Read Kaqchikel Jue 6 Bible Online

Jue 6 - Kaqchikel bible

Jue 6

¹Ri israelita kan xkichop chik k'a rubanik ri itzel taq banobel chuwech ri Jehová; y roma ri' xerujech pa kiq'a' ri winaqi' aj-Madián, wuqu' juna'.

²Y rije' kan xkiben k'a chike ri israelita chi xkitej poqon, y roma ri' xkikanola' ri akuchi xkewala-wi-ki': Ek'o xkewala-ki' kojol taq juyu', pa ruwi' taq juyu' y pa taq jul ri ek'o chiri'. Chiri' xek'oje-wi richin xkito-ki'.

³Y ri israelita keri' xkiben, roma jantape' toq nikiben-qa ri kitiko'n y jebel rubanon-pe, jari' toq yejote-q'anej ri e rijatzul ri Madián, ri e rijatzul ri Amalec y ri winaqi' ri ek'o pa relebel-q'ij, richin yekichop chi oyowal.

⁴Ye'apon k'a q'anej kik'in ri israelita y yek'oje-qa chikikojol y yekisq'opej ri kawej pa ruwi' ri tiko'n, y keri' nikiben k'a toq ye'apon ri chiri' pa tinamit Gaza; y kan man jun nikolotej pa kiq'a'; y chuqa' kan yekik'uaj k'a el ri kawej.

⁵Toq yejote' k'a q'anej, kan e kik'ualon k'a ri kawej y ri ki-camello y chiri' nibekipaba-q'anej ri kachoch banon rik'in tzieq. Kan janila k'a e k'iy ri kichikop, kan e achi'el chik ri sak', ri man e ajlatel ta chik.

⁶Roma ronojel re nikik'owisaj pa kiq'a' ri aj-Madián, ri israelita kan man jun chik k'a k'o kik'in; y jari' toq rije' xkik'utuj to'onik chire ri Jehová richin chi keruto'.

⁷Toq ri winaqi' israelita xech'on-q'anej rik'in ri Jehová roma ri ruk'ayewal ri nikiq'axaj pa kiq'a' ri aj-Madián,

⁸ri Jehová xuteq-pe jun q'alajirisey ruch'abel, y kere' ri xubij chike: Ri Jehová ri qa-Dios nubij: Ja yin ri xinelesan-pe iwichin ri chiri' pan Egipto, y xixinwelesaj-pe chuxe' ri ilinri'il.

⁹Kan xixinkol-pe pa kiq'a' ri aj-Egipto, y re wawe' kan ix nukolon chuqa' pa kiq'a' ri winaqi' y e woqotan-el y chuqa' nujachon pan iq'a' ri kiruwach'ulew rije'.

¹⁰Y xinbij k'a chiwe chi ja yin Jehová ri in i-Dios; man tiya' kiq'ij ri dios kichin ri amorreo, stape' chupan ri kiruwach'ulew ixk'o-wi; y jak'a rix xa man iniman ta pe nutzij, nicha' ri Jehová, xcha' ri q'alajirisey ri ruch'abel.

¹¹Chirij ri' xpe ri ángel richin ri Jehová pa tinamit Ofrá y xbetz'uye' chuxe' jun paten-che' richin ri Joás, ri rijatzul kan ri Abiézer. Y ri Joás k'o k'a jun ruk'ajol rubini'an Gedeón, y ri Gedeón najin chujosq'ixik juba' ru-trigo chiri' chupan ri yitz'bel-uva; y pan ewel k'a najin chubanik koma ri winaqi' aj-Madián.

¹²Ri ángel ri' xuk'ut-ri' chuwech y xubij chire: Ri Jehová kan k'o awik'in. Rat kan at jun achin richin labal ri kan maneq xibinri'il chawech, xcha' chire.

¹³Ri Gedeón xubij chire: Wajaw yin, wi ri Jehová k'o qik'in roj, ¿achike k'a roma toq niqaq'axaj ronojel re'? ¿Akuchi k'o-wi ri meyel taq banobel, ri kitzijon kan ri qati't-qamama' toq xkibij chi ri Jehová xerelesaj-pe pan Egipto? ¿Wakami achike k'a roma toq oj rumalin kan y oj rujachon pa kiq'a' ri aj-Madián?, xcha'.

¹⁴Y ri Jehová xpa'e' k'a ri akuchi nitzu'un-wi ri Gedeón y xubij chire: Wakami rik'in k'a ri awuchuq'a' ri k'o, takusaj k'a y kabiyin richin ye'akol ri awinaq pa kiq'a' ri aj-Madián. Ja yin k'a ri yitaqon-el awichin, xcha' ri Jehová chire.

¹⁵Jak'a ri Gedeón xubij: Wajaw yin, ¿in achike ta k'a ok yin richin chi ja yin ri yikolon kichin ri nuwinaq? Roma yin xa yipe pa jun jay winaqi' ri maneq ok ruchuq'a', ri richin ri tzobaj richin kan ri Manasés, y chuqa' xa in ch'i'p chikikojol ri wach'alal, xcha'.

¹⁶Ri Jehová xubij chire: Yin kan xkik'oje' awik'in, y rat kan xkach'akon chikij ri aj-Madián, achi'el xa ta xaxe rik'in jun achin ri naben-wi oyowal, xcha'.

¹⁷K'ari' ri Gedeón xubij: Wi kan xinwil utzil awik'in, tabana' utzil taya' jun retal richin ri Jehová chuwe.

¹⁸Y wakami nink'utuj k'a jun utzil chawe richin chi k'a man jani na yabe, k'a toq xkitzolin na pe rik'in jun nusipanik, ri ninwajo' ninya' chawe rat, xcha'. Y ri ángel xubij chire chi nroyobej kan chiri', k'a toq xtitzolej pe.

¹⁹Y ri Gedeón anineq xbe pa rachoch, y xberuchojmirisaj jun ti alaj tzuntzun y xutzek; chuqa' xuben kaxlan-wey ri maneq ch'amilej-q'or rik'in y xukusaj jun arroba k'ej. K'ari' xuya' ri ti'ij pa jun ti chakech, y ri ruya'al ri q'utun xuya' pa jun bojo'y. K'ari' xuk'uaj-el ronojel re' richin niberuya' chire ri ángel ri k'o kan chuxe' jun paten-che'.

²⁰Y ri ángel xubij chire: Taya' ri kaxlan-wey y ri ti'ij pa ruwi' re abej, y ri ruya'al ri ti'ij xa tatixa-el, xcha'. Y rija' kan keri' k'a xuben.

²¹Ri ángel xuya-apo ri rutza'n ri ruch'ame'y pa ruwi' ri ti'ij y ri kaxlan-wey. Y ri abej ri' kan xel k'a pe q'aq' pa ruwi' y xuk'is ronojel. Chirij ri' ri Gedeón kan man xutz'et ta chik ri ángel.

²²K'ari' xunabej chi ja ri ángel richin ri Jehová ri xch'on rik'in y xubij: ¡Ajaw Jehová!, wakami kan xintz'et ruwech ri ángel ri ataqon-pe!, xcha'.

²³Jak'a ri Jehová xubij-pe chire: Tik'oje' uxlanibel-k'u'x awik'in y man taxibij-awi' roma xa man xkaken ta, xcha'.

²⁴K'ari' ri Gedeón xupaba-q'anej jun porobel chuwech ri Jehová. Re porobel re' xubini'aj Jehová Richin Uxlanibel-K'u'x, y re porobel re' k'a k'o na chiri' pa tinamit Ofrá, akuchi ek'o-wi ri e rijatzul ri Abiézer.

²⁵Y chupan k'a ri aq'a' ri' xubij ri Jehová chire: Tabek'ama-pe jun bóyix chikikojol ri q'ataj ruwákix ri atata', y jun chik bóyix ri k'o wuqu' rujuna'. Y tawulaj-el ri porobel richin ri Baal ri nuchajij ri atata'. Chuqa' tachoyo-el ri paban-che' richin ri Asera ri k'o junan rik'in ri porobel ri'.

²⁶Y ri chiri' chuwi-juyu' tapaba-q'anej jun porobel chinuwech yin Jehová ri in a-Dios. K'ari' xtabek'ama-pe ri bóyix ri k'o wuqu' rujuna', richin nasuj chinuwech yin pa ruwi' ri porobel; y ri paban-che' ri xaqasaj jari' nakusaj richin si', xcha'.

²⁷Xeri' ri Gedeón xerucha' e lajuj achi'a' chike ri rusamajela' rija', y xuben k'a achi'el ri rubin kan ri Jehová chire. Xaxe man xuben ta paq'ij roma nuxibij-ri' chikiwech ri ach'alalri'il richin ri rutata' y chuqa' chikiwech ri winaqi' richin ri tinamit, roma ri' chaq'a' xuben ri bin kan chire.

²⁸Ri nimaq'a' yan ri ruka'n q'ij, toq ri winaqi' xek'astej-q'anej, jari' toq xkitz'et chi ri porobel richin ri Baal wulan kan, y chuqa' ri paban-che' richin ri Asera ri k'o chiri' chunaqaj, xchoy-el y maneq chik. Y xkitz'et ri jun k'ak'a' porobel ri k'o chiri' ri xporox jun bóyix pa ruwi'.

²⁹Y xkik'utula' k'a chikiwech rije' ri achike xbanon re'. Kan janila k'a xkikanoj y xkik'utula' ke taq ri' y jari' toq xbekinabej-pe chi ja ri Gedeón ri ruk'ajol ri Joás ri xbanon. Y roma ri' xebe k'a rik'in ri Joás y xkibij chire:

³⁰Tajacha-pe ri ak'ajol chiqe richin niqakamisaj, roma ja rija' ri xwulan kan ri porobel richin ri Baal y chuqa' xuchoy-el ri paban-che' richin Asera, xecha'.

³¹Y ri Joás xubij k'a chike konojel ri kimolon-apo-ki' chiri': ¿Kan niwajo' rix nito' ri Baal? ¿Kan yixch'ojin pa ruk'exel rija'? Wi k'o jun chiwe rix ri nrajo' nuto' ri Baal, kan k'o k'a chi niken wakami yan. Y wi ri Baal kan qitzij dios, kan tuto' ri' ruyon rija' chuwech ri xwulan-el ri ruporobal, xcha'.

³²Chupan ri q'ij ri' jari' toq xkibij Jerubaal*f3* chire ri Gedeón, roma ja rija' ri xwulan ri porobel

³³Y xapon chik k'a ri q'ij chi ri winaqi' madianita, ri winaqi' amalecita y ri winaqi' ri ek'o pa relebel-q'ij, rije' xkimol chik ki', y kan jari' xeq'ax-pe re juk'an chik ruchi' ri raqen-ya' Jordán, y xek'oje-qa ri chiri' pa taq'aj rubini'an Jezreel.

³⁴Jari' ri Espíritu richin ri Jehová xpe rik'in ri Gedeón richin nuya' ruchuq'a', k'ari' rija' xuxupuj ri uk'a'. Y kan jari' toq xkimol k'a ki' ri e rijatzul ri Abiézer rik'in.

³⁵Xeruteq k'a achi'a' taluy rutzijol kik'in ri e rijatzul ri Manasés, y rije' chuqa' xkimol-ki' rik'in ri Gedeón. Chuqa' xeruteq achi'a' chuya'ik rutzijol chike ri tzobaj richin Aser, Zabulón y Neftalí, y konojel re' xejote-q'anej richin xkimol-ki' rik'in.

³⁶Jari' toq ri Gedeón xubij chire ri Dios: Wi kan qitzij yinakusaj richin ninkol ri tinamit Israel, achi'el ri abin, taya' jun retal chuwe.

³⁷Yin xtinya' kan jun sale'y richin karne'l ri akuchi nich'ay-wi trigo, y wi ri nimaq'a', ri sale'y ch'eqel roma ri raxq'ab y ri ruwach'ulew chaqi'j, jari' toq xtinnabej chi kan qitzij xkinakusaj richin yenkol ri nuwinaq, achi'el ri abin chuwe, xcha'.

³⁸Y kan keri' xbanatej, toq ri Gedeón xyakatej-el nimaq'a' yan, rija' xrelesaj jun leq ya' richin ri raxq'ab, chire ri sale'y toq xuyitz'.

³⁹Y ri Gedeón xubij chik chire ri Dios: Man tipe awoyowal chuwe wi yich'on chik jun bey awik'in; Xaxe chik k'a re jun bey re' nintejtobej rik'in ri sale'y. Wakami nink'utuj utzil chawe, chi ri sale'y chaqi'j ta y ri ruwach'ulew ch'eqel ta rik'in ri raxq'ab, xcha'.

⁴⁰Y chupan ri aq'a' ri' ri Dios kan keri' xuben; ri sale'y chaqi'j y ri ruwach'ulew ch'eqel-ch'eqel roma ri raxq'ab.