Read Kaqchikel Tito 3 Bible Online

Tito 3 - Kaqchikel bible

Tito 3

¹Kan tabij k'a chike ri qach'alal chi nikinimaj ta kitzij ri q'atoy taq tzij. Kan nikiben ta k'a ri nibix chike, y kan chi'anin ta nikiben ronojel ruwech utzilej taq samaj,

²chi man nikibij ta itzel chirij jun chik wineq, y chi man nikiben ta oyowal. Xa utz ta nikiben kik'in konojel, y kan ta rik'in ch'uch'ujil.

³Roma toq rubanon kan, roj chuqa' oj nakaneq rik'in ri qach'obonik. Man xojniman ta tzij, y yalan oj sachineq ri chiri'. Man xojtikir ta xqaq'il-qi' chuwech ri mak. Xa kan xqaben ronojel ri itzel ri xqarayij. Yalan itzel ri qak'aslen xqak'uaj. Itzel xeqatz'et ri ch'aqa' chik roma ri utz k'o kik'in. Y kan niqetzelaj-qi'.

⁴Jak'a toq ri Dios ri qakolonel xuk'ut ri rutzil y ri rajowabal chiqawech,

⁵rija' xojrukol k'a pe chupan ri qamak. Man roma ta yalan choj ri k'aslen qak'uan toq xojrukol-pe, xa kan roma xujoyowaj qawech. Roma ri rusamaj ri Loq'olej Espíritu, xuch'ej ri qánima, xojruch'ajch'ojirisaj y xuya' jun k'ak'a' k'aslen chiqe.

⁶Ri Dios, roma ri qakolonel Jesucristo, xuya' ri Loq'olej Espíritu chiqe richin jantape'.

⁷Y roma ri rutzil ri Jesucristo, man jun qamak yojk'ulun chuwech ri Dios, y xqak'ul yan ri utzilej k'aslen ri man xtik'is ta, ri qoyoben.

⁸Ronojel re xinbij yan, kan qitzij wi. Roma ri' ninwajo' chi man tatanaba' kitijoxik ri qach'alal chire ronojel re', richin keri' kan beneq ruwech tikitija' kiq'ij nikiben ri utzilej taq banobel. Ronojel re' kan utz wi y kan k'o utz nuk'en-pe chiqe qonojel.

⁹Jak'a man ke'awak'axaj ri tzij ri xa man jun kejqalen, achi'el toq yekinataj ri rucholajen ri kik'aslen ri kati't-kimama', toq nikiben oyowal y xa man jun achike ta roma, y toq nikiben oyowal pa ruwi' ri rupixa' kan ri Moisés. Ronojel re tzij ke taq re' xa man jun utz nuk'en-pe.

¹⁰Y wi k'o jun ri chaq jupalik nrajo' nuben oyowal, tapixabaj k'a ri nibanon keri'. Y wi abin chik chire jun bey y man yarunimaj ta, tabij chik jun bey chire. Y wi kan man niniman ta, man chik tak'en ruwech.

¹¹Roma ri nibanon keri', kan niq'alajin-wi chi xa sachineq rik'in ri ruch'obonik, itzel ruk'aslen ruk'uan, y ruyon rija' nroyoj ruk'ayewal pa ruwi'.

¹²Y yin xtinteq-el ri Artemas awik'in ó ri Tíquico. Y toq xtapon awik'in, tatija' aq'ij chi yinabewila' pa tinamit Nicópolis, roma nuch'obon chi yibek'oje' chiri' chupan ri q'ij richin tew.

¹³Y chike ri Zenas ri etamanel richin ri pixa' y ri Apolos, ke'ato' richin yetikir ye'el-el pa tinamit, y taya' k'a el ronojel ri nik'atzin chike richin ri kibey.

¹⁴Ri qach'alal k'o chi niketamaj nikiben ri utz, y yekito' k'a konojel ri k'o nik'atzin chike, richin ri qach'alal ri' jebel ta niwachin ri kik'aslen.

¹⁵Konojel k'a ri qach'alal ri ek'o wik'in nikiteq-el rutzil-awech. Y taya' k'a chuqa' rutzil-kiwech ri ch'aqa' chik qach'alal. Ri rutzil ri Dios xtik'oje' ta k'a iwik'in chi'iwonojel. Kan keri' ta k'a.