Read Kaqchikel Jue 12 Bible Online

Jue 12 - Kaqchikel bible

Jue 12

¹Ri achi'a' ri e richin ri tzobaj Efraín xkimol k'a ki', y xeq'ax-apo pa relebel-q'ij chire ri raqen-ya' Jordán y xe'apon k'a pa tinamit Safón y xkibij k'a chire ri Jefté: ¿Achike roma xabebana' oyowal kik'in ri winaqi' amonita y man xojawoyoj ta el richin chi xojbe ta chawij? Roma ri' wakami roj kan xtiqaporoj ri awachoch pan awi', xecha' chire.

²Y ri Jefté xubij chike: Yin y ri nuwinaq kan k'o-wi oyowalen chiqakojol kik'in ri winaqi' amonita. Roma ri' yin kan xixinwoyoj richin xinito' ta, jak'a xa man xixpe ta.

³Xintz'et k'a yin chi xa man niwajo' ta yinito', yin kan xinya' k'a wi' chuwi kamik, y xojq'ax-apo kik'in ri e etzelanel qichin richin xbeqabana' oyowal, y ri Jehová kan xerujech k'a pa nuq'a'. ¿Achike k'a roma rix ix peteneq re wakami richin niben oyowal wik'in?, xcha'.

⁴Ri tzobaj richin Efraín kibin k'a chike ri aj-Galaad re ch'abel re': Rix xa ix animajineq-pe chupan ri qatzobaj, y xixpe wawe' chupan re ruwach'ulew richin Manasés, e chayineq. Roma ri' ri Jefté xerumol konojel achi'a' ri e richin Galaad, y xuben oyowal kik'in ri tzobaj richin Efraín y kan xeruch'ek k'a.

⁵Y ri aj-Galaad xebek'oje' k'a ri chuchi' ri raqen-ya' Jordán ri akuchi xax rupan ri ya', richin nikitz'apej ri kibey ri aj-Efraín ri xe'animej. Y toq k'o jun chike rije' ri animajineq-el y nrajo' niq'ax-apo chupan ri bey ri', ri aj-Galaad nikik'utuj chire ri wineq ri' wi rija' richin ri tzobaj richin Efraín. Y wi rija' nubij chi ni,

⁶jari' toq nikibij chire chi tubij xibolet. Y wi ri wineq ri' xa nubij sibolet, jari' toq ri aj-Galaad nikinabej chi xa man kiwinaq ta, roma man nitikir ta nubij ri achike rubixik, roma man ja ta ri' ri kich'abel ri tzobaj richin Efraín. Y roma ri' nikichop y nikikamisaj chiri' chuchi' ri raqen-ya' Jordán. Y keri' xeken k'a e 42,000 achi'a' chupan ri oyowal ri'.

⁷Ri Jefté xq'aton-tzij pa kiwi' ri israelita waqi' juna', y toq xken xmuq chupan jun chike ri tinamit richin ri ruwach'ulew Galaad.

⁸Chirij ri Jefté, ri xq'aton kan tzij pa kiwi' ri israelita ja ri jun achin rubini'an Ibsán, aj-Belén.

⁹Re achin re' xek'oje' e juwineq lajuj ruk'ajol y e juwineq lajuj rumi'al, y xeruk'uluba' kik'in winaqi' ri man e kiwinaq ta. Rija' xq'aton-tzij pa kiwi' ri israelita wuqu' juna',

¹⁰y toq xken, xkimuq pa tinamit Belén.

¹¹Chirij rija' xq'aton kan tzij pa kiwi' ri israelita ri achin rubini'an Elón, ri peteneq chupan ri tzobaj richin Zabulón. Rija' xq'aton-tzij lajuj juna'.

¹²Y toq xken, xkimuq chupan ri tinamit rubini'an Aialón, ri k'o chupan ri ruwach'ulew richin Zabulón.

¹³Chirij ri Elón, ri xq'aton kan tzij pa kiwi' ri israelita ja ri Abdón, ruk'ajol ri Hilel, aj-Piratón.

¹⁴Re achin re' xek'oje' kawineq ruk'ajol y e juwineq lajuj rumam, y chikijujunal rije' yech'oke' chirij jujun bur, ri Abdón xq'aton k'a tzij waqxaqi' juna'.

¹⁵Y xken k'a y xkimuq pa tinamit Piratón ri k'o pa ruwach'ulew richin ri tzobaj Efraín, chiri' chuwi' taq juyu' ri kichinan kan ri winaqi' amalecita.