat Timoteo, chi tabana' ronojel re' kik'in ri qach'alal, y man jun rukojol taben.

²²Man chi'anin taya' q'ij chire jun qach'alal chi nok chupan ri rusamaj ri Dios, wi man awetaman ta achike chi k'aslen ruk'uan, richin man nawejqalej ri rumak rija'. Rat kan tachajij awi' richin keri' jantape' ch'ajch'oj ri ak'aslen.

²³Rat Timoteo beneq-ruwech at yawa', roma ri' man utz ta chi ruyon raxya' naqum. Xa taqumu' chuqa' juba' vino richin ri apan.

²⁴Ek'o winaqi' ri kan nitz'etetej chi'anin ri kimak toq man jani niq'at tzij pa kiwi', y ek'o ch'aqa' ri k'arunaj nibeq'alajin-pe ri kimak.

²⁵Y keri' chuqa' ek'o winaqi' ri kan chi'anin nitz'etetej ri utzilej kibanobal, y ek'o ri k'arunaj nibeq'alajin-pe.