Read Kaqchikel Jue 7 Bible Online

Jue 7 - Kaqchikel bible

Jue 7

¹Y ri Gedeón, ri nibix chuqa' Jerubaal chire, y konojel ri ruwinaq ri ek'o-apo rik'in, xeyakatej k'a el nimaq'a' yan y xebe y xebek'oje' chunaqaj ri ralaxbel-ya' rubini'an Harod. Y pa xaman chire ri Gedeón y ri e ruwinaq chiri' k'a ek'o-wi ri aj-Madián, ek'o pa jun li'on ulew chuxe' ri juyu' rubini'an Moré.

²Ri Jehová xubij chire ri Gedeón: Ri winaqi' ri ek'o awik'in janila e k'iy richin yenjech ri aj-Madián pan aq'a', man xa roma ri' kiyon rije' xtikiya-qa kiq'ij y nikibij-qa chi roma ri kuchuq'a' rije' xech'akon.

³Wakami k'a tataluj rutzijol chikikojol konojel ri awinaq y tabij chike: Achike k'a chiwe rix ri xa nuxibij-ri' y nibaybot, titzolin kan pa rachoch, xcha'. Y toq ri Gedeón xuk'utuj chike, xetzolej k'a kan e 22,000 achi'a' y k'a xek'oje' na kan e 10,000 rik'in.

⁴Ri Jehová xubij chik chire ri Gedeón: Kan k'a e k'iy na ri xek'oje' kan awik'in; wakami ke'ak'uaj-el konojel chuchi' ri raqen-ya' y chiri' xkentejtobej-wi; y ri xtinbij chawe yin richin yebe awik'in, kan jari' xkebe awik'in; y ri xtinbij chawe yin, richin man yebe ta awik'in, kan xketzolej k'a kan, xcha'.

⁵K'ari' ri Gedeón xeruk'uaj-el ri achi'a' ri' chuchi' ri raqen-ya'; y ri Jehová kere' xubij chire: Ri e pa'el xtikik'en-qa ri kiya' rik'in ri kiq'a' y pa kiq'a' nikiqum-wi ri kiya', toq xke'uk'ya', juk'an ke'aya-wi; jak'a ri xkexuke-qa richin nikiqum ri kiya', chuqa' juk'an ke'aya-wi, xcha'.

⁶Y ri kajlabal ri achi'a' ri xkik'en-qa ri kiya' rik'in ri kiq'a' e 300; jak'a konojel ri ch'aqa' chik xa xexuke-qa chi ruqumik ri kiya'.

⁷Jari' toq ri Jehová xch'on chik rik'in ri Gedeón y xubij: Rik'in k'a re e 300 achi'a' re', ri xepa'e' toq xe'uk'ya', kik'in re' xkixinkol-wi, y xkenjech ri aj-Madián pan iq'a'; jak'a ri ch'aqa' chik achi'a' ketzolej chi taq kachoch, xcha'.

⁸Y ri Gedeón xeruk'en k'a kan ri janipe' bojo'y ri xkek'atzin chire y ri uk'a' ri yekixupuj; y k'ari' xeruteq-el chi taq kachoch konojel ri ch'aqa' chik achi'a' israelita, y xaxe xeruk'en kan ri e 300 achi'a'. Y ri winaqi' aj-Madián ek'o k'a qa pa taq'aj chikixe-qa rije'.

⁹Y chupan k'a ri aq'a' ri' ri Jehová xch'on rik'in ri Gedeón y xubij chire: Kayakatej k'a el y kabiyin-qa ri akuchi ek'o-wi-qa ri aj-Madián y kebe'achapa' chi oyowal; roma yin kan xenjech yan pan aq'a'.

¹⁰Y wi xa axibin-awi', nabey kebe'anachaj-qa ri aj-Madián, ri akuchi ek'o-wi y tak'uaj-el ri asamajel Purá, awik'in

¹¹richin nabewak'axaj-pe ri nikibij chikiwech; y rik'in ri' xtik'oje' awuchuq'a' richin xkayakatej chikij, xcha' chire. Y rija' kan keri' na wi xuben. Xbe k'a qa rachibilan-el ri Purá, y xe'apon akuchi ek'o-wi ri chajinela' kichin ri aj-Madián.

¹²Ri aj-Madián, y ri winaqi' amalecita y ri winaqi' ri yepe pa relebel-q'ij kinojisan k'a chijun ri li'on ulew ri' y kan janila e k'iy, kan achi'el toq ye'ok'ulun ri sak' ri xa man e ajlatel ta; y ri ki-camello kan janila chuqa' e k'iy achi'el ri sanayi' ri k'o chuchi' ri palou.

¹³Toq ri Gedeón xapon chikinaqaj ri chajinela', xrak'axaj chi k'o jun chike rije', nutzijoj chire ri rachibil jun rachik' ri xuben, y nubij k'a: Yin xinben jun achik' y kere' k'a ri xinwachik'aj: Xintz'et k'a jun nimalej kaxlan-wey ri banon rik'in cebada, ri nibolqo't peteneq y xoqaqa k'a re wawe' re akuchi ojk'o-wi-qa, y xoqaqa k'a chirij jun chike ri qachoch, y xutzeq. ¡Rik'in uchuq'a' k'a xoqaqa y kan xutzeqej-el jumul ri jay ri'!, xcha'.

¹⁴Y ri rachibil xubij chire: Man jun chik achike nel chi tzij re achik' re'. Re kaxlan-wey re' kan nuk'exewachuj ri Gedeón ri ruk'ajol ri Joás y ri ruwinaq israelita. Ri ki-Dios kan xojrujech yan pa ruq'a' ri Gedeón, qonojel roj ri oj aj-Madián y chuqa' ri ch'aqa' chik winaqi' ri ek'o qik'in, xcha'.

¹⁵Toq ri Gedeón xrak'axaj ri kitzij ri ka'i' achi'a' pa ruwi' ri achik' y ri nuk'exewachuj, kan jari' toq xxuke-qa y xuya' ruq'ij ri Jehová. Xtzolej k'a junanin ri akuchi ek'o-wi kan ri ruwinaq, y xubij chike: Kixyakatej, roma ri Jehová xerujech yan pa qaq'a' ri aj-Madián, y konojel ri ch'aqa' chik winaqi' ri ek'o kik'in, xcha'.

¹⁶Y kan xeruch'er ri ruwinaq pan oxi' tzobaj, e wok'al winaqi' pa jujun tzobaj, y chike chikijujunal xuya' jujun xupubel banon rik'in uk'a' y jujun antorcha ri kitz'apelon-el ruwi' kik'in bojo'y.

¹⁷Y xubij k'a el chike: Kan titzu' k'a jebel ri achike ri xtinben yin; kan keri' chuqa' tibana' rix. Toq xtitz'et chi yin yinaqajub-apo chuchi' ri akuchi ek'o-wi-qa ri aj-Madián, kan keri' chuqa' tibana' rix.

¹⁸Rix xtisutij-rij ri akuchi ek'o-wi-qa rije', y toq yin y konojel ri xkebe wik'in xtiqaxupuj ri xupubel, jari' toq xtixupuj chuqa' rix ri xupubel; y chuqa' xtireq-ichi' y xtibij: ¡Ri Jehová k'o qik'in! ¡Ri Gedeón k'o qik'in!, xkixcha', xcha'.

¹⁹Xeri' ri Gedeón y ri e wok'al achi'a' ri e beneq chirij xe'apon chuchi' ri akuchi ek'o-wi-qa ri aj-Madián, toq k'a juba' tikijel-ki' ri chajinela' pa nik'aj-aq'a'. Jari' toq xkixupuj ri xupubel y xkipaxij ri bojo'y ri kik'uan pa kiq'a'.

²⁰Y ri ch'aqa' chik kan nikixupuj chuqa' ri xupubel y xkipaxij ri bojo'y rokik kichapon ri antorcha rik'in ri kajxokon y ri xupubel ri kik'uan pa kijkiq'a', nikireq kichi' y nikibij: ¡Ri Jehová k'o qik'in! ¡Ri Gedeón k'o qik'in!, xecha'.

²¹Y konojel ri israelita jun xek'oje-wi chiri' akuchi e ya'on-wi y kisutin-rij ri akuchi ek'o-wi-qa ri aj-Madián; y toq ri aj-Madián xkak'axaj y xkitz'et ri', jari' toq xe'animej-el y nikireq kichi' xebe.

²²Y ri oxi' tzobaj achi'a' kan nikixupula' ri kixupubal; y ri Jehová xuben k'a chike ri aj-Madián chi kiyon rije' xkikamisala-qa-ki' chikiwech chi espada, chiri' ri akuchi ek'o-wi-qa. Y ri ch'aqa' aj-labal kichin ri aj-Madián, xe'animej y ek'o xe'apon k'a pa Bet-sitá, ch'aqa' chik xe'apon k'a pa tinamit Sererá, y ri ch'aqa' chik xe'apon chunaqaj ri tinamit Abel-meholá chuwech-apo ri Tabat.

²³Y ri tzobaj richin ri Neftalí, Aser, y Manasés, xkimol-ki' richin xekoqotaj-el ri aj-Madián.

²⁴Ri Gedeón chuqa' xuteq rutzijol kik'in ri tzobaj richin Efraín, y xubij: Kixqaqa-pe richin yo'ik'ulu-el ri aj-Madián. Kixbek'oje' k'a chuchi' ri raqen-ya' Jordán ri akuchi xax juba' rupan ri ya' ri napon k'a pa Bet-bará, richin chi ixk'o chik chiri' toq xke'apon ri aj-Madián, xcha'. Rije' kan xkiben achi'el ri xbix-el chike.

²⁵Chiri' xekichop k'a ri e ka'i' tata'al kichin ri aj-Madián ri kibini'an Oreb y ri Zeeb. Jak'a ri Oreb xkikamisaj chiri' pa ruwi' jun nimalej abej, y roma ri' xubini'aj Ri Abej Richin Oreb. Jak'a ri Zeeb xkikamisaj chiri' pa jun yitz'bel-uva, y roma ri' xubini'aj Yitz'bel-Uva Richin Zeeb. Toq xetane' chi kitzeqelibexik ri aj-Madián, ri tzobaj richin Efraín xetzolej y xkik'uaj ri ka'i' jolomaj chire ri Gedeón ri k'o kan pa Canaán.