Read Kaqchikel Jue 8 Bible Online

Jue 8 - Kaqchikel bible

Jue 8

¹Jak'a ri winaqi' richin Efraín xkibij chire ri Gedeón: ¿Achike k'a roma man xojawoyoj ta toq xabebana' oyowal kik'in ri aj-Madián?, xecha' chire. Y kow k'a xech'on rik'in.

²Y rija' xubij chike: ¿Nich'ob rix chi ri xiben kan maneq rejqalen chuwech ri xqaben roj ri oj rijatzul ri Abiézer? Roma ri xiben rix ri aj-Efraín pa ruk'isibel kan más rejqalen chuwech ri xqaben roj ri pa rutikeribel.

³Ri Dios xujech pan iq'a' ri Oreb y ri Zeeb, ri e tata'al kichin ri aj-Madián. ¿Achike ta k'a ok ri xinben yin richin nijunamaj rik'in ri xiben rix?, xcha'. K'ari' xik'o-qa ri koyowal ri aj-Efraín y man jun chik xkibij.

⁴Ri Gedeón y ri e 300 achi'a' xe'el k'a el chiri' pa Canaán, y xkiq'axaj ri raqen-ya' Jordán. Stape' janila e q'itajineq chik roma wayjal, kan k'a e beneq na richin e kitzeqeliben-el ri e etzelanel kichin.

⁵Toq xe'apon k'a pa tinamit Sucot, jari' toq ri Gedeón xubij chike ri winaqi' aj chiri': Nink'utuj utzil chiwe chi niya' ta juba' kiway ri nuwinaq ri e wachibilan-pe, roma janila e q'itajineq chik roma wayjal, y roj e qatzeqeliben-pe ri e ka'i' rey richin ri Madián, ri kibini'an Zebáh y ri Salmuná, xcha'.

⁶Y ri achi'a' ri k'o kiq'ij ri e richin ri Sucot xkibij chire: ¿Kan xeqaqa yan k'a pan aq'a' ri rey Zebáh y ri rey Salmuná richin naben chiqe chi niqaya' kiway ri achi'a' ri e peteneq chawij?, xecha'.

⁷K'ari' ri Gedeón xubij chike: Toq ri Jehová xkerujech pa nuq'a' ri e ka'i' rey ri', yin xkixinrapaj rik'in jalajoj ruwech k'ix richin ri tz'iran ruwach'ulew, xcha'.

⁸Y xel-el chiri' y xjote-q'anej pa tinamit Penuel, y xuk'utuj chuqa' utzil chike achi'el xuk'utuj chike ri aj-Sucot, jak'a ri aj-Penuel xa xkibij-pe chire achi'el xkibij ri aj-Sucot.

⁹Y rija' chuqa' xubij chike ri aj-Penuel: Toq yin xkitzolej-pe rik'in ch'akonik, kan xtinwulaj k'a ri kachoch ri chajinela' akuchi nito-iwi', xcha'.

¹⁰Y ri Zebáh y ri Salmuná ek'o chiri' pa tinamit Carcor, e kachibilan e 15,000 aj-labal; konojel re' jare' ri k'a ek'o kan chike ri achi'a' ri xeyakatej chikij ri israelita, roma xa xeken yan e 120,000 achi'a' chike rije'.

¹¹Ri Gedeón y ri rachibil xejote' k'a q'anej chupan ri bey ri akuchi nitiker-wi-el ri tz'iran ruwach'ulew, ri k'o pa relebel-q'ij chike ri tinamit Nobáh y ri Jogbehá. Xe'ok jumul ri akuchi ek'o-wi-qa ri e rijatzul ri Madián, roma ri chajinela' xa man jun nikimey toq xe'apon kik'in.

¹²Y ri Zebáh y ri Salmuná xe'animej, jak'a ri Gedeón y ri rachibil kan xekitzeqelibej; y xekichop chi e ka'i'. Y konojel ri aj-labal kichin rije' kan janila xkixibij-ki'.

¹³Xeri' ri Gedeón y ri rachibil xetzolej-pe pan oyowal, y e peteneq k'a chupan ri bey richin ri chuwa taq juyu',

¹⁴y xkichop k'a jun ala' ri aj chiri' pa Sucot, y xkiben chire chi xubij ri nikajo' niketamaj rije'. Y ri ala' ri' kan xutz'ibaj k'a kibi' e oxk'al wuqlajuj achi'a' ri e aj-raqen y achi'a' ri k'o kiq'ij ri kan e aj chiri'.

¹⁵Y jari' toq ri Gedeón xok-apo ri pa tinamit Sucot, y xch'on kik'in ri winaqi' y xubij chike: Ri Zebáh y ri Salmuná jare' e nuchapon chik pe. Toqaqa chi'ik'u'x chi koma rije' xixtze'en chuwij y man xiya' ta kiway ri nuwinaq toq janila e kosinaqi', y rix xa xibij chuwe: ¿Ek'o chik k'a ri Salmuná y ri Zebáh pan aq'a' richin naben chiqe chi niqaya' kiway ri awinaq?, xixcha' chuwe, xcha' ri Gedeón.

¹⁶Y ri Gedeón xeruchop k'a konojel ri e oxk'al wuqlajuj achi'a' ri', y xerurapaj rik'in jalajoj ruwech k'ix richin ri tz'iran ruwach'ulew.

¹⁷Y keri' chuqa' xuwulaj ri kachoch ri chajinela' richin nikito-ki' ri winaqi', ri ek'o chiri' pa Penuel, y xerukamisaj chuqa' konojel ri winaqi' richin ri tinamit.

¹⁸K'ari' ri Gedeón xuk'utuj chike ri Zebáh y ri Salmuná: ¿Achike kibanik ri achi'a' ri xe'ikamisaj ri chiri' pa juyu' Tabor?, xcha'. Y rije' xkibij: Achi'el abanik rat; keri' kibanik rije', y ri yetzu'un kan achi'el e ruk'ajol jun rey, xecha'.

¹⁹Y rija' xubij chike: ¡Ri' kan e wach'alal, kan e ral wi ri nte'! Chuwech ri Jehová ninbij, wi rix man ta xe'ikamisaj, yin chuqa' man ta yixinkamisaj, xcha'.

²⁰Y xeri' ri Gedeón xubij chire ri Jéter ri nabey ruk'ajol: Konojel la' e awichin rat, kayakatej chikij y ke'akamisaj, xcha'. Jak'a ri ala' man xuben ta keri'. Man xrelesaj ta ri ru-espada, y xa xuxibij-ri' roma k'a ti ko'ol.

²¹Xeri' ri Zebáh y ri Salmuná xkibij: Más utz ja rat Gedeón, yakamisan qichin; richin keri' niq'alajin chi kan k'o awuchuq'a', xecha'. K'ari' ri Gedeón xerukamisaj k'a ri e ka'i' rey ri' y xuk'en kan ri kichinaj ri ki-camello ri achi'el nik'aj-ik' rubanik.

²²Chirij ri' ri israelita xkibij chire ri Gedeón: Taq'ata-tzij pa qawi', rat y ri awijatzul chuqa', roma xojakol pa kiq'a' ri aj-Madián, xecha'.

²³Jak'a ri Gedeón xubij chike ri ruwinaq: Yin man ninq'et ta tzij pan iwi' rix, ni ta ri nuk'ajol; roma kan ja ri Jehová ri xtiq'aton-tzij pan iwi', xcha'.

²⁴Chuqa' xubij chike: Yin ninwajo' nink'utuj jun nimalej utzil chiwe; chi chi'ijujunal ta niya-pe chuwe ronojel ri ruwi-ixkinaj ri imajon kan chuwi-kiq'a' ri e etzelanel qichin, xcha'. Ri Gedeón xubij keri' roma ri aj-Madián kan nikikusaj k'iy ri ruwi-ixkinaj, ri e banon rik'in q'anapueq, achi'el ri nikikusaj ri winaqi' ismaelita.

²⁵Rije' xkibij: Rik'in k'a ronojel qánima niqaya' chawe, xecha'. Y xkirik' k'a qa jun tzieq, y chiri' xkiyala' kan chikijujunal ri ruwi-ixkinaj ri banon rik'in q'anapueq ri kimajon kan chuwi-kiq'a' ri e etzelanel kichin.

²⁶Y ri ralal ronojel ri xmolotej, xuben jubama kawineq libra, y man xetex ta ri ichinaj ri e tzeqel chikiqul ri rey richin Madián, ni ri tzieq ri q'eqq'oj-keq yetzu'un ri nikikusaj rije', y chuqa' man xetex ta ri kichinaj ri camello.

²⁷Rik'in ri q'anapueq ri xmolotej, ri Gedeón xuben jun tzieq achi'el ri nukusaj ri nimalej sacerdote; y re tzieq re' xuyek pa tinamit Ofrá; y chijun tinamit Israel xa xbe kánima rik'in ri tzieq ri'; y xa xok jun pikbel chire ri Gedeón y chike ri e aj pa rachoch.

²⁸Keri' k'a toq xqasex kiq'ij ri aj-Madián koma ri israelita, y man jun bey chik k'a xeyakatej chikij. Kan xk'oje' k'a uxlanenri'il kik'in ri israelita kawineq juna', rokik k'a k'es ri Gedeón.

²⁹Xeri' ri Gedeón, ri nibix chuqa' Jerubaal chire, xtzolej chirachoch.

³⁰Rija' xek'oje' k'a e oxk'al lajuj ralk'ual, roma janila e k'iy rixjayil xek'oje'.

³¹Y chuqa' xk'oje' jun ru-concubina,*f4* ri chiri' pa Siquem; y xk'oje' jun ralk'ual rik'in ri xubini'aj Abimélec

³²Y xken k'a ri Gedeón toq k'iy chik rujuna' rukochin, y xmuq k'a ri akuchi muqun-wi ri Joás ri rutata'; chiri' pa tinamit Ofrá ri kichin ri rijatzul kan ri Abiézer.

³³K'a man jani k'a k'iy q'ij tiken-el ri Gedeón, ri israelita kan chi'anin k'a xkichop chik jun bey ri itzel taq banobel y xkiya' chik kiq'ij ri jalajoj kiwech dios, y ja ri dios Baal-berit xkicha' richin xok ki-dios.

³⁴Ri israelita ni man xoqaqa ta k'a chikik'u'x ri Jehová ri ki-Dios ri xkolon kichin chikiwech ri e etzelanel kichin ri ek'o chikinaqaj;

³⁵ni chuqa' kan man jun chik matioxinik xkik'ut ta chikiwech ri e aj pa rachoch kan ri Gedeón ri nibix Jerubaal chire, stape' janila chi utzil xuben kan rik'in ri tinamit Israel.