Read Kaqchikel Jue 9 Bible Online

Jue 9 - Kaqchikel bible

Jue 9

¹Ri Abimélec ruk'ajol kan ri Jerubaal xbe pa tinamit Siquem richin xbech'on kik'in ri ruch'utitata' ri e ruxibal rute' y chuqa' kik'in konojel ri ach'alalri'il ri', y kere' xubij chike:

²Yin nink'utuj utzil chiwe chi tik'utuj chike konojel winaqi' ri ek'o pa Siquem, ri achike ta ri niqa' chikiwech, wi ja ri e oxk'al lajuj achi'a' ri e ruk'ajol kan ri Jerubaal, ri yeq'aton-tzij pa qawi' o xaxe ta jun ri niq'aton-tzij. Y toqaqa chikik'u'x chi xaxe yin ri Abimélec ri junan qakik'el kik'in.

³Y ri e ruch'utitata' xkibij k'a chike ri kiwinaq aj-Siquem; y rije' xqa' chikiwech chi xaxe jun ri niq'aton-tzij pa kiwi' y ja ta ri Abimélec, y roma ri' rije' nikibila' k'a: Re' kan qach'alal-qi' rik'in, xecha'.

⁴Xeri' rije' xkiya-el oxk'al lajuj raqen saqipueq chire ri Abimélec, ri yakel chiri' pa rachoch ri dios Baal-berit, y rik'in ri' ri Abimélec xerutoj-el itzel taq achi'a' ri e q'ori' richin xebe chirij.

⁵Y rija' xeruk'uaj-el pa tinamit Ofrá ri akuchi k'o-wi kan ri rachoch ri rutata', y xekikamisaj k'a konojel ri e rach'alal ri e ruk'ajol kan ri Jerubaal ri rutata'; pa ruwi' k'a jun abej xekikamisaj-wi, y xaxe chik k'a ri Jotam ri más chaq'laxel ri xkolotej kan, roma rija' xanimej y xrewaj-ri'.

⁶K'ari' xkimol-ki' konojel winaqi' aj-Siquem y konojel ri ek'o pa Bet-miló, y xkiben chire ri Abimélec richin xok rey pa kiwi'; y re' xbanatej chunaqaj ri taq'aj ri akuchi k'o-wi ri paban-abej chukojol ri paten-che' ri ek'o chiri' pa Siquem.

⁷Toq ri Jotam xunabej ronojel re', rija' xjote-q'anej pa ruwi' ri juyu' Guerizim, y chiri' rik'in janila uchuq'a' xch'on-pe y xubij: Kiniwak'axaj chi'iwonojel rix achi'a' aj-Siquem, y ri Dios kan xtrak'axaj ri xtibij rix.

⁸K'o k'a jun bey ri che' xebe richin xbekikanoj jun rey, richin nik'oje' pa kiwi', y xkibij chire ri che' rubini'an olivo chi nok rey pa kiwi'.

⁹Jak'a ri che' richin olivo xubij chi man ruk'amon ta nuya' kan chi niwachin, Xaxe richin chi nibe'ok nim pa kiwi' ri che', roma rik'in ri ru-aceite niya'ox ruq'ij ri Dios y kiq'ij ri winaqi'.

¹⁰Ri che' xebe chik k'a rik'in ri wíkix, y xkibij chire chi tok rey pa kiwi'.

¹¹Jak'a ri wíkix xubij chuqa' chike chi man ruk'amon ta nuya' kan chi nuwachij ri jebelej taq ruwech, ri kan jebel ruki'il, xaxe richin chi nibe'ok nim pa kiwi' ri che'.

¹²K'ari' xebe chik k'a rik'in ri juwi-uva, y xkibij chire: Katanpe k'a rat ri' richin yatok rey pa qawi', xecha'.

¹³Y ri juwi-uva ri' xubij chi man ruk'amon ta nuya' kan chi nuwachij ri vino ri nuya', xaxe richin chi nibe'ok nim pa kiwi' ri che', roma ri vino nuben chire ri Dios y ri winaqi' richin yekikot.

¹⁴Pa ruk'isibel, konojel ri che' xkibij chire ri k'ix chi ja k'a rija' tok rey pa kiwi' ri'.

¹⁵Y ri k'ix ri' xubij chike ri che' chi wi qitzij chi ja rija' xkicha' richin nok rey pa kiwi', kan kepe k'a konojel richin nikito-ki' chuxe' ri rumujal. Y wi man keri' ta, kan tel k'a q'aq' chire ri k'ix ri', y tuk'isa' k'a ronojel ri tiox-che' richin ri Líbano, xcha' ri Jotam.

¹⁶Y ri Jotam xuk'utuj k'a chike, y xubij: ¿Kan rik'in k'a qitzijri'il y ch'ajch'ojil xikusaj kan rey ri Abimélec? ¿Kan utz kami ibanon kik'in ri e aj pa rachoch ri Jerubaal? ¿Kan ibanon kami achi'el ri ruk'amon chire ri utzil ri xuben rija' iwik'in rix?

¹⁷Toqaqa chi'ik'u'x chi ri nata' kan xuben oyowal iwoma rix, y xuya' ri' pa kamik richin xixkolotej pa kiq'a' ri aj-Madián.

¹⁸Jak'a re wakami rix xa xixyakatej chikij ri e aj pa rachoch ri nata', y xe'ikamisaj ri ruk'ajol pa ruwi' jun abej; y xa ja ri Abimélec ri ruk'ajol kan ri nata' rik'in jun chike ri raj-ik', ri xicha' richin xikusaj kan rey pan iwi', y re' xiben xaxe roma rija' iwach'alal.

¹⁹Jak'a yin ninbij chiwe wakami: Wi kan qitzij rik'in ruchojmilal ibanon rik'in ri nata' Jerubaal y kik'in ri e aj pa rachoch, kan kixkikot k'a rik'in ri Abimélec, y rija' xtikikot iwik'in rix.

²⁰Wi man keri' ta, kan tel k'a pe q'aq' rik'in ri Abimélec richin xkixruk'is iwonojel rix aj-Siquem y rix ri ixk'o pa Bet-miló; y chuqa' iwik'in rix tel k'a pe q'aq' richin nuk'is ri Abimélec, xcha' chike.

²¹Toq xuk'is k'a rubixik ronojel re', ri Jotam xanimej, y xbe pa tinamit Beer. Chiri' xk'oje-wi roma nuxibij-ri' chuwech ri Abimélec ri rach'alal.

²²Toq ri Abimélec xq'aton yan tzij oxi' juna' pa ruwi' ri tinamit Israel,

²³ri Dios xuben k'a chi xech'aratej ri Abimélec y ri achi'a' aj-Siquem; y ri achi'a' ri' xeyakatej k'a chirij ri Abimélec.

²⁴Kere' xbanatej richin rutojbalil ri kikamik ri e ralk'ual ri Jerubaal; ri kikik'el ri xbiyin kan xqaqa pa ruwi' ri Abimélec ri xkamisan kichin, y pa kiwi' chuqa' ri aj-Siquem ri xeya'on ruchuq'a' ri Abimélec.

²⁵Y ri aj-Siquem xekiyala' achi'a' pa taq juyu' richin chi ye'eleq'an kan kik'in ri winaqi' ri yeq'ax-el chupan ri bey ri napon pa Siquem; richin chi nikiya' pa k'ayew ri Abimélec. Y re' kan xbetzijox k'a chire rija'.

²⁶K'o k'a jun achin rubini'an Gáal ruk'ajol ri Ébed; rija' e rachibilan ri rach'alal xe'apon pa Siquem. Chiri' xek'oje-wi, y ri aj-Siquem xkikuquba' kik'u'x rik'in ri Gáal.

²⁷Y ri winaqi' aj-Siquem xebe k'a pa juyu' chuwuxik uva; k'ari' xkiyitz' y xkichop nimaq'ij; y xe'ok pa rachoch ri ki-dios; xewa' y xe'uk'ya' chiri', y xkisik'ij itzel oyonik pa ruwi' ri Abimélec.

²⁸Y ri Gáal ruk'ajol ri Ébed k'o k'a apo chiri' y xubij: ¿Achike ta chik k'a ri qatinamit Siquem, richin chi roj oj rusamajela' ri Abimélec? Rija' xa jun ruk'ajol ri Jerubaal, y ri nito'on richin ja ri Zebul. Kan más utz kixok rusamajel jun ri kan qawinaq, ri rijatzul kan ri Hamor ri xpaban-q'anej ri tinamit Siquem. ¿Achike k'a roma toq rix iya'on-iwi' pa ruq'a' ri Abimélec?

²⁹K'ate' ta pa nuq'a' yin k'o-wi re tinamit re'; keri' yin kan chi'anin ta ninwelesaj-el ri Abimélec, y ninbij ta chire: Katel-pe Abimélec y ke'ak'ama-pe ri aj-labal richin no'abana' oyowal wik'in, yicha' ta chire, xcha'.

³⁰Toq ri Zebul ri q'atoy-tzij pa ruwi' ri Siquem, xrak'axaj ri nubij ri Gáal, xyakatej k'a janila royowal,

³¹y xuteq rubixik pa tinamit Arumá chire ri Abimélec, y xubij-el chire: Ri Gáal ruk'ajol ri Ébed y ri e rach'alal, xepe wawe' pa Siquem, y wakami yekitaqchi'ij ri winaqi' richin yeyakatej chawij.

³²Wakami k'a re aq'a' re' katel-pe rat y ri aj-labal ri ek'o awik'in, y tiwewaj-iwi' pa taq juyu'.

³³Y nimaq'a' yan toq nel-pe ri q'ij, tachapa' ri tinamit; y toq ri Gáal y ri winaqi' ri ek'o rik'in xke'el-pe chawij, jari' toq xtaben ri k'atzinel richin naben kik'in, xcha-el.

³⁴Y chupan k'a ri aq'a' ri' ri Abimélec y konojel ri ruwinaq ri e richin oyowal ri ek'o rik'in, xe'el-pe y xokewaj-ki' chunaqaj ri Siquem, y ri ruwinaq e ruch'aron pa kaji' tzobaj.

³⁵Y ri ruka'n q'ij nimaq'a' yan, ri Gáal xel k'a pe y xpa'e' chiri' chuchi' ri tinamit. Jari' toq ri Abimélec y ri ruwinaq ri e richin oyowal, xeyakatej-pe ri akuchi kewan-wi ki'.

³⁶Y jari' ri Gáal xerutz'et ri aj-labal y xubij k'a chire ri Zebul: Tatz'eta' la winaqi' e peteneq pa ruwi' la juyu', xcha'. Y ri Zebul xubij: Ri natz'et rat xa ja ri rumach'ach'il la juyu' achi'el xa ta e winaqi', xcha'.

³⁷Y ri Gáal xubij chik k'a: Wakami nintz'et chi kan ek'o winaqi' e xulan-pe chukojol la juyu'. Chuqa' k'o jun tzobaj aj-labal ri e peteneq chupan ri bey akuchi k'o-wi ri paten-che' kichin ri aj-itza', xcha'.

³⁸Jari' toq ri Zebul xubij chire ri Gáal: ¿Akuchi k'o-wi ri ach'abel wakami, toq xabij: ¿Achike ta chik k'a ri Abimélec richin yojok rusamajela'?, xacha'. ¿Man ja ta k'a winaqi' re' ri xaben chike chi maneq kejqalen? Wakami k'a kabiyin y tabebana' oyowal kik'in, xcha' chire.

³⁹Ri Gáal kan xel k'a pe richin niberubana' oyowal rik'in ri Abimélec, y ja rija' ri ik'owineq-pe chikiwech ri aj-Siquem.

⁴⁰Jak'a ri Gáal xa xanimej y xbe pa tinamit, y ri Abimélec xutzeqelibej-el y e k'iy k'a xeken, y keri' xkiben k'a xe'apon na chuchi' ri Siquem.

⁴¹K'ari' ri Abimélec xtzolin pa tinamit Arumá; y ri Zebul xerelesaj k'a el ri Gáal y ri e rach'alal chiri' pa tinamit Siquem.

⁴²Pa ruka'n q'ij ri winaqi' aj-Siquem xebe pa taq juyu' chupan ri kitiko'n. Y xbeya'ox k'a rutzijol chire ri Abimélec.

⁴³y rija' xerumol k'a ri ruwinaq y xeruch'er pa oxi' tzobaj, y xuya' k'a pikbel pa taq juyu'. Y toq xekitz'et chi ri aj-Siquem xebe'el-pe pa tinamit, jari' toq xebe'el-pe akuchi kewan-wi-ki' y xekichop k'a chi oyowal.

⁴⁴Ri ka'i' tzobaj aj-labal, ye'ajin chi oyowal y xekikamisaj ri winaqi' ri e beneq pa taq kitiko'n. Rokik ri' ri Abimélec y ri jun chik tzobaj achi'a' kan anineq k'a xebe chuchi' ri tinamit.

⁴⁵Ri Abimélec y ri achi'a', kan chijun k'a q'ij xkiben oyowal kik'in ri winaqi' richin ri tinamit ri', y kan xekich'ek k'a. Xe'ok k'a chupan ri tinamit y xekikamisaj konojel ri winaqi' ri ek'o chiri', y xkitoloba' kan jumul, y k'ari' xkikiraj kan atz'an pa ruwi' chijun ri tinamit.

⁴⁶Toq ri winaqi' xkak'axaj ronojel re', konojel ri ek'o pa Migdal-siquem xbekewaj-ki' chupan ri kachoch ri chajinela' ri k'o ri akuchi k'o-wi rachoch ri ki-dios Baal-berit, y ronojel ri jay ri' jebel tz'apen-rij chi tz'aq.

⁴⁷Y xya'ox k'a rutzijol chire ri Abimélec, chi konojel ri winaqi' aj-Migdal-siquem kimolon-ki' chupan ri kachoch ri chajinela'.

⁴⁸Jari' toq ri Abimélec xuk'uaj k'a jun ikej y xjote-q'anej pa juyu' rubini'an Salmón, rija' y konojel ri aj-labal. K'ari' xuchoy k'a jun ruq'a-che' chaqi'j y xuya-q'anej chuwi-rutele'n, y xubij chike ri achi'a' ri e beneq rik'in, chi tikibana' chi'anin achi'el ri xuben rija'.

⁴⁹Y chikijujunal k'a ri achi'a' ri' xekichoy k'a ruq'a' taq che' chaqi'j, y k'ari' xkitzeqelibej-el ri Abimélec. Y xbekiya' k'a chunaqaj ri jay tz'apen-rij chi tz'aq, y k'ari' xkiya' ruq'aq'al ri ruq'a' taq che' ri', y xeken jun la'eq e 1,000 winaqi' chi achi'a' chi ixoqi'.

⁵⁰Chirij re' ri Abimélec xbe pa tinamit Tebés; xusutij-rij, y xok chupan.

⁵¹Pa runik'ajal ri tinamit ri' k'o jun kachoch ri chajinela' ri jebel tz'apel-rij chi tz'aq, y chiri' xbekewaj-ki' konojel ri winaqi' ri e richin ri tinamit ri', chi achi'a' chi ixoqi'. Xkitz'apej kan ruchi', y xejote-q'anej k'a pa ruwi'.

⁵²Xapon k'a ri Abimélec chuchi' ri kachoch ri chajinela', y xuchop oyowal, y kan nuya' yan k'a ruq'aq'al.

⁵³Jari' toq jun ixoq ri k'o pa ruwi' ri kachoch ri chajinela' xberuk'aqa-pe jun ruq'a' ka' pa rujolon, y kan xpax ri rujolon.

⁵⁴Xeri' ri Abimélec xroyoj chi'anin ri chajinel richin y xubij chire: Chi'anin tawelesaj ri a-espada y kinakamisaj, richin chi man tibix chuwij: Xa jun ixoq xkamisan richin, xkecha', xcha' rija'. Ri chajinel richin, xrelesaj k'a ri ru-espada y xukamisaj.

⁵⁵Y toq ri ch'aqa' chik israelita xkitz'et chi xken ri Abimélec, xetzolej chikijujunal pa taq kachoch.

⁵⁶Kere' k'a rutojbalil xuya' ri Dios chire ri Abimélec roma ri itzel ri xuben chire ri rutata', toq xerukamisaj ri e rach'alal.

⁵⁷Chuqa' ronojel ri etzelal ri xkiben ri aj-Siquem, ri Dios xuben chike chi xkitoj na, y kan xqaqa k'a pa kiwi' rije' ri itzel oyonik ri xubij ri Jotam ri ruk'ajol kan ri Jerubaal.