Read Kaqchikel Apocalipsis 16 Bible Online

Apocalipsis 16 - Kaqchikel bible

Apocalipsis 16

¹Y k'ari' xinwak'axaj chi k'o jun ri nim ruch'abel nich'on-pe ri chiri' chupan ri rachoch ri Dios y xubij k'a chike ri wuqu' ángel: Kixbiyin chuq'ejik pa ruwi' ri ruwach'ulew ronojel ruwech ruk'ayewal ri nuya' ri Dios, xcha'.

²Kan jari' toq xbe ri nabey ángel y xberuq'eja' kan pa ruwi' ri ruwach'ulew ri k'o-el chupan ri qumbel ri ruk'uan. Y xuben chi xe'el-pe itzel ch'a'k chikij ri winaqi' ri xeya'on ruq'ij ri ruwachibel ri nabey chikop y kik'uan retal ri nik'aj-kiwech o ri pa kiq'a'.

³Keri' chuqa' ri ruka'n ángel xberuq'eja' kan ri k'o-el chupan ri qumbel pa ruwi' ri palou. Y ri palou ri' xok achi'el rukik'el jun kamineq, y roma ri' konojel ri k'o kik'aslen ri ek'o chiri', xeken.

⁴K'ari' ri rox ángel xberuq'eja' kan ri ruk'uan chupan ri qumbel pa kiwi' ri raqen taq ya' y pa kiwi' ri alaxibel taq ya'. Y re ya' re' chuqa' xe'ok kik'.

⁵K'ari' ri ángel ri ya'on uchuq'a' pa ruq'a' pa kiwi' ri ya', xch'on y xubij: Ajaw Dios, rat kan jantape' atk'o-pe y jantape' xkak'oje-apo. Rat kan at choj y at loq'olej. Ri aq'atoj-tzij kan pa ruchojmilal ri naben.

⁶Roma kan naya' rutojbalil chike ri xekamisan kichin ri awalk'ual y ri e asamajela' ri xeq'alajirisan ri ach'abel. Y kan utz rubanik naben chike chi tikiqumu' kik', roma jari' ri ruk'amon chi nikik'ul, xcha'.

⁷Y jari' toq yin xinwak'axaj chi k'o jun ri nich'on-pe rik'in ri porobel, y nubij: Kan keri' wi ajaw Dios ri k'o ronojel uchuq'a' awik'in, kan niq'alajin k'a chi ri aq'atbel-tzij kan qitzij y kan choj, xcha'.

⁸Jari' toq ri rukaj ángel xuq'ej ri k'o-el chupan ri qumbel pa ruwi' ri q'ij. Y ri q'ij kan xjach uchuq'a' pa ruq'a' chi keruporoj ri winaqi' rik'in ri ruq'aq'al.

⁹Y kan keri' k'a xk'uluwachitej, ri q'ij kan itzel-wi chi k'atik xuben ri chike ri winaqi' y man rik'in ri' ri winaqi' kan man xubij ta juba' kánima chi xtzolej ta kik'u'x rik'in ri Dios o xkiya' ta chuqa' ruq'ij-ruk'ojlen. Pa ruk'exel ri' xa xkiyoq' rubi' ri Dios ri taqayon-pe ri ruk'ayewal.

¹⁰Ri ro' ángel xberuq'eja' k'a kan ri ruk'uan chupan ri qumbel, pa ruwi' ri rutz'uyubal ri nabey chikop y ri rajawaren. Y xqaqa k'a jun nimalej q'equ'm pa kiwi', y roma ri ruk'ayewal ri' ri winaqi' kan nikikach'ala' kaq'.

¹¹Man rik'in ri' kan man xtzolin ta kik'u'x rik'in ri Dios richin xkiya' ta kan rubanik ri etzelal pa ruk'exel ri' xa xkiyoq' ri Dios ri k'o chila' chikaj, roma ri q'axomal y ri itzel ch'a'k ri k'o chikij.

¹²Ri ruwaq ángel xberuq'eja' kan pa ruwi' ri nimalej raqen-ya' Éufrates ri ruk'uan-el chupan ri qumbel. Y ri raqen-ya' ri' xchaqi'j-qa richin chi xunaba' kan ri kibey ri q'atoy taq tzij ri e peteneq kere' pa relebel-q'ij.

¹³Y k'ari' yin xintz'et chi ri itzel keq rij chikop, ri nabey chikop ri xel-pe pa ya' y ri achin ri man qitzij ta q'alajirisey ruch'abel ri Dios,*f5* jujun achi'el xkalet ri xel-pe pa kichi'. Y re oxi' xkalet re', xa e oxi' itzel taq espíritu.

¹⁴Ri oxi' itzel taq espíritu ri' kan yekibanala' k'a meyel taq banobel richin yeq'olotej ri winaqi' pa kiq'a'. E eleneq k'a pe richin yekimol konojel q'atoy taq tzij richin ri ruwach'ulew e kachibilan ri aj-labal. Yekimol-apo richin ri q'ij toq xtikiben oyowal rik'in ri Dios ri kan k'o ronojel uchuq'a' pa ruq'a'.

¹⁵Y ri oxi' itzel taq espíritu ri' kan xekimol k'a ri winaqi' ri chiri' ri nibix Harmagedón chire pa ch'abel hebreo. Y jari' toq k'o jun xch'on y xubij: Yin xkipe, achi'el jun eleq'om, kan jebel k'a ruwa-kiq'ij ri kichajin ri kik'aslen y e ch'ajch'oj, keri' man xkek'ixbitej ta chikiwech ri winaqi', xcha'.

¹⁷Y kan jari' k'a toq ri ruwuq ángel xuq'ej pa kaq'iq' ri ruk'uan chupan ri qumbel, y xinwak'axaj k'a chi k'o nich'on-pe ri akuchi k'o-wi ri rutz'uyubal ri Dios ri chiri' pa rachoch. Y kan rik'in k'a ruchuq'a' nubij-pe: Jare' xk'achoj yan, xcha'.

¹⁸Y kan xaxe k'a xubij keri', kan ja ri' xepe koqolajay, koyopa'. Y xuben k'a jun nimalej silonel ri man jun bey banatajineq janipe' ri ek'o-pe winaqi' chuwech ri ruwach'ulew.

¹⁹Y ri akuchi k'o-wi ri nimalej tinamit Babilonia xjaqatej ri ruwach'ulew roma ri silonel. Pan oxi' k'a xuben chire ri tinamit ri'. Y ri ch'aqa' chik nima'q taq tinamit ri ek'o chuwech ri ruwach'ulew, xetzaq. Richin keri' ri Dios xuben ruk'exel chike ri winaqi' aj-Babilonia, y xuben chike chi tikiqumu' ri royowal rija'.

²⁰Y roma chuqa' ri nimalej silonel ri xuben, ri ruwach'ulew ri ek'o pa taq ya' xebe chuxe' ya'. Y ri juyu' man xetz'etetej ta chik.

²¹Chuqa' chupan ri q'ij ri' xqaqa k'a pe saqboch ri chila' chikaj. Y jujun saqboch jujun la'eq kintal kalal. Y roma k'a re jun kamik saqboch re', ri winaqi' janila nikiyoq' ri Dios, roma kan janila k'ayew.