Read Kaqchikel Jue 3 Bible Online

Jue 3 - Kaqchikel bible

Jue 3

¹Ri Jehová k'a xeruya' na kan jujun tzobaj winaqi' richin ri ruwach'ulew richin yerutejtobej ri israelita, ri man jun bey kitz'eton jun labal achi'el ri xban chiri' pa Canaán.

²Xeruya' kan, xaxe richin chi niketamaj achike ri' ri labal, richin nikik'ut chikiwech ri man ketaman ta.

³Ja winaqi' re' ri man xech'akatej ta kan: Ri e wo'o' tata'al kichin ri tinamit Filistea y chuqa' konojel ri winaqi' cananeo, ri sidonio y ri heveo ri ek'o kela' chuwi' taq juyu' rubini'an Líbano, nitiker-el pa juyu' rubini'an Baal-hermón y napon k'a pa tinamit Hamat.

⁴Ri Jehová xerukusaj re winaqi' re' richin xerutejtobej ri israelita, richin nutz'et wi kan nikitaqej ri rupixa' ri ruya'on chike ri kite-kitata' ri xujech pa ruq'a' ri Moisés.

⁵Keri' k'a ri israelita xek'oje' chikikojol ri winaqi' cananeo, ri hitita, ri amorreo, ri ferezeo, ri heveo y ri jebuseo.

⁶Y ri kimi'al-kik'ajol ri israelita xek'ule-qa kik'in ri kalk'ual ri winaqi' ri', y xekisamajij ri ki-dios.

⁷Ri kibanobal ri israelita kan janila itzel chuwech ri Jehová roma xa xemestan rik'in rija' y xa ja ri Baal y ri Astarot ri xkiya' kiq'ij.

⁸Y roma ri' ri Jehová kan xyakatej janila royowal chikij y xerujech pa ruq'a' ri Cusán-risataim, rey richin Mesopotamia; y kan xkisamajij waqxaqi' juna'.

⁹Roma ri tijoj-poqonal ri', rije' xesik'in y xech'on rik'in ri Jehová richin yeruto'; y rija' xuya' jun achin ri xekolon pa ruq'a' re rey re'; ri achin ri' rubini'an Otoniel, ruk'ajol ri Quenaz, y ri Quenaz ri' ruchaq' ri Caleb.

¹⁰Ri Espíritu richin ri Jehová xpe rik'in ri Otoniel richin nuya' ruchuq'a', y xuq'et-tzij pa kiwi' ri ruwinaq, y xbe pan oyowal, y xuchop oyowal rik'in ri Cusán-risataim rey richin Siria, y ri Jehová xujech pa ruq'a' ri Otoniel, re rey re'.

¹¹Y xk'oje' k'a uxlanen chupan ri ruwach'ulew kawineq juna'; xeri' xken-el ri Otoniel.

¹²Ri israelita xkichop chik rubanik ri itzel taq banobel chuwech ri Jehová; y ri Jehová xuya' ruchuq'a' ri jun achin rubini'an Eglón rey richin Moab richin xerutz'ila' roma ri itzel taq kibanobal.

¹³Re rey re' xeroyoj ri e rijatzul ri Amón y ri e rijatzul ri Amalec, y xeyakatej chikij ri israelita y xkichop ri Tinamit Richin Palmera.

¹⁴Y rije' waqxaqlajuj juna' xe'ok samajela' richin ri Eglón rey kichin ri aj-Moab.

¹⁵Y roma ri tijoj-poqonal ri', xesik'in jun bey chik rik'in ri Jehová, y rija' xuben chi xbek'ulun-pe ri achin rubini'an Ehud richin yerukol pa ruq'a' ri rey. Y ri Ehud ruk'ajol ri Guerá, richin ri tzobaj kan ri Benjamín. Y ri Ehud más nukusaj ri rajxokon. Y ri winaqi' israelita xkiteq k'a el ri q'aton pa kiwi', chire ri Eglón rey richin ri Moab y ja ri Ehud xuk'uan-el.

¹⁶Y ri Ehud xuk'uaj k'a el jun ru-espada ri k'o ka'i' rey ri ka'i' q'a'aj rik'in nik'aj raqen y xuju' k'a el pa rutziaq pa rijkiq'a'.

¹⁷Y xujech k'a apo ri q'aton pa kiwi', chire ri Eglón y ri Eglón jun achin ri janila ti'oj.

¹⁸Y toq ri Ehud rujachon chik ri q'aton pa kiwi', xel-el e rachibilan ri ruwinaq ri e peteneq chirij; y xeberujacha' kan

¹⁹akuchi ek'o-wi ri wachibel ri niya'ox kiq'ij ri ek'o pa Guilgal. Ri Ehud xtzolin kan ruyon y xberubij chire ri rey: K'o jun ninwajo' ninbij chawe pan ayonil, xcha'. Y ri rey xubij chike ri ek'o rik'in: Kixel na el juba', xcha' chike. Y konojel ri ek'o-apo rik'in xe'el-el

²⁰chupan ri nima-jay ri k'o pa ruka'n wiq chire ri rachoch, ri akuchi nuxlan-wi toq janila k'aten nuben. Y ri Ehud xjel-apo rik'in ri rey toq tz'uyul ruyon, y xubij chire: Ri Dios k'o rubin-pe chuwe richin ninbij chawe, xcha'. Jari' toq ri rey xyakatej-q'anej pa ruch'akat.

²¹K'ari' ri Ehud xrelesaj ri rukamisabal ri ruya'on pa rijkiq'a', y xuju' kan chirupan ri rey.

²²Kan rik'in k'a ronojel ruchuq'a' xuju' y roma ri rey kan janila ti'oj, ri ruchapbal ri rukamisabal kan xok kan jumul chirupan. Y ri Ehud kan man xtikir ta chik xrelesaj-el ri rukamisabal chirupan ri rey, y roma ri' kan xbe'el-pe ri nupamaj.

²³K'ari' ri Ehud xutz'apej kan jebel ri ruchi' ri jay y k'ari' xel-el pa ventana,

²⁴y toq rija' eleneq chik el, xepe ri rusamajela' ri rey, y xkitz'et chi ri ruchi' ri nima-jay ri' e tz'apel jebel. Jari' toq xkibij-qa: Rik'in juba' xa nipaman, xecha'.

²⁵Y toq janila xkoyobej yan y sachineq chik kik'u'x, roma rija' man nujeq ta pe ri ruchi' ri nima-jay, roma ri' xbekik'ama-pe ri jaqbel ruchi' ri jay y xkijeq-apo; jari' toq xkitz'et chi ri kajaw tzaqineq chik kan pan ulew y kamineq chik.

²⁶Y rokik rije' janila xkoyobej y man xkil ta achike ri xkiben, ri' xuya' q'ij chi ri Ehud xanimej-el y jari' xapon yan akuchi ek'o-wi ri wachibel ri ek'o pa Guilgal y xberuto-ri' k'a pa tinamit Seirat.

²⁷Y xaxe toq xapon, xutaqala' rubixik chi kexupux ri uk'a'; y ri achi'a' israelita ri ek'o chuwi' taq juyu' richin ri Efraín, xkimol k'a ki' rik'in, y konojel kan jari' xebeqaqa-pe, y ja rija' ri beneq chikiwech.

²⁸Y jari' toq xubij chike: Kan kinitzeqelibej k'a, roma ri Jehová kan xerujech yan pa qaq'a' ri winaqi' aj-Moab ri e etzelanel qichin, xcha'. Rije' kan xkitzeqelibej k'a ri Ehud, y xebe k'a chuchajixik ri akuchi xax rupan ri raqen-ya' Jordán, ri akuchi k'o chi yeq'ax-wi ri aj-Moab, y kan man xkiya' ta k'a q'ij richin chi k'o ta jun ri xq'ax.

²⁹Chupan ri q'ij ri' rije' xekikamisaj la'eq 10,000 achi'a' aj-Moab, ri jebel kuchuq'a' y maneq xibinri'il chikiwech; y kan man jun k'a xkolotej kan chike rije'.

³⁰Kere' k'a xbanatej toq ri israelita xech'akon chikij ri aj-Moab; chirij re' xk'oje' k'a uxlanen kik'in, jumuch' juna'.

³¹Chirij ri Ehud xyakatej chik k'a pe jun ri xerukol ri ruwinaq pa kiq'a' ri aj-Filistea; ri' ja ri Samgar, ri ruk'ajol ri Anat. Rija' xerukamisaj k'a e 600 achi'a', xaxe rik'in jun che' ri k'o ch'ich' chutza'n ri samajibel ri nukusex richin yech'ay ri wákix.