Read Kaqchikel Hebreos 4 Bible Online

Hebreos 4 - Kaqchikel bible

Hebreos 4

¹Roma ri' tiqachajij-qi', man xa tiqaben achi'el xkiben ri winaqi' ri' y xa man yojok ta chupan ri uxlanen ri rubin ri Dios ri k'a nusuj na chiqe.

²Roma ri utzilej rutzijol ri ruch'abel ri Dios tzijon chiqe roj, kan achi'el xtzijox chike ri qati't-qamama' ri ojer kan. Jak'a rije' xa man xkikuquba' ta kik'u'x, y roma ri' man jun utz xuk'en-pe chike.

³Jak'a roj ri qaniman, niqak'ul ri uxlanen, achi'el xubij ri Dios:*f11* Roma ri' chupan ri woyowal xinya' nutzij, y xinbij chi rije' man xke'ok ta chupan ri ruwach'ulew akuchi k'o uxlanen, nicha'. Rik'in ri' niq'alajin chi roj ri qaniman, yojok chupan ri uxlanen ri nuya' ri Dios. Y ri uxlanen ri' tikerineq-pe ja toq ri Dios xuk'is rubanik re ruwach'ulew.

⁴Y chupan ri ruch'abel ri Dios ri tz'ibatel kan, nunataj ri uxlanen ri', toq nubij:*f12* Toq xapon ri ruwuq q'ij, ri Dios k'achojineq chik chubanik ronojel. Y rija' xuxlan k'a chire re samaj re', nicha'.

⁵Y chuqa' nubij:*f13* Rije' man xke'ok ta chupan ri ruwach'ulew akuchi k'o uxlanen, nicha'.

⁶Ri qati't-qamama' xkak'axaj ri utzilej ruch'abel ri Dios, jak'a man xkinimaj ta ri xkak'axaj, y roma ri' man xe'ok ta chupan ri uxlanen. Y roma ri' roj kan xya'ox q'ij chiqe chi yojtikir yojok chupan.

⁷Y k'iy k'a q'ij chikij-pe ri qati't-qamama', ri Dios xusuj chik jun bey ri uxlanen chike ri winaqi'. Y xubij chik chire ri rey David: Wi niwak'axaj wakami ri ruch'abel ri Jehová. Man k'a tikowirisaj ri iwánima, nicha'.*f14*

⁸Y ri uxlanen ri xusuj chire ri David kan niq'alajin chi man nich'on ta chirij ri uxlanen ri xokila' wawe' ri qati't-qamama' toq e k'amon-pe roma ri Josué.

⁹Y roma ri' qetaman chi k'a k'o na jun chik uxlanen kichin ri e rutinamit ri Dios, achi'el ri ruwuq q'ij toq rija' xuxlan.

¹⁰Y xabachike okineq chupan ri uxlanen ri nuya' ri Dios, nuxlan chire ri rusamaj, achi'el xuben ri Dios, toq k'achojineq chik chubanik re ruwach'ulew y ri kaj.

¹¹Kan tiqatija' k'a qaq'ij richin yojok chupan re uxlanen re' y man tiqaben achi'el xkiben ri winaqi' ojer kan, ri man xkikuquba' ta kik'u'x rik'in ri ruch'abel ri Dios.

¹²Roma ri ruch'abel ri Dios kan k'o-wi ruk'aslen, y k'o samaj nuben. Kan más rey ke chuwech ronojel espada ri k'o ka'i' rey. Roma ri ch'abel ri' nitikir napon k'a pa taq qánima, y nuq'alajirisaj-pe ri niqach'ob y ri rayibel, y napon k'a chupan ri baq y ri akuchi e tunul wi ri baq.

¹³Roma man jun k'a ri nitikir newan-ri' chuwech ri Dios, y ronojel ri k'o kan e tz'etel chuwech rija'. Y chire rija' k'o chi niqajech-wi ronojel ri yeqabanala'.

¹⁴Roj kan k'o k'a jun qanimalej sacerdote apowineq chila' chikaj ri kan xapon rik'in ri Dios, y ri' ja ri Jesús ri Ruk'ajol. Roma ri' man tiqaya' kan ruq'alajirisaxik chi qaniman.

¹⁵Ri qanimalej sacerdote kan retaman ri niqana' toq man jun quchuq'a', roma toq xk'oje' re wawe' chuwech re ruwach'ulew, rija' xtejtobex rik'in ronojel ruwech mak, achi'el yojtejtobex roj; xaxe rija' man xmakun ta.

¹⁶Roma ri' kan kuqul k'a qak'u'x qojjel-apo rik'in ri Dios ri niya'on ronojel utzil. Richin chi xtujoyowaj qawech y xtuya-pe ri rutzil pa qawi'. Y toq k'o jun xtiqak'uluwachij, kan jari' k'o-pe qik'in richin yojruto'.