Read Kaqchikel 2 Timoteo 2 Bible Online

2 Timoteo 2 - Kaqchikel bible

2 Timoteo 2

¹Ninbij k'a chawe rat Timoteo, ri at achi'el nuk'ajol, chi kan tik'oje' k'a el awuchuq'a' rik'in ri utzil ri niqak'ul roma ri Cristo Jesús.

²Ri tijonik ri xinya' chawe chikiwech e k'iy, kan jak'a chuqa' ri' taya' chike ch'aqa' chik achi'a' ri kan yetikir-wi yekitijon.

³Y man tapoqonaj natej poqon roma naben ri samaj ri nrajo' ri Jesucristo, achi'el jun utzilej aj-labal.

⁴Ri utzilej aj-labal ri', richin utz nik'ulun chuwech ri aj-raqen pa ruwi', man nuyoj ta ri' chubanik ch'aqa' chik samaj.

⁵Keri' chuqa' jun ri nanin; richin k'o nuch'ek, rija' nutej ruq'ij richin nuben pa ruchojmilal ri anin ri'.

⁶Jun samajel richin pa juyu' roma kan jebel samajineq, ja rija' ri k'o ruq'a' chire ri nabey ruwech ri rutiko'n.

⁷Tach'obo' k'a rij ronojel re xinbij chawe, y ri ajaw xtuben ta chawe chi xtiq'ax jebel chawech.

⁸Jantape' toqaqa chi'ak'u'x chi ri Jesucristo, ri rumam kan ri rey David, xken y xk'astej. Y jare' ri ninbij yin toq nintzijoj ri utzilej ch'abel richin kolotajik.

⁹Y roma nintzijoj ri ch'abel ri', nintej poqon, inximon re pa cárcel, achi'el jun kamisanel. Jak'a ri ruch'abel ri Dios man ximil ta.

¹⁰Y koma ri winaqi' ri nrajo' ri Dios chi yekolotej, toq yin ninkoch' ronojel tijoj-poqonal. Richin keri' kan nikil ri kolotajik ri nuya' ri Cristo Jesús, y kan xtik'oje' kiq'ij-kik'ojlen richin jantape'.

¹¹Kan qitzij wi k'a re ch'abel re': Wi niqakuquba' qak'u'x chi ri Cristo xken qoma roj, kan xqojk'ase' rik'in rija'.

¹²Wi niqakoch' tijoj-poqonal roma rija', napon na ri q'ij toq junan xtiqaq'et-tzij rik'in. Y wi niqabij chi man qetaman ta ruwech, chuqa' rija' xtubij chi man retaman ta qawech.

¹³Jak'a stape' roj niqamalij kan, rija' man xqojrumalij ta kan, roma rija' kan keri'.

¹⁴Tanataj k'a ronojel re' chike ri qach'alal y tabij chike pa rubi' ri ajaw chi man tikiben oyowal pa ruwi' tijonik y nojibel ri xa man jun nuk'en-pe chike, ri xa yeruya' pa wululen ri ye'ak'axan.

¹⁵Kan tatija' aq'ij yatok jun utzilej samajel chuwech ri Dios, ri man jun achike ta roma yak'ix y kan nak'ut jebel ri qitzij ruch'abel ri Dios.

¹⁶Y man k'a katzijon pa ruwi' tzij ri xa e richin re ruwach'ulew, roma ri yech'on keri' xa eqal-eqal nikijech'ej kan ki' rik'in ri ruchojmilal.

¹⁷Y ri tzij ri' yekik'ux ri kánima, kan achi'el nuben jun ch'a'k ri man naq'omatej ta. Keri' xkik'uluwachij ri Himeneo y ri Fileto.

¹⁸Rije' xkich'er kan ki' rik'in ri qitzij, roma nikibij chi xek'astej yan el ri kaminaqi'. Y roma ri' nikisech kik'u'x ch'aqa' chik.

¹⁹Jak'a roj ri qakuquban qak'u'x rik'in ri Dios, rija' rubanon chiqe achi'el jun jay ri yalan utz ri ruxe'. Y chuwech ri ruxe' ri' tz'ibatajineq chik kan chi ri Dios retaman kiwech ri e richin chik rija', y chuqa' chi konojel ri e richin chik rija', tikich'ara-pe-ki' chire ri etzelal.

²⁰Chupan jun nimalej jay man xaxe ta samajibel, ri e banon rik'in q'anapueq y saqipueq ri ek'o; xa kan ek'o chuqa' ri e banon rik'in che' y rik'in ulew. Ri ch'aqa' ye'ukusex xaxe richin nimaq'ij y ri ch'aqa' chik richin ye'ukusex ronojel q'ij.

²¹Keri' chuqa' ri ralk'ual ri Dios, wi nucher-pe-ri' rik'in ri etzelal, kan xtok achi'el ri samajibel ri k'o rejqalen, loq'olej y runaban ri' richin nuben ronojel ruwech utzilej samaj.

²²Chuqa' rat katanimej chuwech ri itzel taq rayinik ri nipe pa kik'aslen ri k'a e k'ajola' na. Tatija' aq'ij chi nak'uaj jun k'aslen choj. Kan takuquba' ak'u'x rik'in ri Dios, katajowan y tik'oje' uxlanibel-k'u'x awik'in kik'in konojel ri rik'in ch'ajch'ojilej kánima yech'on rik'in ri Dios.

²³Man k'a kach'on pa ruwi' ch'abel ri man jun kejqalen y xa man jun utz nikik'en-pe chawe, roma xa nikik'en-pe oyowal.

²⁴Roma rat at jun rusamajel ri Ajaw, man ruk'amon ta chi naben oyowal. Jak'a kan nik'atzin chi utz naben kik'in konojel. Y nik'atzin chuqa' chi ye'atijoj chi utzil ri qach'alal, y chi yakoch'on chuqa'.

²⁵Y rik'in ch'uch'ujil tabij chike ri winaqi' ri man junan ta kich'obonik pa ruwi' ri ruch'abel ri Dios, chi tikijala' ri kich'obonik. Rik'in juba' rija' nuya' q'ij chike richin nikitzolij-ki' chikij y xtiketamaj ri qitzij.

²⁶Y rik'in ri' xkech'obon chik utz y xkekolotej pa ruq'a' ri Itzel-Wineq, ri eruchapon richin nuben kik'in xabachike ri nrajo'.