Read Kaqchikel Jue 1 Bible Online

Jue 1 - Kaqchikel bible

Jue 1

¹Chirij ri rukamik ri Josué, ri e rijatzul kan ri Israel xkik'ulubej ri Jehová y xkik'utuj k'a chire achike xkeyakatej-el nabey richin nibekibana' oyowal kik'in ri aj-Canaán.

²Y ri Jehová xubij: Ja rix tzobaj richin Judá ri xkixbe nabey; roma wakami yin xtinjech ri kulew ri aj-Canaán pan iq'a' rix, xcha'.

³Y ri tzobaj richin Judá xkibij chike ri tzobaj richin Simeón ri kach'alal-ki': Chi yekito' richin yebe chupan ri ruwach'ulew ri kan ya'on chik chike, richin nibekibana' oyowal kik'in ri aj-Canaán, y chirij re' ri tzobaj richin Judá chuqa' xkekito' ri tzobaj richin Simeón. Y keri' ri ka'i' tzobaj ri' kan xtikito-ki'.

⁴Ri tzobaj ri' xkichop k'a oyowal, y ri Jehová xerujech pa kiq'a' rije' ri winaqi' aj-Canaán y ri winaqi' ferezeo; y xekich'ek k'a e 10,000 achi'a' chiri' pa tinamit Bézec.

⁵Chiri' pa Bézec xkil ri Adonisédec, ri rey richin ri tinamit ri'; y jari' toq xkichop oyowal rik'in y xech'akatej konojel rije'.

⁶Jak'a ri Adonisédec xanimej; y ri israelita xkitzeqelibej y xkichop, y k'ari' xkitzak'ij ri nima'q rupan ruwi-ruq'a' y ri nima'q rupan ruwi-raqen.

⁷Y ri Adonisédec xubij: Nabey yin xintzak'ij ri nima'q rupan ruwi-kiq'a' y ri nima'q rupan ruwi-kaqen ri oxk'al lajuj rey, y k'ari' xinqasaj kiq'ij y xinben chike chi xkimol ri ruk'aj kaxlan-wey chuxe' ri nu-mesa. Jak'a re wakami, kan achi'el k'a ri xinben yin, keri' xuben chuwe ri i-Dios, xcha'. Y rija' chiri' k'a pa Jerusalem xuk'uex-wi y chiri' xken-wi.

⁸Ri tzobaj richin Judá e rachibilan-el ri tzobaj richin Simeón xkichop oyowal kik'in ri aj-Jerusalem y xekich'ek, y xekikamisaj chi espada konojel winaqi', y k'ari' xkiya' ruq'aq'al ri tinamit ri'.

⁹K'ari' ri ka'i' tzobaj ri' xebe chik chikij ri aj-Canaán ri ek'o-el chuwi' taq juyu', ri ek'o pa xokon y chuqa' ri ek'o pa taq'aj chuchi' ri palou.

¹⁰Chuqa' xebe chikij ri winaqi' ri aj pa tinamit Hebrón, ri chuqa' nibix Quiriat-arbá chire ojer kan; y chiri' xekikamisaj-wi ri Sesai, ri Ahimán y ri Talmai.

¹¹Chirij re' ri tzobaj richin Simeón y Judá xe'el chik k'a el chiri' richin xebe-q'anej kik'in ri aj-Debir ri chuqa' nibix Quiriat-séfer chire ojer kan.

¹²Y toq xe'apon chiri', k'o k'a jun achin chikikojol rije' rubini'an Caleb xch'on y xubij: Ri xtibanon oyowal kik'in ri aj-Quiriat-séfer y xtich'akon chirij, yin xtinya' ri numi'al Acsa chire richin nok rixjayil, xcha'.

¹³Y ri xch'akon ja ri Otoniel ruk'ajol ri Quenaz, y ri Quenaz ri' ruchaq' ri Caleb. Ri Caleb xujech k'a ri Acsa chire ri Otoniel richin xok rixjayil.

¹⁴Y toq ri Acsa xbe rik'in ri Otoniel, jari' toq ri Otoniel xutaqchi'ij ri Acsa ri rixjayil, richin tuk'utuj chik juba' ulew chire ri rutata'. Jari' ri Acsa xqaqa-pe chirij ri rubur richin xbech'on rik'in. Y toq ri rutata' xutz'et, xuk'utuj chire ri achike xuben.

¹⁵Y rija' xubij-apo chire ri rutata': Tabana' utzil taya' jun chik sipanik chuwe. Kan qitzij na wi chi asipan chik wulew ri k'o pa xokon chire ri awulew, jak'a re wakami ninwajo' richin naya' ta chik juba' wulew ri ek'o ralaxbel taq ya' chupan, xcha'. Y ri Caleb kan xuya' k'a ri ulew ri ek'o alaxibel taq ya' chupan ri k'o pa xulan y ri k'o pa jotol chire ri rulew.

¹⁶Ri e rijatzul ri Jetro, rujinan ri Moisés, xe'el-el chupan ri Tinamit Richin Palmera ri chuqa' nibix Jericó chire, y xebe chikij ri e rijatzul ri Judá pa tz'iran ruwach'ulew ri k'o pa xokon, ri k'o chunaqaj ri tinamit Arad, y xebek'oje' k'a chiri' pan Arad, chikikojol ri aj chiri'.

¹⁷Jak'a ri tzobaj richin Judá kachibilan-ki' kik'in ri tzobaj richin Simeón xebe y xekich'ek ri aj-Canaán ri ek'o pa tinamit Sefat, y kan xkik'is jumul ri tinamit; y xkijel k'a ri rubi' y xkibij Hormá chire.*f1*

¹⁸Chuqa' xkich'ek ri tinamit Gaza, ri Ascalón, ri Ecrón y chuqa' ri winaqi' ri ek'o pa taq'aj ri ek'o chuchi' ri palou; jak'a man xetikir ta xekoqotaj-el chiri', roma ri aj chiri' kan k'o ki-carruaje ri banon rik'in ch'ich'. Jak'a ri Jehová kan k'o-wi kik'in ri tzobaj richin Judá; y roma ri' xetikir xekich'ek ri tinamit ri ek'o chuwi' taq juyu'.

²⁰Ri tinamit Hebrón kan xya'ox chire ri Caleb, achi'el ri rubin kan ri Moisés; k'ari' ri Caleb xeroqotaj-pe chiri' ri e oxi' tzobaj winaqi' ri e rijatzul kan ri achin rubini'an Anac.

²¹Jak'a ri tzobaj richin ri Benjamín man xekoqotaj ta pe ri e rijatzul ri Jebús ri ek'o pa Jerusalem. Y roma ri' ri tzobaj richin ri Benjamín y ri tzobaj richin Jebús xek'oje-qa junan ri chiri'.

²²Chuqa' ri e ka'i' tzobaj ri e rijatzul kan ri José xkichop nikiben oyowal rik'in ri tinamit Betel; y ri Jehová kan k'o-wi kik'in rije' richin yech'akon.

²³Pa nabey, rije' xekiteq k'a el nachanela' pa tinamit Betel, re tinamit re' ojer kan rubini'an Luz.

²⁴Y ri nachanela' xkitz'et k'a chi k'o jun achin ri xel-pe ri chiri' pa tinamit, y roma ri' rije' xkik'utuj k'a chire: Tabij chiqe, ¿k'o kami jun chik okibel richin chi yojok chupan re tinamit re', ri awetaman rat?, y wi xtak'ut chiqawech, roj xtiqajoyowaj k'a awech y man xkatqakamisaj ta, xecha' chire.

²⁵Y ri achin ri' xuk'ut k'a chikiwech jun chik okibel richin ri tinamit. Y toq ri e rijatzul kan ri José xe'ok chupan ri tinamit, kan xekikamisaj k'a chi espada konojel ri winaqi'; jak'a ri achin ri xbin chike, xkiya-el q'ij chire richin xel-el chupan ri tinamit ri'; rija' y konojel ri e aj pa rachoch.

²⁶Re achin re' xbe pa kiruwach'ulew ri winaqi' heteo, y chiri' xupaba-q'anej jun tinamit ri xubini'aj chuqa' Luz.

²⁷Jak'a ri nik'aj tzobaj richin ri Manasés man xekoqotaj ta el ri winaqi' ri ek'o pa tinamit Bet-seán, pa Taanac, pa Dor, pan Ibleam, pa Meguido, ni ri ek'o pa kokoj taq kitinamit; y roma ri' ri winaqi' aj chiri' kan k'a xek'oje' na chikikojol.

²⁸Jak'a ri tzobaj richin ri Manasés, toq xkina' chi k'o chik kuchuq'a', jari' toq xkiben chike ri aj-Canaán richin xe'ok kisamajela' y xeyuqe' pa samaj kik'in, y man xekoqotaj ta pe chikikojol.

²⁹Chuqa' ri tzobaj richin ri Efraín man xekoqotaj ta pe ri aj-Canaán ri ek'o pa tinamit Guézer; y roma ri' ri winaqi' aj-Canaán xa kan k'a xek'oje' na kan chiri' chikikojol.

³⁰Chuqa' ri tzobaj richin ri Zabulón man xekoqotaj ta pe ri aj-Canaán ri ek'o pa tinamit Quitrón y ri Nahalal. Keri' ri winaqi' xek'oje' k'a chiri' chikikojol, y xeyuqe' pa samaj kik'in.

³¹Ri tzobaj richin ri Aser keri' chuqa' ri xkiben: Man xekoqotaj ta pe ri winaqi' ri ek'o pa tinamit Aco, pa Sidón, pan Ahlab, pan Aczib, pan Helbá, pan Afec y ni ri ek'o pa Rehob.

³²Roma ri' ri tzobaj richin ri Aser xek'oje' junan kik'in ri aj-Canaán roma man xekoqotaj ta pe.

³³Chuqa' ri tzobaj richin ri Neftalí man xekoqotaj ta el ri winaqi' ri ek'o chiri' pa tinamit Bet-semes y Bet-anat; y roma ri' ri winaqi' ri' xek'oje-qa chikikojol, y rije' xkiben chike ri aj chiri' chi xe'ok samajela' ri xeyuqe' pa samaj kik'in.

³⁴Ri tzobaj richin ri Dan k'o chi xek'oje' kan chuwi' taq juyu', roma ri winaqi' amorreo man xkiya' ta q'ij chike richin xkichop ta ri taq'aj.

³⁵Ri winaqi' ri' kan xek'oje' k'a chiri' pa juyu' Heres, pa taq tinamit Aialón y Saalbim; jak'a toq ri e rijatzul kan ri José xk'oje' kuchuq'a', xkiben chike ri winaqi' ri' richin xe'ok samajela' ri xeyuqe' pa samaj kik'in.

³⁶Y ri ruk'ulba't ri kiruwach'ulew ri winaqi' amorreo nitiker-el pa ruwa taq juyu' Acrabim, akuchi k'o-wi ri tinamit Selá, y nibe pa jotol.