Read Kaqchikel Jue 11 Bible Online

Jue 11 - Kaqchikel bible

Jue 11

¹K'o k'a jun achin rubini'an Jefté; rija' jun achin ri maneq xibinri'il chuwech y kan richin labal. Rija' ral jun ixoq ri itzel ruk'aslen y ri rutata' jun aj-Galaad.

²Ri rutata' xek'oje' chuqa' e k'iy ralk'ual rik'in ri rixjayil ri kan k'ulan rik'in. Y toq xenimer-q'anej, re alk'ualaxela' re' xkelesaj-el ri Jefté chikikojol, y xkibij chire: Roma rat xa at ral chik jun ixoq, man xkatichinan ta kan pa rachoch ri qatata', xecha' chire.

³Xanimej k'a el ri Jefté chikiwech ri rach'alal y xbek'oje' pa ruwach'ulew Tob. Y chiri' xkimol-apo-ki' rik'in ri achi'a' e q'ori'. Xkiben chire chi xok jun aj-raqen chikikojol rije', y xkitzeqelibej richin yebe'eleq'.

⁴Y xapon k'a ri q'ij toq ri amonita xkichop oyowal kik'in ri israelita.

⁵Jari' toq ri achi'a' ri k'o kiq'ij richin ri ruwach'ulew Galaad xebe chuk'amik ri Jefté pa ruwach'ulew Tob,

⁶y xkibij chire: Jo' qik'in y xkatok aj-raqen pa qawi' richin nibeqabana' labal kik'in ri amonita, xecha' chire.

⁷Ri Jefté xubij chike: Rix xiniwetzelaj-pe y xiniwelesaj-pe pa rachoch ri nata'; ¿Achike roma k'ari' xinoqaqa-pe chi'ik'u'x, k'a toq ixk'o na pa tijoj-poqonal k'ari' xixpe wik'in?, xcha'.

⁸Y ri achi'a' ri' xkibij chire: Kan roma ri' toq yatqakanoj, richin chi junan nibeqabana' oyowal kik'in ri winaqi' amonita y xkatok k'a jun aj-raqen pa qawi' qonojel ri ojk'o pa Galaad, xecha'.

⁹Xeri' ri Jefté xubij chik chike: Wakami k'a, wi yitzolej iwik'in richin junan nibeqabana' oyowal kik'in ri winaqi' amonita, y wi ri Jehová xkerujech pa nuq'a', ¿kan xkinok kami aj-raqen pan iwi'?, xcha'.

¹⁰Y ri achi'a' ri' xkibij chire: Ri Jehová xrak'axaj yan ronojel ri xabij. Kan xtiqaben k'a ri achike xabij rat chiqe, xecha'.

¹¹Jari' ri Jefté xpe kik'in ri achi'a' ri k'o kiq'ij richin Galaad, y xukamuluj rubixik chuwech ri Jehová chiri' chunaqaj ri Mispá, ronojel ri ruch'abel ri rubin-pe chike rije'. Y ri winaqi' e richin ri ruwach'ulew ri' xkiben chi xok aj-raqen pa ruwi' ri tinamit, y chuqa' pa kiwi' ri aj-labal.

¹²Ri Jefté kan jari' xeruteq achi'a' e uk'uey rutzijol rik'in ri rey kichin ri winaqi' amonita y xubij-el: ¿Achike roma rat xape wawe' y nawajo' naben oyowal wik'in yin y kik'in ri nuwinaq re ojk'o chuwech re ruwach'ulew re'?, xcha-el.

¹³Y ri rey kichin ri amonita xubij-pe chike ri e uk'uey rutzijol: Kere' nubanon roma toq ri iwati't-imama' xe'el-pe pan Egipto, kimajon kan ri qaruwach'ulew ri nitiker-el pa raqen-ya' Arnón y napon pa xaman k'a pa raqen-ya' Jaboc, y nitiker chik el pa relebel-q'ij chire ri Jaboc y napon k'a pa raqen-ya' Jordán. Wakami k'a, chi utzil tuya' kan, xcha'.

¹⁴Y ri Jefté xeruteq chik el ri e uk'uey rutzijol, rik'in ri rey kichin ri winaqi' amonita,

¹⁵y xbekibij chire: Ri Jefté kere' nubij-pe: Roj ri oj israelita kan man jun ruwach'ulew kichin ri aj-Moab, ni ta ri iwichin rix ri ix rijatzul ri Amón ri qamajon ta kan.

¹⁶Roma toq ri qati't-qamama' xe'el-pe pan Egipto, xkiq'axaj ri tz'iran ruwach'ulew ri napon rik'in ri Kaqa-Palou, y xe'apon k'a pa tinamit Cadés.

¹⁷Jari' toq xekiteq achi'a' ri e uk'uey rutzijol rik'in ri rey richin Edom, y xkibij chire: Niqak'utuj utzil chawe richin naya' ta q'ij chiqe richin yojq'ax pa iruwach'ulew, xecha' chire. Jak'a ri rey ri' xa xuben richin man xniman ta chike. Chuqa' xkiteq rutzijol chire ri Balac rey richin Moab, y chuqa' rija' man xrajo' ta; y roma ri' ri qati't-qamama' xek'oje-qa chiri' pa Cadés.

¹⁸Chirij re' ri qati't-qamama' xebiyin pa tz'iran ruwach'ulew y xkisutij-rij ri ruwach'ulew Edom y chuqa' ri ruwach'ulew Moab. Xepe keri' pa relebel-q'ij chire ri Moab, y xek'oje-qa ri pa xokon chire ri raqen-ya' Arnón, y man xe'ok ta apo pa ruwach'ulew Moab; roma ri Arnón jari' ri k'ulba't richin ri Moab.

¹⁹Keri' chuqa' xekiteq achi'a' ri e uk'uey rutzijol, rik'in ri Sihón rey kichin ri amorreo, ri k'o pa tinamit Hesbón, y kere' k'a xbix-el chire: Niqak'utuj utzil chawe richin naya' ta q'ij chiqe richin yojq'ax pan iruwach'ulew, richin yojapon chupan ri qaruwach'ulew roj, xecha' chire.

²⁰Jak'a ri Sihón man xukuquba' ta ruk'u'x kik'in ri qawinaq israelita richin xuya' ta q'ij chike richin xeq'ax ta el chupan ri kiruwach'ulew. Xa xerumol k'a konojel aj-labal, y xebek'oje' pa tinamit Jahas, richin xkiben oyowal kik'in ri qati't-qamama'.

²¹Y ri Jehová ri qa-Dios xujech ri Sihón y konojel ri ruwinaq pa kiq'a' rije', y roma ri' xekich'ek. Keri' toq xok qichin ri ruwach'ulew kichin ri amorreo chupan ri q'ij ri'.

²²Kan xok k'a kan qichin roj ri ruwach'ulew kichin ri winaqi' amorreo ri nitiker-el rik'in ri raqen-ya' Arnón y napon k'a pa raqen-ya' Jaboc, y ri nitiker chik el pa tz'iran ruwach'ulew y napon k'a pa raqen-ya' Jordán.

²³Ri Jehová ri qa-Dios, xrelesaj k'a kan ri kiruwach'ulew ri winaqi' amorreo richin xujech pa qaq'a' roj. Y wakami rat kan nawajo' nawelesaj chik kan chiqe richin nok kan awichin.

²⁴Wi ta ri a-dios Quemós k'o ta nujech chawe, ¿kan man nok ta kami awichin rat? Keri' ronojel k'a ri xuya' kan ri Jehová ri qa-Dios chiqe jari' ri xok qichin roj.

²⁵¿Más ta k'a awuchuq'a' rat chuwech ri rey Balac, ri ruk'ajol ri Sipor? ¿Xtikir kami rija' xuben oyowal kik'in ri qati't-qamama'?

²⁶Roj ri oj israelita ojk'o yan pe 300 juna' chiri' pa tinamit Hesbón y Aroer, y chupan ri kokoj taq tinamit ri ek'o chikinaqaj, y ronojel ri taq tinamit ri ek'o chuchi' ri raqen-ya' Arnón. ¿Achike roma man iwelesan ta chiqe chupan ri 300 juna' ri'?

²⁷Keri' yin kan man jun nubanon chawe, jak'a rat xa nawajo' naben oyowal wik'in. Ri Jehová ri kan chojmirisey richin ri nibanatej; ja rija' ri xtiq'aton-tzij pa qawi' roj israelita y rix ri ix rijatzul ri Amón, nicha' ri Jefté, xecha' ri e uk'uey rutzijol.

²⁸Jak'a ri rey kichin ri winaqi' amonita, kan man xniman ta chire ri ch'abel ri xuteq rubixik ri Jefté.

²⁹Y ri Espíritu richin ri Jehová xpe rik'in ri Jefté richin nuya' ruchuq'a', y rija' xbe k'a chupan chijun ri ruwach'ulew Galaad y chuqa' ri kiruwach'ulew ri tzobaj richin Manasés, y xapon pa Mispá richin Galaad, chikinaqaj ri winaqi' amonita.

³⁰K'ari' ri Jefté k'o jun xusuj chire ri Jehová y xubij: Wi xke'ajech ri winaqi' amonita pa nuq'a',

³¹kan xtok awichin rat Jehová ri nabey ri xtel-pe chuchi' ri wachoch richin xkiruk'ul, toq yin xkitzolej rik'in ch'akonik chupan re oyowal re' y jari' ri xtinsuj richin ninporoj jumul chawech, xcha'.

³²Y ri Jefté kan xbe k'a richin xberubana' oyowal kik'in ri winaqi' amonita, y ri Jehová kan xerujech pa ruq'a'.

³³Xtikir k'a el ri oyowal chiri' pan Aroer k'a pa tinamit Minit, y xapon k'a pa taq'aj Abel-queramim; y kan xeruk'is k'a konojel. Y ri kajlabal ri tinamit ri xeruch'ek e kawineq chi konojel. Y ri winaqi' amonita xek'oje' k'a pa kiq'a' ri israelita.

³⁴Y toq ri Jefté xtzolej chirachoch chiri' pa Mispá, jari' toq xbe'el-pe ri juney rumi'al richin nuk'ul-apo, y ruk'uan ri ru-pandereta pa ruq'a' y nitzopiyaj rik'in. Y kan xaxe k'a ok jun rumi'al ri k'o; kan man jun chik rumi'al ni ruk'ajol k'o.

³⁵Y toq rija' xutz'et ri rumi'al, kan xuretz ri rutziaq chirij y xubij: ¡Numi'al yin, kan qitzij chi wakami xinaya' pa k'ayew! Kan ja chik k'a rat ri xatel-pe richin naya' re q'axo'n re' chuwe, roma yin kan k'o nusujun chire ri Jehová y man yitikir ta chik nintzolij-wi' chuwij, xcha'.

³⁶K'ari' ri rumi'al xubij: Nata' yin, wi ja yin ri in sipanik, tabana' k'a wik'in achi'el ri xasuj, roma ri Jehová kan xerujech pan aq'a' ri winaqi' amonita ri e etzelanel qichin.

³⁷Xaxe nink'utuj chawe chi naya' ta q'ij chuwe richin yibe ka'i' ik' pa taq juyu' richin yibe'oq' junan kik'in ri wachibil, roma man jun bey xkik'ule' y yibeken yan, xcha'.

³⁸Y ri Jefté xubij chire: Kabiyin k'a numi'al, xcha' chire. Y xuya' k'a el q'ij chire richin xbe ka'i' ik' kik'in ri rachibil, y xe'oq' k'a roma man xk'ule' ta ri xten ri'.

³⁹Toq xtz'aqet k'a ri ka'i' ik' xtzolej rik'in ri rutata', y ri rutata' kan xuben k'a, achi'el ri rubin chi nuben chuwech ri Jehová. Y re xten re' kan man jun bey xk'oje' ta rik'in achin.

⁴⁰Y re jun banobel re' xk'oje' kan chikikojol ri israelita; chi kan ronojel juna' ri xtani' ye'el-el kaji' q'ij richin nikoq'ej ri rumi'al ri Jefté.