Read Kaqchikel Jue 15 Bible Online

Jue 15 - Kaqchikel bible

Jue 15

¹Y xk'uluwachitej k'a chi toq q'axineq chik ka'i-oxi' ik', y toq najin ri q'atoj trigo, jari' toq ri Sansón xbe richin niberutz'eta' ri rixjayil y xuk'uaj-el jun ti tzuntzun richin niberuya' chire, y xubij chire ri rujinan: Ninwajo' yinapon pa jay akuchi k'o-wi ri wixjayil, xcha' chire. Y ri rujinan man xuya' ta q'ij chire,

²y k'ari' xubij: Yin xinch'ob chi xa xawetzelaj kan jumul ri numi'al, y roma ri' yin xinya' chik el chire jun chike ri awachibil. Y wi nawajo', k'a k'o na k'a kan jun ruchaq', ri xa más jebejoj ok chuwech ri runimal, y jare' xtok awixjayil pa ruk'exel ri nimalaxel, xcha'.

³Y jari' toq ri Sansón xubij: Wakami k'a maneq numak chire ri achike xtikik'uluwachij ri awinaq pa nuq'a', xcha'.

⁴Y xbe k'a ri Sansón y xeruchop k'a e 300 kokoj chikopi' ri achi'el kibanik utiwa', y xberuk'ama-pe chej. K'ari' xeruxim pa k'ulaj ri taq chikopi' chikijey, y xuxim-el jujun chej chikijey.

⁵K'ari' xuya-el kiq'aq'al ri chej ri' y xerisq'opej-el ri chikopi' chupan ri kitiko'n ri aj-Filistea, y keri' xuben richin xuporoj ri trigo ri e q'aton chik y ri man jani q'aton ta; chuqa' xek'at ri tiko'n richin uva y richin olivo.

⁶Y ri aj-Filistea xkik'utula' chikiwech ¿achike ta k'a xbanon ronojel re'? Y ri winaqi' xkibij chi ja ri Sansón ri ruji' ri achin aj-Timná ri xbanon, roma ri achin ri' xa xuya-el ri rixjayil ri Sansón chire jun chike ri rachibil. Y roma ri' ri winaqi' aj-Filistea xkiporoj k'a ri ixoq ri' y chuqa' ri rutata'.

⁷Jari' toq ri Sansón xubij chike: Roma kere' xiben, wakami k'a man xkixinya' ta kan k'a toq xtitoj ri achike xiben, xcha'.

⁸Xeruchop k'a chi oyowal, janila xeruch'ey, y e k'iy xerukamisaj kan; y k'ari' xbe y xbek'oje' pa jun jul ri k'o chiri' chupan ri abej Etam.

⁹Xeri' ri aj-Filistea xejote-q'anej y xebek'oje' pa ruwach'ulew Judá y xe'apon k'a pa tinamit Lehi.

¹⁰Y ri achi'a' aj-Judá xkik'utuj chike ri aj-Filistea y xkibij: ¿Achike roma xixyakatej-pe chiqij? Y rije' xkibij chi e peteneq richin nokichapa-el ri Sansón, richin nutoj pa kiq'a' ri ch'a'oj ri rubanon kan chike.

¹¹K'ari' xebe e 3,000 achi'a' richin ri tzobaj Judá akuchi k'o-wi ri jul ri k'o chiri' pan Etam, y xkibij chire ri Sansón: ¿Man awetaman ta k'a chi pa kiq'a' ri aj-Filistea oj qajineq-wi?, xa xojaya' pa k'ayew, xecha' chire. Y ri Sansón xubij chike, chi keri' xuben chike roma rije' chuqa' keri' xkiben chire rija'.

¹²Y ri aj-Judá xkibij chire: Roj oj peteneq richin yatqachop-el y yatqak'uaj richin yatqajech pa kiq'a' ri aj-Filistea, xecha'. Y ri Sansón xubij chike chi nibe kik'in wi rije' nikiya' kitzij chi man nikikamisaj ta.

¹³Y rije' xkibij: Ni; roj ri niqajo' ja ri yatqachop-el y yatqajech pa kiq'a' ri aj-Filistea, xecha'. Y jari' toq xkixim-pe rik'in ka'i' kolo' k'ak'a' y xkik'en-pe.

¹⁴Y toq ye'apon yan ri chiri' pa Lehi, ri aj-Filistea xe'el k'a pe richin xokik'ulu' y yesik'in, jari' toq ri Espíritu richin ri Jehová xuya' ruchuq'a' ri Sansón, y ri kolo' ri achoq ik'in ximon-wi ri ruq'a' xek'oqpitej achi'el xa ta jun kolo' k'atineq, y ri kolo' xetzaq-el chire ri ruq'a'.

¹⁵Y ri Sansón kan jari' xutz'et jun bur ri man jani k'iy ta q'ij kamineq; y jari' toq xujoq'-el ri baq richin ri rukaxtate',*f5* y rik'in ri' xerukamisaj e 1,000 achi'a' aj-Filistea.

¹⁶Y roma ri' ri Sansón xubij k'a: Rik'in jun rukaxtate' bur xinben jun tzobaj kela', jun tzobaj kela'. Rik'in ri rukaxtate' bur xenkamisaj 1,000 achi'a', xcha'.

¹⁷Y toq ri Sansón rubin chik ri ch'abel ri', jari' toq xuk'eq kan ri rukaxtate' ri bur, y roma ri' ri chiri' xubini'aj Ramat-lehi.*f6*

¹⁸Y ri Sansón kan janila k'a chaqi'j-chi'ij chire y kan nik'at ri ránima. Jari' toq xch'on rik'in ri Jehová, y xubij chire: Rat xinakol yin ri asamajel. ¿Roma ta k'a chaqi'j-chi'ij yiken re wakami y ri tz'ilolej taq aj-Filistea xa choj chik yinokisik'a-el?, xcha'.

¹⁹Jari' toq ri Dios xujeq k'a jun raqen-jul ri k'o chiri' pa Lehi, y chiri' xbebulbu'x-pe ya'; y ri Sansón xuk'ya' k'a, y xuben chire chi xk'oje' chik ruchuq'a'. Y ri ralaxbel-ya' ri' xubini'aj kan En-hacoré,*f7* y keri' rubini'an k'a re wakami.

²⁰Y ri Sansón xok jun uk'uey bey pa kiwi' ri israelita kawineq juna', toq k'a ek'o na pa kiq'a' ri aj-Filistea.