Read Kaqchikel 1 Juan 1 Bible Online

1 Juan 1 - Kaqchikel bible

1 Juan 1

¹Wach'alal, k'o k'a ka'i' oxi' ch'abel ri niqajo' niqatzijoj chiwe pa ruwi' ri ch'abel ri jari' ri k'aslen. Re' kan k'o-pe toq man jani k'o ta re ruwach'ulew. Jak'a roj kan xqak'axaj, xqatz'et rik'in ri runaq' taq qawech y kan xqachop rik'in ri qaq'a'.

²Re k'aslen re' xok'ulun-qa chiqakojol y xqatz'et. Roma ri' niqatzijoj chiwe chi kan k'o-wi-pe rik'in ri Qatata' Dios, y k'ari' xok'ulun qik'in.

³Roj kan qatzijon k'a chiwe ri xqatz'et y ri xqak'axaj, richin chi rix junan ta iwech qik'in roj y keri' rix chuqa' junan iwech rik'in ri Tata'ixel y rik'in ri Jesucristo ri Ruk'ajol, achi'el ri qabanon roj.

⁴Ronojel k'a re' niqatz'ibaj-el chiwe richin chi nitz'aqet ri qakikoten.

⁵Y wakami k'a niqatzijoj chiwe ri xubij kan ri Jesucristo chiqe roj, chi ri Dios kan saqil, y man jun q'equ'm ri k'o rik'in.

⁶Y wi niqabij chi junan chik qawech rik'in ri Dios, y xa qak'uan jun k'aslen richin ri q'equ'm, man qitzij ta k'a ri niqabij y man ja ta ri qitzij ri niqaben.

⁷Ri Dios kan k'o-wi pa saqil, y wi roj chupan re qak'aslen yojbiyin pa saqil, kan junan k'a qawech qonojel. Y chuqa' ri rukik'el ri Jesucristo ri ruk'ajol, nrelesaj ronojel ri qamak.

⁸Y wi niqabij chi man oj aj-maki' ta, qayon roj niqaq'ol-qa-qi', y ri qitzij xa maneq qik'in.

⁹Jak'a wi niqaq'alajirisaj ri qamak chuwech ri Dios, rija' kan nukuy-wi, y yojruch'ajch'ojirisaj chire ri man e choj taq banobel ta, roma rija' kan choj, y kan nuben ri nubij.

¹⁰Y wi niqabij chi man jun mak niqaben, kan niqaben chi man qitzij ta ri nubij ri Dios. Y ri ruch'abel xa man k'o ta pa taq qánima.