Read Kaqchikel Jue 16 Bible Online

Jue 16 - Kaqchikel bible

Jue 16

¹K'o k'a jun q'ij ri Sansón xbe pa tinamit Gaza y chiri' xutz'et jun ixoq itzel ruk'aslen y xk'oje' rik'in.

²Y xya'ox k'a rutzijol chike ri aj-Gaza y xbix chike chi ri Sansón k'o chupan ri kitinamit. Y rije' xkisutij-rij ri jay chijun aq'a', y xkichajij ri ruchi' ri tinamit y xkiya' chikiwech chi k'a toq xtiseqer na pe, k'ari' xtikikamisaj.

³Jak'a ri Sansón xaxe nik'aj-aq'a' xwer-el rik'in ri ixoq ri', y pa nik'aj aq'a' xyakatej-el y xuk'uq-el chijun ri nima-ruchi' ri tinamit rachibilan ri che' ri chapayon y ri ch'ich' ri k'o chirij. Chijun re' xrejqaj-el y xuk'uaj k'a pa ruwi' ri jun juyu' ri k'o chunaqaj ri tinamit Hebrón.

⁴Y chirij k'a ronojel re', ri Sansón xbe chik k'a ránima chirij jun chik ixoq rubini'an Dalila, ri k'o pa jun taq'aj rubini'an Sorec.

⁵Toq ri e tata'al kichin ri aj-Filistea xketamaj ronojel re', xepe y xech'on rik'in ri Dalila y xkibij chire: Taq'olo' ri Sansón y tak'utuj chire akuchi nipe-wi ri janila ruchuq'a', y achike ta rubanik richin niqachop y niqaxim. Y chiqajujunal roj xtiqaya' juwineq lajuj libra saqipueq chawe, xecha' chire.

⁶Y ri Dalila xubij chire ri Sansón: Yin nink'utuj utzil chawe chi taq'alajirisaj chinuwech akuchi nipe-wi ri janila awuchuq'a' y achike ta rubanik richin yaxim y yach'akatej ta, xcha'.

⁷Y ri Sansón xubij: Yin xa nik'is ri wuchuq'a', wi ta yixim rik'in wuqu' ruwech iboch' ri man jani e chaqi'j, y ri iboch' ri' achi'el ri nukusex chire ri rute-ch'ab, y xkinok achi'el jun xabachike achin, xcha'.

⁸Y ri e tata'al kichin ri aj-Filistea xkik'en k'a pe wuqu' ruwech iboch' ri man jani e chaqi'j, y ri Dalila xuxim k'a ri Sansón rik'in ri iboch' ri'.

⁹Jak'a rija' e rewan achi'a' pa jun chik jay ri chiri' pa rachoch. Y xeri' ri Dalila xureq ruchi' y xubij: ¡Sansón, ri aj-Filistea xepe richin yatkichop!, xcha'. Y ri Sansón kan chi'anin xuk'oqpij ri iboch' y xuben chire achi'el xa ta jun kolo' k'atineq; y man xetamex ta k'a akuchi nipe-wi ri ruchuq'a'.

¹⁰Y jari' toq ri Dalila xubij chire ri Sansón: Rat xa xinaq'ol y ri xabij chuwe xa man qitzij ta. Tabij k'a chuwe, taq'alajirisaj chinuwech achike rubanik richin yaxim, xcha'.

¹¹Y ri Sansón xubij chire: Wi ta yixim rik'in k'ak'a' taq kolo' ri man jun bey ukusan, xa kan xtik'is ri wuchuq'a' y xkinok-qa achi'el jun xabachike achin, xcha'.

¹²Y ri Dalila xberuk'ama' k'a pe ri k'ak'a' taq kolo' y rik'in ri' xuxim-wi y k'ari' xubij chire: ¡Sansón, ri aj-Filistea xepe chawij richin yatkichop!, xcha'. Y ri achi'a' kewan k'a ki' pa jun chik jay chiri' pa rachoch. Jak'a ri Sansón xuk'oqpij ri k'ak'a' taq kolo' y xuben chire achi'el xa ta jun betz'.

¹³Chirij ri' ri Dalila xubij chik chire ri Sansón: K'a re wakami in aq'olon-pe, y ronojel ri abin chuwe xa man qitzij ta. Wakami k'a kan taq'alajirisaj k'a chuwe ri achike rubanik richin yaxim, xcha'. Y ri Sansón xubij chire: Wi ta naben wuqu' pach' chire ri rusumal-nuwi', y nakusaj richin ruway ri kem; k'ari' nayuquba' chuwech jun che' ri jebel tikil pan ulew, ri keri' xa xtik'is wuchuq'a', xcha'.

¹⁴Ri Dalila kan keri' k'a xuben chire, xukem k'a ri ruwi' y jari' toq xubij chire: ¡Sansón ri aj-Filistea xepe richin yatkichop!, xcha'. Y jari' toq ri Sansón xuna' ruwech y xuk'uq-el ri che' ri akuchi yuquban-wi ri kem.

¹⁵Y ri Dalila xubij: Rat nabij chi yinawajo', jak'a ri awánima xa nej k'o chuwe yin. Xinaq'ol yan oxi' mul y man jani taq'alajirisaj chinuwech ri akuchi nipe-wi ri awuchuq'a', xcha'.

¹⁶Ri Dalila kan q'ij-q'ij k'a xaxe ri' nuk'utuj chire, y roma ri' ri Sansón janila xik'o ruk'u'x pa ruq'a', roma ri' xpoqonatej y xurayibej rukamik.

¹⁷Y rija' kan xuq'alajirisaj k'a ronojel chuwech ri Dalila y xubij: Yin man jun bey sokan ta ri rusumal-nuwi'; roma yin kan in jachon chire ri Dios toq k'a man jani kinalex. Wi ta nisokex ri rusumal-nuwi', ri uchuq'a' xa xtel-el wik'in y xtik'is ri janila wuchuq'a' y xkinok achi'el xabachike achin, xcha'.

¹⁸Y toq ri Dalila xretamaj yan ri qitzij, jari' toq xuteq chik koyoxik ri e tata'al kichin ri winaqi' aj-Filistea y xubij chike: Kixanpe jun bey chik, roma rija' xuq'alajirisaj yan chinuwech ronojel, xcha'. Y ri achi'a' ri' kan xe'apon k'a rik'in ri Dalila y kik'uan-apo ri saqipueq.

¹⁹Y ri Dalila xuben chire ri Sansón richin xwer-qa chuwa ruch'ek, y xuteq royoxik jun achin richin xusokaj ri wuqu' pach' ri rubanon chire ri rusumal-ruwi'; y ri uchuq'a' kan xel-el rik'in. Chirij ri' ri Dalila kan xuchop k'a nuyoq'oya' ri Sansón.

²⁰Y xubij chire: ¡Sansón, ri aj-Filistea xepe richin yatkichop!, xcha'. Y toq xuna' ruwech, xubij-qa: Wakami xa xkinanimej chik el jun bey achi'el nubanon-pe ronojel mul, xcha-qa. Y kan man retaman ta chi xa malin chik kan roma ri Jehová.

²¹Y ri aj-Filistea xkichop y xkelesaj ri ka'i' runaq'-ruwech y xkik'uaj k'a pa tinamit Gaza y xkixim rik'in cadena ri banon rik'in q'enq'oj-pueq, y xkiben chire richin nusutij ri abej jok'bel, ri nukusex ri chiri' pa cárcel.

²²Man rik'in ri' ri rusumal-ruwi' rija' ri xjuk'uk'ex-el, xa xuchop chik k'a pe ruk'iyinen.

²³Y ri achi'a' ri k'o más kiq'ij chikikojol ri aj-Filistea xkimol k'a ki' richin xekisuj kamelabel chuwech ri ki-dios rubini'an Dagón, richin xenimaq'ijun y xkibixaj k'a: Ri qa-dios xujech pa qaq'a' ri Sansón, Ri Sansón ri etzelanel qichin, xecha'.

²⁴Y toq janila kikoten xkina' pa kánima, jari' toq xkibij: Tik'amer-pe ri Sansón richin yojtze'en juba' chirij, xecha'. Y xbe'elesex k'a pe ri Sansón pa cárcel y janila k'a xetze'en chirij. Y xkiya' k'a chukojol ri pilar ri ek'o chiri'. Y toq ri winaqi' richin ri tinamit xkitz'et ri Sansón, xkiya' ruq'ij ri ki-dios y xkibixaj k'a: Ri qa-dios xujech pa qaq'a' ri etzelanel qichin; Ri etzelanel qichin ri xuya' pa k'ayew ri qaruwach'ulew, ri kan e k'iy k'a qawinaq xerukamisaj, xecha'.

²⁶K'ari' ri Sansón xubij chire ri ala' ri uk'uayon richin: Kinajeluj-apo rik'in ri pilar ri e temeyon ri jay, richin yiraq'e' juba', xcha'.

²⁷Y ri jay ri akuchi kimolon-ki', nojineq chi achi'a' chi ixoqi' y konojel ri achi'a' ri k'o kiq'ij chikikojol ri aj-Filistea chuqa' ek'o chiri'. Y ri pa ruka'n wiq chire ri jay, ek'o la'eq e 3,000 winaqi' chi achi'a' chi ixoqi', ri kitzuliben-pe ri ye'ajin chubanik rik'in ri Sansón.

²⁸Y ri Sansón xch'on k'a rik'in ri Dios, y xubij: Ajaw Jehová, xaxe ta chik k'a re jun bey re' xkinoqaqa ta chi'ak'u'x. Nink'utuj k'a utzil chawe richin taya' chik jun bey ri wuchuq'a', nu-Dios yin, richin chi jumul ninya' rutojbalil chike ri aj-Filistea roma xkelesaj ri runaq' taq nuwech, xcha'.

²⁹Y k'ari' xuchop k'a ri ka'i' pilar ri temeyon ri jay ri', jun pilar pa rijkiq'a' y ri jun chik pa rajxokon.

³⁰K'ari' ri Sansón rik'in ronojel ruchuq'a' xureq ruchi' y xubij: Kiken yin junan kik'in re aj-Filistea, xcha'. Y kan jari' rik'in ronojel ruchuq'a' xunim k'a ri ka'i' pilar ri', y ri jay ri' xwulatej y xtzaq pa kiwi' ri achi'a' ri k'o kiq'ij chikikojol ri aj-Filistea y pa kiwi' konojel ri winaqi' richin ri tinamit ri ek'o chiri'. Xken k'a ri Sansón, y ri xeken chiri' kan más k'a e k'iy chikiwech ri xerukamisaj chijun ri ruk'aslen.

³¹Y xepe k'a konojel ri rach'alal y ri ek'o pa rachoch kan ri rutata' y xkik'uaj-el ri ruch'akul y xbekimuqu' ri akuchi muqun-wi ri Manoa ri rutata', y ri muqbel ri', k'o chukojol ri tinamit Sorá y ri Estaol. Ri Sansón juwineq k'a juna' xeruk'uaj ri israelita.