Read Kaqchikel Jue 17 Bible Online

Jue 17 - Kaqchikel bible

Jue 17

¹K'o k'a jun achin rubini'an Micaías, ri k'o rachoch ri chiri' chuwi' taq juyu' pa kiruwach'ulew ri tzobaj richin ri Efraín.

²Re achin re' xubij chire ri rute': Nána, ri juwineq lajuj libra saqipueq ri xabij chuwe chi xeleq'ex awik'in y rat kan xawoyoj etzelanik pa ruwi' ri xeleq'an; ri saqipueq ri' xa wik'in yin k'o-wi, xa ja yin xineleq'an awik'in, xcha'. Y roma ri' toq ri te'ej xubij chire: Ja ri Jehová xkaturtisan, wal yin, xcha'.

³Y toq rija' xutzolij kan ri juwineq lajuj libra saqipueq chire ri rute', ri rute' xa xubij chire: Re saqipueq re' xa xtinjech k'a chire ri Jehová pan abi' rat, richin chi rik'in re' niban ka'i' wachibel: Ri jun niya'ox saqipueq chirij y ri jun chik niban rik'in ya'erisan saqipueq, xcha'.

⁴Y ri rute' xaxe wo'o' libra saqipueq ri xuk'en-el y xberuya' kan chire jun achin ri niya'erisan ri saqipueq, y rik'in ri' xuben jun wachibel ri xya'ox saqipueq chirij, y ri jun chik wachibel xban rik'in ya'erisan saqipueq. Y re' xbeya'ox kan pa rachoch ri Micaías.

⁵Y re achin re' xk'oje' kachoch ri dios ri' rik'in, y xuben jun tzieq ri nibix efod chire, y chuqa' xeruben ch'aqa' chik taq wachibel. Chuqa' xuben chire jun chike ri ruk'ajol chi xok sacerdote kichin re wachibel re'.

⁶Chupan k'a ri q'ij ri' man jani k'o rey pan Israel; roma ri' chikijujunal rije' nikiben ri achike niqa' chikiwech.

⁷Pa tinamit Belén richin ri tzobaj Judá, k'o jun ala' levita ri k'o qa juba' chiri'.

⁸Re ala' re' xel-pe pa Belén richin xberukanoj akuchi nik'oje-wi. Y xuchop-el ri bey ri nibe pa ruwach'ulew richin Efraín, y xapon pa rachoch ri Micaías.

⁹Ri Micaías xubij k'a chire: ¿Akuchi at peteneq-wi?, xcha'. Y ri ala' xubij chire: Yin in rijatzul ri Leví, y wakami xinel-pe pa Belén richin Judá, y ninkanoj akuchi utz ta yik'oje-wi-qa, xcha'.

¹⁰Xeri' ri Micaías xubij chire: Kak'oje-qa wawe' pa wachoch, y rat xkatok nupixabanel, y chuqa' xkatok nu-sacerdote, y ronojel juna' xtinya' ka'i' libra saqipueq chawe, y chuqa' xtinya' atziaq y away, xcha'. Y ri levita utz xrak'axaj ri xbix chire.

¹¹Kan xqa' k'a chuwech richin xk'oje-qa pa rachoch ri Micaías, y xok k'a achi'el jun chike ri ruk'ajol.

¹²Y ri Micaías xuben chire ri ala' levita richin xok ru-sacerdote y xk'ase' chiri' pa rachoch.

¹³Ri Micaías xubij: Wakami k'a wetaman chi ri Jehová xtuben chuwe chi jebel xtel ronojel chinuwech, roma kan levita ri nu-sacerdote, xcha'.