Read Kaqchikel Hebreos 1 Bible Online

Hebreos 1 - Kaqchikel bible

Hebreos 1

¹Ri ojer kan ri', ri Dios k'iy k'a bey y k'iy rubanik xch'on kik'in ri qati't-qamama' y xerukusaj ri yeq'alajirisan ri ruch'abel.

²Jak'a chupan re q'ij ojk'o-wi roj, ri ruk'isibel q'ij richin re ruwach'ulew, ri Dios kan ja ri Ruk'ajol ri xukusaj richin xuq'alajirisaj ri ruch'abel chiqawech y pa ruq'a' rija' xuya-wi ronojel. Y roma rija' xuben re ruwach'ulew y ronojel ri k'o.

³Rik'in ri Ruk'ajol niq'alajin ri ruq'ij-ruk'ojlen. Ri Ruk'ajol kan junan rik'in rija' y ja ri K'ajolaxel ri uk'uayon richin ronojel ri k'o; rik'in ri ruchuq'a' ri ruch'abel ruchapon-wi. Rija' xtikir xuyoj ri qamak, y k'ari' xbetz'uye' chila' chikaj pa rijkiq'a' ri nimalej Dios.

⁴Ri Dios xuben chi ri ruk'ajol k'o más ruq'ij chikiwech ri ángel. Y chuqa' ri rubi' ri xya'ox kan más nim rejqalen chuwech ri kibi' ri ángel.

⁵¿Achike ta k'a chike ri ángel ri rubin ta ri Dios?*f1* Rat at nuk'ajol y yin in atata': O rubin ta pa ruwi': Yin xkinok achi'el jun tata'aj chire rija', y rija' xtok achi'el nuk'ajol.

⁶Y toq ri Dios xuteq-pe ri Ruk'ajol chuwech re ruwach'ulew, xubij chike konojel ri ru-ángel chi tikiya' ruq'ij.

⁷Chikij ri ángel xaxe nubij:*f2* Ri nu-ángel ninben chike chi e achi'el ri kaq'iq', chi e achi'el ri ruxaq-q'aq', nicha'.

⁸Jak'a chire ri K'ajolaxel nubij:*f3* Ri awajawaren, rat Dios kan richin q'asen y ja rat xkaq'aton-tzij pa ruchojmilal.

⁹Kan niqa' chawech ri ruchojmilal y ri etzelal kan nawetzelaj. Roma ri' kan xarucha' ri Dios, kan xarunojisaj rik'in kikoten, más ke chikiwech ri awachibil.

¹⁰Y chuqa' nubij:*f4* Rat ajaw kan xajikiba' ri ruwach'ulew pa rutikeribel. chijun ri kaj kan ja rat ri xabanon rik'in ri aq'a'.

¹¹Ri ruwach'ulew y ri kaj xkek'is. Jak'a rat kan man jun bey xkak'is. Ri ruwach'ulew y ri kaj xa kan xkerijix, achi'el yerijix ri tzieq.

¹²Rat kan xtaben k'a chire ronojel achi'el jun tzieq ri xa nijal kan y kan yejalatej k'a el. Jak'a rat kan man yajalatej ta. Rat kan man jun bey k'a xkak'is.

¹³¿Achike ta k'a chike ri ángel ri xubij ta ri Dios:*f5* Katz'uye-pe re pa wijkiq'a' y xkenya' pan aq'a' ri ye'etzelan awichin?

¹⁴Ri ángel ri' choj e rusamajela' ri Dios y ja rije' ri yetaq roma ri Dios richin yekito' ri xkekolotej.