Read Kaqchikel Jue 2 Bible Online

Jue 2 - Kaqchikel bible

Jue 2

¹Ri ángel richin ri Jehová xel-el pa Guilgal y xapon-q'anej pa Boquim y xubij chike ri e rijatzul ri Israel: Yin xinelesan-pe iwichin pan Egipto y xixink'en-pe chupan re ruwach'ulew re' ri xinsuj chike ri ite-itata', toq xinbij: Man jun bey k'a xtintzolij-wi' chuwij chire ri jikibel-tzij ri xinben iwik'in,

²richin chi rix man ta nijunamatej-iwech kik'in ri winaqi' ri ek'o chupan re ruwach'ulew re', y ri kiporobal kan k'o chi xke'iwulaj-el, xicha' chike rije'. Jak'a rix xa man xinimaj ta nutzij. ¡Titz'eta' re ibanon wakami!

³Roma ri' yin ninbij chiwe chi roma man xe'iwoqotaj ta el re winaqi' re' chi'ikojol, ni man xe'iwelesaj ta el ri ki-dios chi'ikojol, xa xke'ok k'a pikbel chiwe rix, xcha'.

⁴Toq ri ángel richin ri Jehová xubij ronojel re' chike ri e rijatzul ri Israel, jari' toq xesik'in-q'anej chi oq'ej.

⁵Roma ri' ri chiri' xubini'aj Boquim.*f2* Y chiri' xkisuj kamelabel chuwech ri Jehová.

⁶Toq ri Josué xapon pa ruk'isibel chire ri rusamaj, rija' xch'on kan kik'in ri ruwinaq, y jari' toq chikijujunal ri tzobaj xebe k'a pa taq tinamit ri akuchi k'o chi nikichinaj-wi kan.

⁷Y ri winaqi' xkiya' k'a ruq'ij ri Jehová ri janipe' xk'ase' ri Josué, y chuqa' kan keri' xkiben toq k'a e k'es na ri rijita'q taq achi'a' ri k'o kiq'ij ri xek'ase' na kan chirij ri rukamik ri Josué, ri kan xkitz'et ri nima'q taq banobel ri xuben ri Jehová rik'in ri Josué, roma ri rutinamit Israel.

⁸Y ri Josué, ri rusamajel ri Jehová xken k'a toq k'o 110 rujuna'.

⁹Y xkimuq k'a chiri' pa rulew rija' ri pa tinamit Timnat-sérah, ri k'o chuwi' taq juyu' richin Efraín, ri k'o pa xaman chire ri juyu' ri rubini'an Gaas.

¹⁰Chuqa' xeken k'a ri sol winaqi' ri xek'ase' toq k'a k'es na ri Josué. Y keri' ri jun chik sol winaqi' ri xek'oje' kan chikij rije' man ketaman ta k'a ruwech ri Jehová, ni ri nima'q taq banobel ri xuben rik'in ri tinamit Israel.

¹¹Ri e rijatzul ri Israel xkichop k'a rubanik itzel taq banobel chuwech ri Jehová, y kan xekisamajij ri wachibel kichin ri dios kibini'an Baal.

¹²Xkiya' k'a kan ri Jehová ri ki-Dios ri kati't-kimama' ri xelesan-pe kichin pa ruwach'ulew Egipto, y xa xekitzeqelibej ri ch'aqa' chik dios, ri ek'o pa taq tinamit chikinaqaj rije', y kan xkiya' kiq'ij; y rik'in ri' xkiyek royowal ri Jehová.

¹³Xkimalij k'a kan ri Jehová, y xkiya' ruq'ij ri Baal y ri dios ixoq rubini'an Astarot.

¹⁴Roma ri' ri Jehová xpe janila royowal chikij ri e rijatzul kan ri Israel, y xerujech kan pa kiq'a' eleq'oma' ri kan xe'eleq' kik'in. Xerujech kan pa kiq'a' ri e etzelanel kichin ri ek'o chikinaqaj; y rije' man xetikir ta chik xkipaba-ki' chikiwech.

¹⁵Y xabakuchi k'a yebe-wi pan oyowal, ri Jehová man xeruto' ta y kan xuben chike chi nikitej poqon; achi'el rubin rija' chike, y kan rujikiban chi keri' nuben; y kan janila k'a xepoqonatej.

¹⁶Jak'a ri Jehová xeruya' to'onela', richin xekolotej pa kiq'a' ri eleq'oma' ri'.

¹⁷Jak'a rije' kan man xeniman ta chuqa' chike ri to'onela', xkimalij kan ri Jehová y xa xekitzeqelibej ri jujun chik dios, y xkiya' kiq'ij; keri' chuqa' chi'anin xkijech'ej kan ki' chire ri rupixa' ri Jehová, y man xkiben ta achi'el ri xkiben ri kite-kitata'.

¹⁸Ri Jehová kan xujoyowala' k'a kiwech ri winaqi' toq rije' xesik'in roma janila k'iy bey xetz'ilox, y roma ri' xeruya' ri to'onela' chikikojol. Y ri Jehová kan xeruto' k'a ri to'onela', y rokik xek'ase-el rije', ri winaqi' kan xekolotej-wi pa kiq'a' ri eleq'oma'.

¹⁹Jak'a toq yekamiyaj-el ri to'onela', jari' toq yebe chik kan chupan ri itzel k'aslen y más k'a xemakun rije' chikiwech ri kite-kitata'; kan xekisamajij y xexuke' chikiwech jujun chik dios; y man xetane' ta chubanik ri itzel taq banobel, ni chire ri rukowirinen ri kánima.

²⁰Y ri winaqi' israelita kan janila k'a xkiyek royowal ri Jehová y roma ri' xubij k'a chike: Roma kan man xinimaj ta nutzij y xa xixolq'otij ri nujikibel-tzij ri xinya' chiwe,

²¹keri' chuqa' yin man xkenwelesaj ta el chiwech ri winaqi' richin ri ruwach'ulew ri man xech'akatej ta kan roma ri Josué toq k'a k'es na.

²²Xtinben keri' richin chi yixintejtobej rix, wi nitzeqelibej ri bey wichin yin achi'el xkitzeqelibej ri iwati't-imama' ri ojer kan, xcha' ri Jehová.

²³Keri' ri Jehová man xerujech ta ri ch'aqa' chik winaqi' pa ruq'a' ri Josué, xaxe richin chi xutz'et wi xtikitzeqelibej ri rubey rija'.