Read Kaqchikel Jue 14 Bible Online

Jue 14 - Kaqchikel bible

Jue 14

¹K'o k'a jun q'ij ri Sansón xbe-qa pa tinamit Timná, y chiri' xutz'et k'a jun xten kalk'ual ri aj-Filistea.

²Toq xtzolej-pe chirachoch, kere' k'a xberubij chike ri rute-rutata': Yin xintz'et kan jun xten pa Timná, kalk'ual ri aj-Filistea; nink'utuj utzil chiwe richin nik'utuj ta richin nok wixjayil, xcha'.

³Ri rute-rutata' xkibij chire: ¿Maneq ta k'a xtani' chikikojol ri qawinaq roj, richin nabek'ama-pe jun xten chikikojol ri winaqi' aj-Filistea ri xa man nikiya' ta ruq'ij ri qa-Dios roj?, xecha' chire. Jak'a ri Sansón xubij chike: Ja xten ri' ri niqa' chinuwech yin, y jari' ri xtik'utuj richin nok wixjayil, xcha'.

⁴Jak'a ri rute-rutata' ri Sansón man ketaman ta chi ronojel re' kan rik'in ri Jehová peteneq-wi, roma ri Dios nrajo' chi k'o ta jun ri niyakatej richin nuben oyowal kik'in ri aj-Filistea; roma ri q'ij ri' ja ri aj-Filistea ri ek'o pa kiwi' ri israelita.

⁵Ri Sansón y ri rute-rutata' xebe-qa pa Timná, y xe'apon ri akuchi tikon-wi uva ri chiri' pa Timná. Chiri' xbe'el k'a pe jun nima-alaj koj y xuk'eq-ri' chirij ri Sansón.

⁶Y jari' toq ri Espíritu richin ri Jehová xuya' ruchuq'a' ri Sansón, y rik'in k'a ri ruq'a' xukamisaj ri koj achi'el nikamisex jun ti tzuntzun; y man xuq'alajirisaj ta chikiwech ri rute-rutata' ri xuben.

⁷Xapon k'a pa Timná, y xch'on rik'in ri xten; y ri Sansón kan utz xutz'et ri xten ri'.

⁸Toq xq'ax yan k'a k'iy q'ij, ri Sansón e rachibilan-el ri rute-rutata', xbe chik chiri' pa Timná richin nibek'ule' rik'in ri xten. Y ri Sansón xuch'er kan ri' ruyon chire ri bey, richin xberutz'eta' kan ri ruch'akul ri koj ri rukamisan kan. Y xutz'et k'a chi chukojol ri wokowik rubaqil ri koj k'o jun tzobaj xuruy y kan nojineq k'a rik'in kab.

⁹Y xrelesaj-el juba' chire ri kab ri' y jari' nutej beneq pa bey; y toq xeberuq'i' ri rute-rutata', xuya' chuqa' chike richin nikitej; y man xuq'alajirisaj ta k'a chikiwech chi ri kab ri' xa chupan ruch'akul jun kamineq koj relesan-wi.

¹⁰Toq ek'o chik chiri' pa Timná, ri Sansón y ri rutata' xebe-apo ri akuchi k'o-wi ri xten, y ri Sansón xuben jun nimaq'ij kik'in; roma kan keri' nikiben ri alaboni' chiri'.

¹¹Y toq ri aj-Timná xkitz'et ri Sansón, xekicha' e juwineq lajuj alaboni' chikikojol rije' richin yerachibilaj ri Sansón chupan ri ruk'ulubik.

¹²Y ri Sansón xubij chike ri e juwineq lajuj alaboni' ri': Yin k'o jun ri ninwajo' nink'utuj chiwe, y ninwajo' chi rix nibij chuwe ri nik'ulun-wi. Wi yixtikir nibij chuwe ri achike nel chi tzij rokik najin re wuqu' q'ij nimaq'ij, yin kan xtinya' k'a chiwe chi'ijujunal jujun jal tzieq ri banon rik'in lino y chuqa' jujun jal tzieq richin nimaq'ij.

¹³Jak'a wi rix man xkixtikir ta xtiq'alajirisaj chinuwech, xa kan jak'a rix ri xkixya'on chuwe ri juwineq lajuj jal tzieq ri banon rik'in lino y ri juwineq lajuj jal tzieq richin nimaq'ij, xcha'. Y rije' xkibij: Utz k'a; tabij-pe ri nawajo' nak'utuj chiqe, y niqak'axaj, xecha'.

¹⁴K'ari' ri Sansón xubij: Chupan ri k'uxunel xel-pe ri utz nitij. Ri xa janila itzel kan ki-ki' ri xuya-pe, xcha'. Y toq xq'ax yan k'a oxi' q'ij, rije' k'a man jani ketikir nikibij ri achike nel chi tzij.

¹⁵Y pa rukaj q'ij xkibij k'a chire ri rixjayil ri Sansón: Tabana' utzil tak'utuj chire ri awachijil ri achike nel chi tzij ri xubij chiqe, y k'ari' tabij chiqe roj, y wi man xtabij ta chiqe, xkatqaporoj rat y ri ek'o pa rachoch ri atata', roma rix man xojiwoyoj ta wawe' richin niwelesaj chiqe ri xa kan qichin roj, xecha' chire.

¹⁶Ri rixjayil ri Sansón xuchop oq'ej chuwech y xubij chire: Rat xa man yinawajo' ta, xa yinawetzelaj; roma ri' man abin ta chuwe ri achike nel chi tzij ri tzij ri xabij chike ri nuwinaq, xcha'. Y ri Sansón xubij chire: ¡Man nuq'alajirisan ta na chikiwech ri nte-nata', k'atala' xtinq'alajirisaj chawech rat!, xcha'.

¹⁷Y ri rixjayil kan xoq' k'a chuwech ri chi oxi' q'ij ri nrajo' chi nitz'aqet ri wuqu' q'ij. Y chupan k'a ri ruwuq q'ij, ri Sansón xuq'alajirisaj k'a ri tzij chuwech ri rixjayil, roma kan jantape' xuk'utuj chire; y ri rixjayil xuq'alajirisaj k'a chikiwech ri ruwinaq.

¹⁸Y chupan k'a ri ruk'isibel q'ij richin ri nimaq'ij, toq niqaqa yan qa ri q'ij, jari' toq ri aj-Timná xech'on rik'in ri Sansón y xkibij: ¿Achike ta chik k'a ri más jebel ruki'il chuwech ri kab? ¿Y achike ta chik k'a más k'uxunel chuwech ri koj?, xecha'. Y rija' xubij chike: Wi man ta xikusaj ri ti nuwákix, xa man ta xixtikir xibij chuwe ri xink'utuj chiwe, xcha'.

¹⁹Y ri Espíritu richin ri Jehová xuya' k'a ruchuq'a' ri Sansón, y roma ri' rija' xbe pa tinamit Ascalón, y xerukamisaj e juwineq lajuj achi'a' ri e aj chiri'. Y xumej k'a pe ri kitziaq, y xuya' k'a ronojel ri jal tzieq ri' chike ri e juwineq lajuj alaboni' ri xeq'alajirisan ri tzij, ri xubij rija'. Y yakatajineq k'a janila royowal, xtzolin pa rachoch ri rutata'.

²⁰Y ri rixjayil ri Sansón xa xya'ox chik k'a el chire jun chike ri alaboni' ri xerachibilaj chupan ri ruk'ulubik.