Read Kaqchikel Jue 4 Bible Online

Jue 4 - Kaqchikel bible

Jue 4

¹Toq xken yan el ri Ehud jari' toq ri israelita xkichop chik rubanik ri itzel taq banobel chuwech ri Jehová.

²Xa roma ri' toq ri Jehová xerujech pa ruq'a' ri Jabín rey richin Canaán, ri niq'aton-tzij pa tinamit Hasor; y ri aj-raqen kichin ri aj-labal ja ri Sísara, y rija' aj pa Haróset-goím.

³K'ari' ri israelita xesik'in-q'anej rik'in ri Jehová, roma ri Jabín janila yerutz'ila', y keri' rubanon-pe chike juwineq juna' y chuqa' re achin re' ek'o e 900 ru-carruaje e banon rik'in ch'ich'.

⁴Chupan ri q'ij ri' ri niq'aton-tzij chupan ri tinamit Israel, ja ri jun ixoq rubini'an Débora, rija' jun q'alajirisey ruch'abel ri Dios. Chuqa' ixjayilonel richin ri Lapidot.

⁵Ri rutinamit re ixoq re' k'o chuwi' taq juyu' richin ri Efraín. Ronojel q'ij rija' nitz'uye' chuxe' jun che' palma ri k'o chiri' chikikojol ri tinamit Ramá y Betel; roma ri' ri che' ri' nibix Palma Richin Débora chire. Ri e rijatzul kan ri Israel, k'a chiri' k'a ye'apon-wi-q'anej rik'in richin nuq'et-pe tzij pa kiwi'.

⁶K'o k'a jun q'ij ri Débora xuteq royoxik ri Barac, ri ruk'ajol ri Abinóam ri aj-Quedes, ri k'o pa ruwach'ulew richin ri Neftalí, y toq xapon k'a, ri Débora xubij chire: Ri Jehová, ri qa-Dios, kere' ri nubij chawe: Kabiyin y kebe'amolo-pe e 10,000 achi'a' chikikojol ri tzobaj richin ri Neftalí y ri Zabulón, y timolo-iwi' chiri' chuwa taq juyu' ri rubini'an Tabor,

⁷y yin Jehová kan xtinben k'a chire ri Sísara y ri aj-labal ri e richin ri rey Jabín richin xkepe chuchi' ri raqen-jul rubini'an Quisón, y yin xkenjech pan aq'a' ri achi'a' ri', y chuqa' ri ki-carruaje. Kere' nubij ri Jehová, xcha' ri Débora.

⁸K'ari' ri Barac xubij chire ri Débora: Wi rat yabe chuwij, yin chuqa' yibe; jak'a wi rat man yabe ta, yin chuqa' man xkibe ta, xcha'.

⁹Jak'a ri Débora xubij: Utz k'a, yibe chawij, jak'a ri ruwaq'ijaj richin ri samaj ri xtabebana' man xtok ta k'a awichin rat, roma pa ruq'a' jun ixoq xtijach-wi ri Sísara roma ri Jehová, xcha'. Y keri' ri Débora xbe rachibilan chik el ri Barac k'a pa tinamit Quedes.

¹⁰Y ri Barac kan xerumol k'a pe chikikojol ri tzobaj richin ri Zabulón y ri Neftalí e 10,000 achi'a' chiri' pa Quedes. K'ari' xejote-q'anej pa Tabor y ri Débora kan beneq k'a kik'in.

¹¹Y k'o k'a jun achin rubini'an Héber, rija' jun achin quenita, y rijatzul kan ri Hobab jun ach'alalri'il richin kan ri Moisés. Rija' ruyon k'a k'o, ruch'aron-el-ri' chike ri ch'aqa' chik winaqi' quenita, y rupaban-q'anej rachoch ri banon rik'in tzieq, ri chiri' akuchi ek'o-wi ri paten-che' richin Saanaim, ri k'o chunaqaj ri Quedes.

¹²Xapon k'a rutzijol rik'in ri Sísara, chi ri Barac xjote-q'anej chunaqaj ri ruwi-juyu' Tabor.

¹³Roma ri' ri Sísara kan jari' xerumol k'a ri e 900 ru-carruaje ri e banon rik'in ch'ich', y chuqa' konojel ri aj-labal ri ek'o rik'in. Xe'el-pe pa tinamit Haróset-goím y xe'apon k'a akuchi k'o-wi ri raqen-jul Quisón.

¹⁴Jari' toq ri Débora xubij chire ri Barac: Ja q'ij re' toq ri Jehová xtujech ri Sísara pan aq'a', roma ri Jehová kan nabeyejineq chawech, xcha'. Y ri Barac kan jari' xbeqaqa k'a pe ri chuwa-juyu' e rachibilan-pe ri e 10,000 aj-labal.

¹⁵Ri Jehová kan xusech-wi k'a ruk'u'x ri Sísara, konojel ri aj-labal y konojel chuqa' ri achi'a' ri e beneq pa carruaje. Y jari' toq ri Barac xuchop k'a kikamisaxik chi espada; y roma ri' ri Sísara xqaqa-el chupan ri ru-carruaje y xanimej-el.

¹⁶Y ri aj-labal y ri achi'a' ri e beneq pa carruaje xe'animej k'a, y ri Barac y ri achi'a' ri e rachibilan-el xekitzeqelibej-el k'a pa Haróset-goím. Konojel aj-labal richin ri Sísara xekamisex chi espada, y kan man jun k'a ri xkolotej kan.

¹⁷Y ri Sísara kan chiraqen k'a beneq-wi y kan choj xapon chukanoxik ri rachoch ri Jael, ri rixjayil ri Héber, roma ri rajaw ri Sísara ja ri Jabín, ri rey richin Hasor. Ri rey ri' kan junan k'a kiwech kik'in ri aj pa rachoch ri Héber.

¹⁸Ri Jael xel-pe richin xoruk'ulu-el ri Sísara, y xubij chire: Katok-pe wawe' wajaw yin, y man taxibij-awi', xcha' chire. Y ri Sísara kan xok-wi-apo chupan ri rachoch. K'ari' ri Jael xuya' kan jun tzieq chirij richin xrewaj kan.

¹⁹Y ri Sísara xubij chire ri ixoq chi tuk'ama-pe juba' ruya', roma janila chaqi'j ruchi'. Y ri ixoq xberuk'ama-pe juba' leche ri yakel kan chupan jun tz'um y xuya' chire. K'ari' xuya' chik kan jun bey ri tzieq chirij.

²⁰Ri Sísara xch'on chik rik'in ri ixoq y xubij: Kak'oje' chuchi' re jay y wi k'o jun xtipe y nuk'utuj ta chawe chi k'o ta jun achin oqawineq re wawe', rat tabij chire chi man jun, xcha'.

²¹Y ri achin ri' kan janila k'a kosineq y roma ri' xuchop-qa waran. Rokik-ri' ri Jael xuchop jun bajibel y jun che' simej rutza'n ri nik'atzin chire ri rachoch. Y k'ari' rija' eqal-eqal xjel-apo akuchi k'o-wi ri Sísara kamineq chi waran, y xubajij-qa ri che' simej rutza'n pa ruwi-q'anej juba' chire ri ruxikin; y keri' rubanik toq xken ri Sísara.

²²Y toq ri Barac xapon richin niberukanoj ri Sísara, jari' toq ri Jael xel-pe y xoruk'ulu-el y xubij chire: Katanpe, y xtink'ut chawech ri achin ri nakanoj rat, xcha'. Ri Barac xok k'a apo chirij ri ixoq, y jari' toq xutz'et chi ri Sísara k'o pan ulew kamineq chik y ch'ikiban kan ri che' simej rutza'n pa rujolon chiri' pan ulew.

²³Keri' k'a xbanatej toq ri Dios xuqasaj ruq'ij ri Jabín, rey richin Canaán, chikiwech ri e rijatzul kan ri Israel.

²⁴Y ja q'ij ri' toq ri winaqi' xkichop oyowal rik'in ri Jabín, ri rey richin Canaán, k'a toq xapon na ri q'ij chi xech'akon jumul chirij.