Read Kaqchikel Jue 13 Bible Online

Jue 13 - Kaqchikel bible

Jue 13

¹Ri israelita xa kan xkichop chik k'a rubanik ri itzel taq banobel chuwech ri Jehová; y roma ri' xek'oje' pa kiq'a' ri aj-Filistea kawineq juna'.

²Y chikikojol ri tzobaj richin ri Dan k'o k'a jun achin rubini'an Manoa, ri k'o chiri' pa tinamit Sorá, y ri rixjayil rija', man alanel ta.

³Y ri ángel richin ri Jehová xuk'ut-ri' chuwech ri ixoq ri', y xubij chire: Rat man at alanel ta; jak'a re wakami xkabeyawej y xtik'oje' jun ti awal.

⁴Wakami k'a, man taqum vino ni man jun ri ch'amirisan, ni man tatej ri xabachike ri man e ch'ajch'oj ta.

⁵Wakami k'a, xtipe alanik chawij y xtik'oje' jun ti awal. Ri ak'ual ri' man xtabesokaj ta rusumal-ruwi', roma kan pa rusanti'il ch'aron-pe chire ri Dios, richin kan ja rija' xtikolon kichin ri awinaq israelita, pa kiq'a' ri aj-Filistea, xcha'.

⁶Re ixoq re' xberutzijoj chire ri rachijil y xubij chire: Jun achin richin ri Dios xpe wik'in, y ri rubanik achi'el jun ángel, y kan nak'en rukiy; jak'a yin man xink'utuj ta chire akuchi peteneq-wi, ni ta rija' xubij ri rubi' chuwe.

⁷Y kere' k'a xubij ri achin chuwe: Wakami xtipe alanik chawij y xtibe'alex jun ti awal; roma ri' re wakami man xtaqum ta vino, ni man jun ri ch'amirisan, ni man tatej xabachike ri man e ch'ajch'oj ta, roma re ak'ual re' kan k'a pa rusanti'il nuch'aron chuwe yin chijun ruk'aslen k'a toq xtiken na. Keri' xubij chuwe, xcha' chire ri rachijil.

⁸Jari' toq ri Manoa xch'on rik'in ri Jehová y xubij: Wajaw, yin nink'utuj utzil chawe richin tataqa' chik pe jun bey ri achin qik'in, richin nubij chiqe ri achike ruk'amon niqaben rik'in ri ak'ual ri xtibe'alex, xcha'.

⁹Y ri Dios xrak'axaj ri ruch'abel ri Manoa; y ri achin ri achi'el jun ángel xuk'ut chik ri' jun bey chuwech ri ixoq, toq rija' k'o ruyon pa juyu'.

¹⁰Y ri ixoq ri' xbe k'a chi'anin richin xberubij chire ri rachijil, y xubij chire: Tatz'eta', xpe chik ri achin ri xuk'ut-ri' chinuwech ri jun bey kan, xcha'.

¹¹Ri Manoa kan xutzeqelibej k'a el ri rixjayil y xapon k'a rik'in ri achin y xuk'utuj chire: ¿Ja rat ri xach'on rik'in ri wixjayil?, xcha' chire. Y rija' xubij: Ja'; ja yin ri', xcha'.

¹²Jari' toq ri Manoa xubij: Toq xtibanatej ri xabij, ¿achike rubanik richin nik'ase' ri ak'ual, y achike k'atzinel niqaben roj rik'in?, xcha'.

¹³Y ri ángel richin ri Jehová xubij chire ri Manoa: Ri awixjayil k'o chi nuchajij-ri' chire ronojel ri xinbij chire.

¹⁴Man jun tutej chire ri ruwech uva, ni man tuqum vino, ni man jun ri ch'amirisan; y man tutej ri xabachike ri man ch'ajch'oj ta. Kan tubana' k'a ronojel ri xinbij chire, xcha'.

¹⁵Y man retaman ta ri Manoa chi ri achin ri', kan ja ri ángel richin ri Jehová. K'ari' xubij chire ri ángel: Nink'utuj utzil chawe richin man jani na yabe, roma niqajo' niqakamisaj jun ti tzuntzun richin niqachaq'arisaj y niqaya' chawe, xcha'. Y ri ángel xubij chire ri Manoa: Stape' xkik'oje-qa, man xtintej ta ri xtaya' chuwe; jak'a wi rat k'o rayibel pan awánima, taporoj jun chikop richin nasuj chire ri Jehová, xcha'.

¹⁷Xeri' ri Manoa xuk'utuj chire ri ángel: ¿Achike k'a abi' rat, richin keri' toq xtibanatej ri xabij, roj kan xqojmatioxin chawe y xtiqaya' aq'ij?, xcha'.

¹⁸Y ri ángel richin ri Jehová xubij: ¿Achike roma nak'utuj ri nubi' ri xa kan ewatel chikiwech ri winaqi'?, xcha'.

¹⁹Jari' toq ri Manoa xberuk'ama-pe ri ti tzuntzun y chuqa' jun sipanik rik'in jalajoj ruwech ixin, y re' xerusuj chuwech ri Jehová pa ruwi' jun nimalej abej. Y ri ángel xuben jun banobel ri man jun bey kitz'eton rije'.

²⁰Xbanatej k'a, chi toq ri ruxaq-q'aq' nel-el pa ruwi' ri abej y nijote' chikaj, jari' toq ri ángel richin ri Jehová xbe chupan ri ruxaq-q'aq' y xbe chikaj chikiwech ri Manoa y ri rixjayil, y rije' kan xkiqasaj k'a ki' k'a pan ulew.

²¹Y jari' toq xunabej ri Manoa chi ri achin ri' kan ja ri ángel richin ri Jehová. Y ri ángel ri' man jun bey chik xuk'ut-ri' chikiwech.

²²Y ri Manoa xubij chire ri rixjayil: Kan qitzij ninbij chawe chi xa xqojken, roma kan xqatz'et ri Dios, xcha'.

²³Jak'a ri rixjayil xubij chire: Wi ta ri Jehová nrajo' nrelesaj qak'aslen, man ta xuk'ul ri poron chikop y ri sipanik ri xqasuj chire, ni man ta xuk'ut chiqawech ronojel ri nimalej banobel, y man ta xuya' re jun rutzijol re' chiqe, xcha'.

²⁴Y xapon k'a ri q'ij toq xalex ri ti ak'ual y Sansón ri xubini'aj. Y ri ak'ual xk'iy-q'anej, y ri Jehová xuya' urtisanik pa ruwi'.

²⁵Y k'o k'a jun q'ij, toq ri Sansón k'o k'a chiri' ri akuchi kimolon-wi-ki' ri tzobaj richin Dan, ri k'o chikikojol ri tinamit Sorá y ri Estaol, jari' toq ri ru-Espíritu ri Jehová xuchop nuya' ruchuq'a' rija'.