Read Kaqchikel Jue 10 Bible Online

Jue 10 - Kaqchikel bible

Jue 10

¹Chirij k'a ri rukamik ri Abimélec, xbeyakatej-pe jun achin rubini'an Tolá richin xukol ri tinamit Israel. Y re Tolá re' ruk'ajol ri Puá, y rumam ri achin rubini'an Dodó. Y rija' peteneq k'a chupan ri tzobaj richin Isacar y k'o chupan ri tinamit rubini'an Samir ri k'o chuwi' taq juyu' richin ri ruwach'ulew Efraín.

²Rija' xq'aton-tzij pa ruwi' ri tinamit Israel juwineq oxi' juna', y toq xken, xmuq pa tinamit Samir.

³Chirij rija' ja chik ri jun achin rubini'an Jaír ri xkolon ri tinamit Israel, y juwineq ka'i' juna' xq'aton-tzij pa ruwi'. Y rija' aj chuwi' taq juyu' richin Galaad.

⁴Re achin re' xek'oje' e juwineq lajuj ruk'ajol, y chikijujunal rije' k'o jujun kibur richin yech'oke' chirij. Chuqa' chikijujunal rije' k'o jujun kitinamit pa ruwach'ulew Galaad, y ronojel ri tinamit ri' nibix tinamit richin Jaír chire.

⁵Y ri Jaír xken k'a y xmuq pa tinamit Camón.

⁶Jak'a ri israelita xa xkichop chik rubanik itzel taq banobel chuwech ri Jehová, y xekisamajij ri dios Baal y ri Astarté, y chuqa' ri ki-dios ri aj-Siria, ri aj-Sidón, ri aj-Moab, ri aj-Amón y ri aj-Filistea. Rije' xa xkimalij kan ri Jehová y man xkisamajij ta chik.

⁷Y xyakatej k'a janila royowal ri Jehová pa kiwi' ri israelita, y roma ri' xerujech pa kiq'a' ri aj-Filistea, y ri aj-Amón.

⁸Y re winaqi' re' waqxaqlajuj juna' xekiya' pa tijoj-poqonal ri israelita ri ek'o pa ruwach'ulew Galaad ri k'o pa relebel-q'ij chire ri raqen-ya' Jordán, ri nibix chuqa' ruwach'ulew kichin ri amorreo chire.

⁹Y ri amonita chuqa' xkiq'axaj-apo ri raqen-ya' Jordán richin nibekibana' oyowal kik'in ri tzobaj richin Judá, ri Benjamín y ri Efraín. Kan janila k'a xekiya' pa tijoj-poqonal ri tinamit Israel.

¹⁰K'ari' ri israelita xesik'in chire ri Jehová y xkibij: Roj kan oj makuwineq chawech, roma at qamalin kan y e qasamajin ch'aqa' chik dios, xecha'.

¹¹Y ri Jehová xubij chike ri israelita: Rix xixk'oje' pa tijoj-poqonal ojer kan koma ri winaqi' aj-Egipto, koma ri amorreo, ri amonita, ri aj-Filistea,

¹²ri aj-Sidón, ri e rijatzul ri Amalec y koma ri aj-Madián. Toq rix xixsik'in chuwe, yin kan xixinkol pa kiq'a' re winaqi' re'.

¹³Jak'a rix xa xinimalij kan, y xe'isamajij ri ch'aqa' chik dios. Roma ri' yin man xkixinkol ta chik.

¹⁴Kixbiyin y kixch'on kik'in ri i-dios ri xe'icha'; ja rije' xkekolon iwichin chupan ri tijoj-poqonal, xcha' chike.

¹⁵Jak'a rije' xkik'utuj utzil chire ri Jehová y xkibij: Roj kan oj makuwineq-wi chawech. Wakami k'a tabana' qik'in ri achike niqa' chawech rat; xaxe niqak'utuj utzil chawe richin qojakolo' chupan re q'ij re', xecha'.

¹⁶Y rije' kan man xekisamajij ta chik ri dios ri ek'o chikikojol, y xkiya' ruq'ij ri Jehová. Y rija' xq'axon ránima roma ri ruk'ayewal ri nikiq'axaj ri rutinamit.

¹⁷Toq xbanatej yan ri', ri amonita xkimol k'a ki', y xebek'oje' chuwech ri ruwach'ulew Galaad. Keri' chuqa' ri israelita xkimol k'a ki' y xebek'oje' chikinaqaj rije', chunaqaj ri akuchi ek'o-wi ri chajinela'.

¹⁸Y ri e tata'al y konojel ri winaqi' e richin Galaad nikibila' chikiwech: ¿Achike chiqe roj xtitikeriban-q'anej ri oyowal kik'in ri amonita? Ri xtitikeriban-q'anej, jari' ri xtok aj-raqen pa qawi' qonojel roj aj-Galaad, xecha'.