Read Kaqchikel 1 Pedro 3 Bible Online

1 Pedro 3 - Kaqchikel bible

1 Pedro 3

¹Rix ixoqi' kan tinimaj k'a kitzij ri iwachijlal. Richin keri', wi rije' man kiniman ta ri ruch'abel ri Dios, stape' man jun nitzijon chike, roma ta ri ik'aslen rix xtikinimaj,

²toq xtikitz'et chi kan choj ri ik'aslen y yixniman tzij.

³Ri niwiq iwi' man ta xa ja ri niq'alajin achi'el ri wiqobel ri e banon rik'in q'anapueq, ri jebelej taq tzieq, y ri ruchojmirisaxik ri rusumal taq iwi'.

⁴Xa titija' iq'ij richin ja ta ri iwánima jebel wiqil chuwech ri Dios. Tiwiqa-iwi' rik'in ch'uch'ujil y qasanri'il, roma re wiqobel re' man xtik'is ta, y jare' ri más rejqalen chuwech ri Dios.

⁵Roma ri ojer kan, keri' chuqa' xkiwiq-ki' ri loq'olej taq ixoqi' ri xkoyobej rutzil ri Dios. Kan xkikuquba' kik'u'x rik'in y xkinimaj kitzij ri kachijilal;

⁶achi'el xuben ri Sara. Rija' kan xunimaj rutzij ri Abraham ri rachijil, y kan ajaw xcha' chire. Y rix kan xkixok achi'el ri Sara wi nik'uaj jun utzilej k'aslen, y man jun achoq chuwech xtixibij-iwi'.*f5*

⁷Y keri' chuqa' rix achi'a', kan rik'in k'a na'oj kixk'ase' kik'in ri iwixjayilal, kan ke'ipoqonaj k'a roma rije' man junan ta kuchuq'a' iwik'in. Tik'oje' chi'ik'u'x chi junan kik'in rije' xtiwichinaj ri utzilej k'aslen ri nuya' ri Dios chiwe, richin keri' ri ich'owen choj napon rik'in ri Dios.

⁸Pa ruk'isibel ninbij chiwe chi chi'iwonojel xa jun iwech tibana', kan tina' chuqa' rix ri q'axo'n ri nuna' ri iwach'alal. Tiwajowala-iwi' chi'iwach'alal. Tijoyowala' iwech y man tinimirisaj-iwi'.

⁹Y toq niban jun itzel chiwe, man tiben ruk'exel. Y toq nibix ch'abel ri janila e poqon chiwe, man tibij jun chik ch'abel keri'. Xa tik'utuj chire ri Dios chi xtrurtisaj ri wineq ri', roma ri Dios kan ix royon richin niben ri utz, y nrajo' chi rix nik'ul urtisanik.

¹⁰*f6*Roma wi niwajo' k'iy q'ij richin yixk'ase', y niq'axaj q'ij rik'in kikoten; tiq'ata' ri iwaq' chubixik ri etzelal. Y kan man jun bey k'a tel q'oloj pan ichi'.

¹¹Tijech'ej-el-iwi' rik'in ri etzelal, y tibana' ri utz. Tikanoj ri uxlanibel-k'u'x y jari' ri titzeqelibej.

¹²Ri rutzubal ri Jehová ruya'on k'a pa kiwi' ri choj kik'aslen. Rija' kan nrak'axaj ri kich'owen. Ri Jehová kan nuteq k'a pe ri royowal pa kiwi' ri man utz ta nikiben.

¹³Kan man jun wineq ri nitikir nuben itzel chiwe, wi rix kan ja ri utz ri niben.

¹⁴Y wi roma ri chojmilej ik'aslen, rix niwil poqon, jebel ruwa-iq'ij. Y roma ri' man tixibij-iwi' chikiwech ri yebanon keri' chiwe. Ni man tisach ik'u'x.

¹⁵Pa ruk'exel ri' kan tiya' ruq'ij ri Cristo ri iwajaw pa taq iwánima. Y wi k'o ta jun ri nuk'utuj chiwe ri achike roma iwoyoben ri rutzil rija', kan jantape' k'a tiq'alajirisaj chuwech rik'in ch'uch'ujil y ajowabel.

¹⁶Kan man jun bey k'a tiben ri etzelal, richin man niq'axo ri iwánima. Richin keri' xkek'ixbitej ri yemolo-pe tzij chiwij y ri yebin chi man utz ta ri ik'aslen roma iniman ri Cristo.

¹⁷Más utz natej poqon chubanik ri utz, wi keri' rurayibel ri Dios, ke chuwech ja ri etzelal naben.

¹⁸Roma ri Cristo xutej chuqa' poqon xaxe jun bey roma ri mak.stape' ri ruk'aslen rija' kan choj wi, jak'a kan xken pa ruk'exel ri itzel ruk'aslen. Y rik'in ri' yojruk'uaj chuwech ri Dios. Stape' rija' xken rik'in ri ruch'akul richin wineq, jak'a kan xk'astej rik'in ri espíritu.

¹⁹Y keri' rik'in ri espíritu xapon akuchi k'o-wi ri kánima ri winaqi' ri e kaminaqi' chik el, akuchi man yetikir ta ye'el-pe. Y chiri' xberutzijoj kan chike ri ruch'akonik.

²⁰Ja winaqi' ri' ri ojer kan man xkinimaj ta rutzij ri Dios pa ruq'ijul ri Noé, toq xuben ri nima-barco. Ri Dios janila k'iy juna' ri xuya' chike richin xeroyobej. Jak'a man jun ri xtzolin ta pe ruk'u'x xa kan xaxe e waqxaqi' winaqi' ri xe'ok chupan ri nima-barco ri' y xekolotej rik'in ya'.

²¹Y ri ya' ri' jun retal richin ri qasan-ya' ri niqak'ul wakami, ri nikolon. Jak'a man richin ta nuch'ajch'ojirisaj ri qach'akul xa kan richin nuk'ut chi roj niqajo' niqaben ri utz chuwech ri Dios roma ri ruk'astajibal ri Jesucristo.

²²Rija' xbe chila' chikaj, y wakami k'o-apo pa rijkiq'a' ri Dios. Kan pa ruq'a' k'a rija' ek'o-wi ri ángel, ri q'atoy taq tzij aj-chikajil, y ronojel ri uchuq'a' ri ek'o.