Read Kaqchikel 1 Juan 3 Bible Online

1 Juan 3 - Kaqchikel bible

1 Juan 3

¹Kan tich'obo' k'a jebel ri rubanik ri ajowabel ri k'o rik'in ri Tata'ixel, roma ri ajowabel ri' kan janila nim, roma kan xuben chiqe chi ruk'amon chi nibix ralk'ual chiqe y kan keri' wi. Y ri winaqi' ri k'a kikuquban na kik'u'x rik'in re ruwach'ulew man ketaman ta k'a qawech, roma rije' man ketaman ta ruwech ri Dios.

²Wach'alal ri yalan yixinwajo', wakami oj ralk'ual chik ri Dios. Jak'a man jani tiq'alajin ri achike xqojbeok. Xaxe qetaman chi toq xtipe chik jun bey ri Jesucristo, xqojok achi'el rija' roma xtiqatz'et achike rubanik rija'.

³Y ri kan kuqul ruk'u'x rik'in, ruchapon ruch'ajch'ojirisaxik ri ruk'aslen, achi'el ri Jesucristo ri kan ch'ajch'oj-wi.

⁴Konojel ri yemakun xa nikiq'ej ruwi' ri rupixa' ri Dios, roma ri mak, junan rik'in naq'ej ruwi' ri pixa'.

⁵Rix iwetaman chi ri Jesucristo xpe chuwech re ruwach'ulew, richin xukuy ri qamak stape' rija' kan man jun rumak.

⁶Y ri jun rubanon rik'in rija' ruya'on chik k'a kan rubanik ri mak. Jak'a wi xa k'a nimakun na, xa man rutz'eton ta ni man retaman ta ruwech rija'.

⁷Rix walk'ual, man k'a kixq'olotej. Wi nik'uaj jun k'aslen choj, kan ixchoj chuqa' achi'el ri Jesucristo, kan choj wi.

⁸Jak'a ri man nikiya' ta kan rubanik ri mak, xa kan e richin k'a ri Itzel-Wineq, roma rija' kan aj-mak wi pa rutikeribel-pe. Y xa roma ri' toq xok'ulun ri Ruk'ajol ri Dios, chuyojik ri rusamaj ri Itzel-Wineq.

⁹Roj ri oj ralk'ual chik ri Dios, qaya'on chik k'a kan rubanik ri mak, roma ri Dios xuya' ri ruk'aslen chiqe y xujel ri qach'obonik. Y roma ri k'aslen ri k'o qik'in roj kan rik'in ri Dios peteneq-wi, nuben k'a chiqe chi man chik yeqabanala' ta ri mak.

¹⁰Y rik'in re' niq'alajin ri achike ri e ralk'ual ri Dios y ri e ralk'ual ri Itzel-Wineq. Jak'a ri man chojmilej k'aslen ta kik'uan y man yekajo' ta ri kach'alal, man e richin ta ri Dios.

¹¹Re tijonik re' kan iwak'axan-wi-pe pa rutikeribel, chi tiqajowala-qi' chiqawech.

¹²Man tiqaben achi'el xuben ri Caín ojer kan. Rija' kan richin-wi ri Itzel-Wineq y kan xukamisaj ri Abel ri ruchaq'. ¿Y achike k'a roma xukamisaj? Roma ri rubanobal kan e itzel jak'a ri rubanobal ri Abel kan e choj.

¹³Wach'alal, wi yixetzelex koma ri winaqi' ri k'a kikuquban na kik'u'x rik'in re ruwach'ulew, man k'a tisach ik'u'x.

¹⁴Roj kan oj eleneq chik pe chupan ri kamik, richin chi xojq'ax chupan ri k'aslen. Y qetaman jebel chi keri' roma kan niqajowala-wi-qi' chiqach'alal-qi'. Jak'a ri man nikajo' ta ki', kan e kaminaqi' chuwech ri Dios.

¹⁵Y ri nretzelaj ri rach'alal xa achi'el jun kamisanel. Y rix iwetaman, chi ri kamisanel maneq ru k'aslen ri man k'isel ta.

¹⁶Rik'in re' niqatz'et ri ajowabel: Chi ri Jesucristo man xupoqonaj ta xuya-ri' pa kamik qoma roj. Keri' chuqa' roj k'o chi niqaya-qi' pa kamik, koma ri qach'alal, wi kan nik'atzin.

¹⁷Jak'a wi k'o jun ri k'o ronojel rik'in ri nik'atzin chire, y nutz'et jun rach'alal ri man jun ruway o rutziaq, y kan man nubij ta ránima richin nuto', kan niq'alajin chi man jun ajowabel richin ri Dios rik'in.

¹⁸Rix walk'ual, man k'a kixajowan xaxe rik'in ri ich'abel. Xa kan ke'ito' ri ch'aqa' chik. Y rik'in ri' kan xtiq'alajin k'a chi kan qitzij yixajowan.

¹⁹Y roma ri yojajowan, niqetamaj chi oj richin ri qitzij Dios, y kuqul qak'u'x yojk'oje' chuwech rija'.

²⁰Jak'a wi niqana' pa taq qánima chi qabanon itzel, ri Dios kan retaman-wi, roma ri ruq'atbal-tzij rija' más nim chuwech ri niqana' roj, y kan retaman ronojel.

²¹Roma ri' wach'alal ri yalan yixinwajo', wi niqana' pa taq qánima chi maneq qamak chuwech ri Dios, kan man jun k'a xibinri'il qik'in richin chi yojapon chuwech rija'.

²²Toq yojch'on rik'in ri Dios, rija' nuya' chiqe ronojel ri niqak'utuj chire, roma yeqaben ri yerubij, y chuqa' yeqaben ri yeqa' chuwech.

²³Y ri nubij rija' ja ri tiqakuquba' qak'u'x rik'in ri Jesucristo ri Ruk'ajol. Y chi tiqajowala-qi' achi'el xubij ri Cristo.

²⁴Ri yebanon ri nubij ri rupixa' ri Dios, xa kan jun chik kibanon rik'in. Y chuqa' ri Dios kan k'o chik pa kánima. Y roj qetaman chi kan k'o chik rija' pa qánima, roma k'o ri Loq'olej Espíritu ri ruya'on chiqe.