Read Kaqchikel Jue 5 Bible Online

Jue 5 - Kaqchikel bible

Jue 5

¹Ri Débora y ri Barac, ri ruk'ajol ri Abinóam xebixan k'a roma ri ch'akonik ri' y kere' k'a xkibij:

²Qaya' ruq'ij ri Jehová, roma kan k'a ek'o achi'a' pan Israel, ri kan xeq'ax chikiwech ri aj-labal; achi'a' ri kan xkisuj-ki' rik'in ronojel kánima roma ri kitinamit.

³Tiwak'axaj k'a rix achi'a' ri ix rey; kan tiya' ixikin rix q'atoy taq tzij. Kan xtiqabixaj k'a rubi' ri Jehová, kan xtiqabixaj k'a bix chire ri Jehová, ri qa-Dios richin ri Israel.

⁴Toq rat Jehová xaya' kan ri juyu' Seir, toq xatel-pe pa ruwach'ulew Edom; kan jari' toq chijun k'a ri ruwach'ulew xsilon, y ri kaj xuya-pe job, y ri sutz' xeruya-pe ya'.

⁵Ri juyu' kan xesilon chawech rat Jehová ri at qa-Dios, Kan achi'el k'a xsilon ri juyu' Sinaí.

⁶Pa ruq'ijul ri Samgar ri ruk'ajol ri Anat, chuqa' pa ruq'ijul ri Jael, ri winaqi' man yetikir ta chik yeq'ax chupan ri utzilej taq bey, y ri ye'eleyaj-el pa tinamit xa pa ramon taq bey yebe-wi.

⁷Chuqa' ri kokoj taq tinamit richin Israel xa xemalix kan, y kan man jun chik ek'o chuwech; k'a ri q'ij toq yin Débora xiyakatej, xiyakatej k'a achi'el jun te'ej kichin ri nuwinaq.

⁸Toq ri nuwinaq xekicha' ch'aqa' chik dios, jari' toq ri labal xoqaqa qik'in, y chuqa' kan man jun tobel ni ta kamisabel ri k'o ta pa kiq'a' ri nuwinaq, pa kiq'a' ri e 40,000 achi'a' ri ek'o chiqakojol.

⁹Yin kan yikikot k'a iwik'in rix aj-raqen richin Israel, y chuqa' iwik'in rix nuwinaq ri kan rik'in ronojel iwánima xisuj-iwi' richin niben labal. ¡Kan tiqaya' k'a ruq'ij ri Jehová!

¹⁰Rix ri k'o iq'ij ri yixch'oke' chikij seq taq bur, rix ri ix to'onela', chi'iwonojel rix winaqi' richin ri tinamit, kan titzijoj k'a ronojel ri xuben ri Jehová.

¹¹Titzijoj k'a chuchi' ri qumbel taq ya' tibixaj k'a ri rubanobal ri Jehová, tibixaj rik'in jalajoj ruwech q'ojom, titzijoj ri ch'akonik richin ri tinamit Israel.

¹²Kayakatej, kayakatej, Débora; kayakatej, kayakatej y kabixan. Kayakatej k'a chuqa' rat Barac ruk'ajol ri Abinóam, kayakatej y ke'ak'uaj-el ri winaqi' ri xe'achop.

¹³Ri nuwinaq kan xkimol k'a pe ki' wik'in richin yinkito'. Ri rutinamit ri Jehová kan xkimol k'a pe ki' richin nikiben oyowal kik'in ri maneq xibinri'il chikiwech.

¹⁴Ek'o k'a ka'i-oxi' achi'a' richin ri tzobaj richin ri Efraín xeqaqa-pe pa taq'aj, chuqa' e ka'i-oxi' achi'a' richin ri Benjamín ri xebek'ulun-pe. Jak'a chikikojol ri e rijatzul kan ri Maquir xepe ri aj-raqen, y chikikojol ri tzobaj richin Zabulón xepe ri q'atoy taq tzij.

¹⁵Chuqa' xepe rik'in ri Débora ri aj-raqen richin ri Isacar, kan jak'a ri tzobaj richin Isacar ri xeto'on richin ri Barac, roma kan kejuk'in xexule-pe chirij k'a ri pa taq'aj. Jak'a ri tzobaj richin ri Rubén xa xejalajo' chikiwech, ri pa kánima rije' ka'i' k'a nima'q taq ch'obonik ri xq'alajin.

¹⁶Rije' xa más utz xuben chikiwech chi xek'oje' kan chupan ri coral. Xa más xqa' chikiwech chi xkak'axaj kan ri kich'abel ri kikarne'l. Kan xq'alajin chi k'o xibinri'il kik'in ri tzobaj richin ri Rubén.

¹⁷Chuqa' ri aj-Galaad man xesilon ta pe ri juk'an-apo chire ri raqen-ya'. Ri tzobaj richin Dan xa ja ri ki-barco ri xekichajij kan. Ri tzobaj richin Aser xa ja ri palou ri xkimayjaj kan, y kan man xkimey ta richin xesilon-pe.

¹⁸Jak'a ri tzobaj richin Zabulón kan xkiya-ki' chuwi-kamik. Keri' chuqa' ri tzobaj richin Neftalí kan xkiya-ki' chuwi-kamik chupan ri oyowal.

¹⁹Xepe k'a ri achi'a' ri e rey richin ri Canaán, xkichop k'a oyowal qik'in ri chiri' pa Taanac. Kan xkichop-wi oyowal qik'in chiri' chuchi' ri raqen-ya' chunaqaj ri Meguido. Xepe k'a chuch'akik beyomel y xa man jun xkik'uaj-el.

²⁰Roma kan k'a chila' chikaj ri ch'umila' kan nikiben-pe oyowal kik'in, kan k'a ja ri akuchi ek'o-wi xkiben-pe oyowal rik'in ri Sísara.

²¹Chupan ri rubey-ya' Quisón xapon jun nimalej raqen-ya', y kan xeruk'uaj-el. Kan xeruk'uaj-wi ri raqen-ya' ri' ri xapon chiri' pa Quisón.

²²Jari' toq xebeq'ajan-pe ri kitabek ri kiej, ri e uk'uayon ri achi'a' ri maneq xibinri'il chikiwech. Kan yeropin, yeropin ri jebelej taq kiej ri' ri kan liq'-liq' kij.

²³Ri ángel richin ri Jehová xubij: Toyox ri etzelanik pa ruwi' ri tinamit Meroz. Kan toyox ri etzelanik ri' pa kiwi' ri winaqi' ri ek'o chiri', roma man xepe ta richin xkito' ri Jehová; chuqa' kan man xekito' ta ri k'o kuchuq'a', xcha'.

²⁴Jebel ruwa-ruq'ij ri Jael chikikojol ri ixoqi', rija' rixjayil ri Héber quenita; chikiwech konojel ixoqi', ja rija' ri más utz ruwa-ruq'ij ri chiri' ri akuchi k'o-wi-qa.

²⁵Ri Sísara xuk'utuj juba' ruya' jak'a ri Jael leche xuya' chire. Chupan jun qumbel kichin ri nima'q taq achi'a' xuya-apo t'oqol leche chire

²⁶Chirij ri' rik'in ri rajxokon xberuk'ama-pe ri che' simej rutza'n, y rik'in ri rijkiq'a' xuchop ri bajibel. Xukamisaj k'a ri Sísara; kan pa rujolon k'a xuya-wi. Kan xuwop, y xuk'owisaj ri che' ri' pa ruwi-q'anej juba' ri ruxikin.

²⁷Ri Sísara kan nukototila-ri' chiraqen ri Jael. Nubak'ak'ela-ri' xtzaq pan ulew roma ri rukiy. Akuchi xtzaq-wi, chiri' xken-wi kan.

²⁸Ri rute' ri Sísara nitzu'un-pe pa ventana, chukojol ri k'arak'ik ch'ich' nitzu'un-wi-pe y nubij: ¿Achike roma man nok'ulun ta ri ru-carruaje ri wal? ¿Achike roma xepa'e-qa ri ru-rueda ri ru-carruaje y man nibiyin ta pe?, xcha'.

²⁹Ri más e nowineq chike ri rusamajela' nikik'uluba-apo ri ruch'abel, Kan ruyon k'a chuqa' rija' nubij-qa:

³⁰Kan qitzij chi kan k'o chi nikich'er chikiwech ri xkimej-pe. Rik'in juba' chikijujunal nikik'ulumaj jun xten o e ka'i'; ri tzieq ri banon rik'in jalajoj ruwech betz' k'o chi niya'ox na chire ri Sísara, Ri tzieq ri tz'ison kiwech rik'in jalajoj betz'; y e tz'ison chi ka'i' ruwech, k'o chi niya'ox na chire ri ch'akonel, nicha' ri rute' ri Sísara.

³¹Jak'a yin Débora ninbij: Keri' ta k'a xkek'is konojel ri e etzelanel awichin rat Jehová; jak'a ri ye'ajowan awichin, kan ta xkeyok'olin achi'el ri q'ij toq nik'aton, xcha' ri Débora. Chirij ronojel re' xk'oje' uxlanen chupan ri kiruwach'ulew, kawineq juna'.