Read Kaqchikel Apocalipsis 10 Bible Online

Apocalipsis 10 - Kaqchikel bible

Apocalipsis 10

¹Yin xintz'et chik k'a chi chila' chikaj chupan jun sutz' peteneq jun ángel, ri kan k'o uchuq'a' pa ruq'a' ri pa rujolon k'o jun kotoq'a', ri rupalej achi'el ri q'ij, y ri raqen achi'el ruxaq q'aq'.

²Ri pa ruq'a' ruk'uan jun ti wuj ri jaqel. K'ari' xuya-qa ri raqen ri k'o pa rijkiq'a' pa ruwi' ri palou, y ri jun chik raqen xuya-qa pa ruwi' ri ruwach'ulew.

³Re ángel re', rik'in k'a ronojel ruchuq'a' xch'on, kan achi'el toq niq'ajan jun koj. Y toq ch'owineq chik qa, chuqa' ek'o wuqu' achi'el koqolajay ri xech'on-pe chire.

⁴Toq e ch'owineq chik k'a pe ri wuqu' achi'el koqolajay ri', yin xinben chi nintz'ibaj-qa ri xkibij. Jak'a k'o jun aj-chikajil ch'abel ri xubij-pe chuwe: Man tatzijoj ri ch'abel ri xkibij ri wuqu' achi'el koqolajay, y man tatz'ibaj, xcha'.

⁵K'ari' xintz'et chi ri ángel ri ruya'on jun raqen chupan ri palou y chuqa' ri pa ruwi' ri ruwach'ulew, xutzeqej ri rijkiq'a' chikaj,

⁶y xuya' rutzij pa rubi' ri Dios ri kan k'es ri tibe-q'ij tibe-seq, ri xbanon ri kaj y ronojel ri ek'o chuwech, ri xbanon ri ruwach'ulew y ri ek'o chuwech, ri xbanon ri palou y ri ek'o chupan; chi ri q'ij jari' xtz'aqet yan.

⁷Roma xaxe toq xtuxupuj ri trompeta ri ruwuq ángel, jari' toq xtitz'aqet y ronojel ri e ewatel xkebeq'alajin-pe achi'el ri ruq'alajirisan chike ri rusamajela' y ri e q'alajirisey ruch'abel ri Dios, xcha'.

⁸Y ri aj-chikajil ch'abel ri xinwak'axaj yan, xch'on chik k'a pe chuwe jun bey y xubij: Kabiyin y tabek'ama-pe la jun ti wuj jaqel pa ruq'a' la ángel ri pa'el pa ruwi' ri palou, y ri ruwach'ulew, xcha'.

⁹Kan xibe na wi apo rik'in ri ángel, y xink'utuj ri ti wuj chire. Y rija' xubij chuwe: Ja re' y tatija'. Y xtana' k'a chi ri pan achi' achi'el ruki'il ri kab. Jak'a ri pan apan k'ey-k'ey xtuben, xcha' chuwe.

¹⁰Yin kan xink'ul ri ti wuj pa ruq'a' ri ángel, y xintej-qa. Y xinna' na wi pa nuchi' chi kan achi'el ruki'il ri kab, jak'a ri pa nupan kan k'ey-k'ey na wi xuben.

¹¹K'ari' xubij chuwe: K'o k'a chi naq'alajirisaj jun bey chik ri nubij ri Dios pa kiwi' ri tinamit, ri ruwach'ulew, ri rey y ri winaqi' ri jalajoj kich'abel, xcha'.