Read Kaqchikel Jue 19 Bible Online

Jue 19 - Kaqchikel bible

Jue 19

¹Chupan k'a ri q'ij ri' toq man jani k'o rey pan Israel, k'o k'a jun levita ri xk'oje' chuwi' taq juyu' k'a más nej chire ri kiruwach'ulew ri Efraín. Y re levita re' xuk'uaj ri ru-concubina ri aj-Belén richin ri Judá.

²Y ri ixoq ri' xanimej-el rik'in ri rachijil, y xbe chirachoch ri rutata' ri k'o pa Belén. Y kaji' yan k'a ik' k'o chiri'

³toq xapon ri rachijil richin xberubochi'ij richin nitzolin chik rik'in; ruk'uan k'a el jun rusamajel y ka'i' bur. Y ri ixoq xukusaj-apo pa rachoch ri rutata'.

⁴Y toq ri rujinan xutz'et-pe ri ruji', jari' toq xberuk'ulu' rik'in kikoten; y xuben chire richin xk'oje-qa kik'in oxi' q'ij. Xwa-xuk'ya' kik'in y chuqa' chiri' xwer-wi.

⁵Pa rukaj q'ij, toq xeyakatej-q'anej, ri levita xuchojmirisaj ri' richin yebe; y toq yebe yan, jari' toq ri rujinan xubij chire: Titija' na el iway, y k'ari' yixbe, xcha'.

⁶Y xetz'uye' k'a junan rik'in ri rujinan richin xewa-xe'uk'ya'. K'ari' ri rujinan xubij chire ri ruji': Yin nink'utuj jun utzil chawe richin naq'axaj ta re jun chik aq'a' re' wawe' y xtikikot k'a ri awánima, xcha'.

⁷Y ri jun chik q'ij xyakatej k'a q'anej ri levita richin yebe, y ri rujinan xutej ruq'ij chirij richin xk'oje' chik qa ri q'ij ri', y xuq'axaj chik qa ri aq'a' ri' chiri'.

⁸Pa ro' q'ij, xyakatej k'a el nimaq'a' yan richin yebe, y jun bey chik k'a xubij ri rujinan: Man jani yixbe, titija' na el iway y k'a tiqaq'ij xkixbe, xcha'. Chi e ka'i' xewa-xe'uk'ya' junan, y keri' xkiben k'a xqaq'ij na qa.

⁹Chirij ri', ri levita, ri ru-concubina y ri rusamajel xkichojmirisaj-ki' richin yebe. Y jari' toq jun bey chik ri rujinan xubij chire: Wakami xa tiqaq'ij chik y nok yan pe ri aq'a'. Nink'utuj utzil chawe chi kixk'oje' chik qa re aq'a' re', richin chi nikikot ri awánima; y nimaq'a' yan chua'q, xtichop-el bey y yixbe chi'iwachoch, xcha'.

¹⁰Jak'a ri levita man xrajo' ta chik xuq'axaj ri aq'a' ri' chiri', xa kan xuchop chik k'a el bey rachibilan el ri ru-concubina, ri rusamajel y ri e ka'i' bur kik'uan ejqa'n. Chupan ri aq'a' ri' xe'apon chuwech ri tinamit Jebús, ri chuqa' rubini'an Jerusalem.

¹¹Y toq xe'apon chiri', xa kan niq'equmer yan k'a pe, y roma ri' ri rusamajel xubij chire ri rajaw: Más ta utz wi yojk'oje' kan chupan re tinamit re', richin niqak'owisaj re aq'a' re', xcha'.

¹²Y ri rajaw xubij chire: Man xqojbe ta chupan jun tinamit ri xa man qichin ta roj israelita, más utz nibeqaq'axaj ri aq'a' k'a pa tinamit Guibeá.

¹³Jo', y k'a chupan jun chike la tinamit la ek'o chila', nibeqaq'axaj-wi ri aq'a'; k'a pa Guibeá o stape' k'a pa tinamit Ramá, xcha'.

¹⁴Keri' k'a kichapon binen, y toq xok yan aq'a', xe'apon k'a pa Guibeá, tinamit kichin ri e rijatzul ri Benjamín.

¹⁵Y xe'ok k'a kan pa tinamit richin nikiq'axaj ri aq'a', y xetz'uye' k'a pa nima-ruwech bey richin molojri'il richin ri tinamit, roma man jun nibin chike richin yeruk'uaj pa rachoch richin nibekik'owisaj ri aq'a'.

¹⁶Y k'o k'a jun ti ri'j achin tzolejineq-pe pa rusamaj toq nok yan qa ri aq'a'. Re ti achin re' man aj chiri' ta; rija' xa aj chuwi' taq juyu' richin ri tzobaj Efraín, jak'a chiri' pa Guibeá richin ri tzobaj Benjamín k'o rulew, y roma ri' chiri' nuk'owisaj-wi ri aq'a'.

¹⁷Y re ti achin re' xtzu'un-apo pa nima-ruwech bey richin molojri'il, y xutz'et chi chiri' k'o jun achin ri xa choj q'axel, y xch'on rik'in y xuk'utuj chire: ¿Akuchi at peteneq-wi y akuchi yabe-wi?, xcha'.

¹⁸Y ri levita xubij: Xa choj yojq'ax-el wawe'. Yin in richin ri tzobaj Efraín. Ri wachoch k'o k'a pa ruk'isibel chire ri ruwi' taq juyu' richin ri ruwach'ulew ri'. Oj peteneq pa Belén richin Judá y yojtzolej chiqachoch. Jak'a xa man jun wineq ri biyon ta chiqe richin yojk'oje' ta kan juba' pa rachoch re aq'a' re',

¹⁹stape' kan qak'uan q'os y ri ch'aqa' chik kiway ri qabur; chuqa' qak'uan kaxlan-wey y vino richin niqatej: Yin, ri wixjayil y ri nusamajel man jun k'a achike xtiqajo' roma ronojel qak'uan, xcha'.

²⁰Y ri ti achin xubij: Tik'oje' uxlanibel-k'u'x iwik'in; y wi k'o ta nik'atzin chiwe, xa kan xtinya' chiwe; xaxe man ninwajo' ta chi yixk'oje' kan pa bey richin niq'axaj re aq'a' re', xcha'.

²¹Y xeruk'uaj k'a pa rachoch, y xuya' kiway ri bur. Y rije' xkich'ej ri kaqen, k'ari' xewa-xe'uk'ya'.

²²Y toq janila yekikot ek'o chiri', jari' toq e k'iy achi'a' richin ri tinamit ri' xkisutij-rij ri jay, y nikitarila-apo ri ruchi' ri jay y xech'on apo chire ri ti achin y xkibij: Tawelesaj-pe ri achin ri xok apo pan awachoch, richin yojk'oje' rik'in, xecha'. Keri' xkibij roma re achi'a' re' kan e banoy etzelal.

²³Y xel k'a pe ri ti rajaw jay y xubij chike: Wach'alal, tibana' utzil man tiben re jun mak re'; roma yin xink'en-pe re jun achin re' pa wachoch richin nuq'axaj re aq'a' wawe'. Man tiben re etzelal re' rik'in.

²⁴Wawe' k'o ri numi'al ri k'a xten na, y chuqa' k'o ri rixjayil re jun achin re'. Yin yenjech-el chiwe wakami yan, y tibana' k'a kik'in ri achike niwajo', xaxe richin man tiben ri etzelal rik'in re achin re', xcha'.

²⁵Jak'a ri achi'a' ri' man xkinimaj ta rutzij ri ti achin; y roma ri' ri levita xberuk'ama-pe ri ru-concubina, y xunim-pe chikiwech y xkik'uaj; y xek'oje' k'a rik'in chi jun aq'a' y k'a toq xseqer na pe k'ari' xkiya' kan.

²⁶Y toq xseqer-pe xtzolej k'a ri ixoq ri' y xtzaq k'a chuchi' ri jay ri akuchi k'o-wi ri rachijil y xken; y chiri' xpune-wi k'a toq xpaq'ijer na q'anej.

²⁷Ri levita xyakatej-q'anej y xujeq ruchi' ri jay richin nuchop chik el binen; jari' toq xutz'et ri ru-concubina jupul chuchi' ri jay y rurik'on-apo ri ruq'a' pa ruwi' ri akuchi niban-wi oken.

²⁸Y rija' xubij chire: Jo'; kayakatej, xcha'. Jak'a ri ixoq man xch'on ta. Jari' toq ri levita xuyek-el ri ruch'akul ri ixoq ri', y xuya-el chirij ri rubur, y xebe k'a pa kitinamit.

²⁹Y toq xapon chirachoch, xberuk'ama' k'a pe jun qupibel, y xuk'ajij ri ru-concubina y ja ri akuchi e rutunulun-wi-ri' ri rubaqil, chiri' xeruch'arala-wi richin xuben kablajuj peraj chire. Y xerutaqala' k'a jujun peraj chike ri ch'aqa' chik tzobaj chupan chijun tinamit Israel.

³⁰Y konojel k'a ri xkitz'et ri peraj ti'ij ri' xkibij: ¡Janipe' oj eleneq-pe pan Egipto kan man jun bey qatz'eton re jun banobel re' ¡Wakami k'a qojch'on pa ruwi' re banobel re' y tiqanojij achike xtiqaben!, xecha'.