Read Kaqchikel Apocalipsis 19 Bible Online

Apocalipsis 19 - Kaqchikel bible

Apocalipsis 19

¹Y chirij ronojel re', xinwak'axaj k'a kich'abel janila chi winaqi' ri niwajin chila' chikaj, ri kan rik'in uchuq'a' nikibij: Tinimirisaj rubi' ri qajaw Dios, roma rik'in rija' peteneq-wi ri kolotajik, richin rija' ri uchuq'a', y ronojel ruwaq'ijaj y k'ojlemal.

²Roma ri ruq'atbal-tzij rija' kan qitzij y choj; kan xuya' ruk'ayewal pa ruwi' ri ixoq itzel ruk'aslen, ri xbanon chike ri winaqi' ri ek'o chuwech ri ruwach'ulew richin xeqaqa pa mak, xuya' ruk'ayewal pa ruwi' roma xerukamisaj ri rusamajela' ri Dios, yecha'.

³K'ari' ri ch'abel ri niwajin ri chikaj, xubij chuqa': Tinimirisaj rubi' ri Dios, roma ri Babilonia ruchapon nik'at, y ri rusibil kan nijote' k'a richin tibe-q'ij tibe-seq, xecha'.

⁴Y ri juwineq kaji' achi'a' ri k'o kiq'ij ri ek'o chikaj y ri e kaji' ri k'o kik'aslen, kan jari' k'a xexuke-qa pan ulew richin xkiya' ruq'ij ri Dios ri ch'okol pa rutz'uyubal richin q'atbel-tzij. Y rije' nikibij: Kan keri' ta k'a. Kan tinimirisex ri rubi' ri Dios, yecha'.

⁵Y jari' toq kan k'o jun ri xbech'on-pe akuchi k'o-wi ri tz'uyubel xubij: Kan tiya' ruq'ij ri Dios chi'iwonojel rix ri ix rusamajela', ri k'o rukiy ri Dios chiwech, chi ch'uti'q chi nima'q, xcha'.

⁶Y xinwak'axaj chi ri ch'abel ri niwajin ri chikaj, kan achi'el yewajin raqen taq ya', y chuqa' achi'el niq'ajan ri koqolajay. Y nikibij: Tinimirisaj rubi' ri ajaw ri qa-Dios, ri kan k'o ronojel uchuq'a' rik'in, roma ja rija' ri niq'aton-tzij.

⁷Kan qojkikot k'a y qojnimaq'ijun, y tiqaya' ruq'ij-ruk'ojlen ri Dios; roma jare' xoqaqa ri q'ij richin nibanatej ri nimalej k'ulubik richin ri Karne'l. Y ri xten kan ruchojmirisan chik ri' richin ri ruk'ulubik.

⁸Kan xya'ox k'a q'ij chire ri xten richin chi xuwiq yan ri' rik'in tzieq ri kan janila ch'ajch'oj y niyik'lun; tzieq lino ri janila jebel, yecha'. Y ri jebelej taq tzieq ri' nuk'exewachuj ri chojmilej kibanobal ri ralk'ual ri Dios.

⁹Y ri ángel ri beneq wik'in, xubij chuwe: Tatz'ibaj k'a, chi jebel ruwa-kiq'ij ri e oyon richin ri nimaq'ij chupan ri ruk'ulubik ri Karne'l, xcha'. Y ri ángel ri' kan xubij chuqa' chuwe: Re tzij re xinbij chawe, kan ja ri Dios biyon y kan qitzij wi, xcha'.

¹⁰Y yin kan jari' k'a xixuke' chuwech ri ángel ri' richin ninya' ruq'ij, jak'a rija' xubij chuwe: Man kaxuke' chinuwech. Roma yin xa in jun rusamajel ri Dios achi'el rat, y achi'el ri ch'aqa' chik ri kan xkik'ul ri ruch'abel ri Jesús y nikitzijoj. Ja ri Dios taya' ruq'ij. Y ri rutzijoxik ri Jesús, ja ri' ri ruk'u'x ri nikitzijoj ri q'alajirisanela', xcha'.

¹¹Y toq xitzu'un yan chik, xintz'et k'a ri kaj chi jaqel. Y xintz'et jun seq rij kiej, ch'okoliben roma ri jun ri rubini'an Qitzij y Kan Nuben-wi ri Nubij. Y kan rik'in ruchojmilal niq'aton-tzij y nuben labal kik'in ri ye'etzelan richin.

¹²Ri runaq'-ruwech kan e achi'el ruxaq q'aq'. K'o k'a k'iy corona rukusan, y tz'ibatel-el ri rubi' chiri'. Y re bi'aj re', kan man jun achoq chuwech niq'ax-wi, xa kan xaxe chuwech rija'.

¹³Ri rutziaq ri rukusan, k'o kik' chirij. Y rija' kan k'o chik k'a jun rubi', y ri' ja ri Ruch'abel ri Dios.

¹⁴Y rija' e rachibilan ri aj-chikajil banoy taq labal, ri kikusan tzieq lino ri kan seq-seq nitzu'un y re' ech'okol-el chikij seq taq kiej.

¹⁵Y ri pa ruchi' nik'ulun k'a pe jun achi'el espada ri janila rey. Y kan rik'in ri' xkeruch'ek ri winaqi' ri ek'o pa taq ruwach'ulew. Y kan ja rija' ri xtiq'aton-tzij rik'in ronojel uchuq'a' pa kiwi'. Kan nuq'alajirisaj ri nimalej royowal ri Dios achi'el toq niyitz' ri uva chupan ri yitz'bel.

¹⁶Y chirij ri rutziaq pa ruwi' pe ri ruch'ek tz'ibatel jun chik rubi'. Y ri bi'aj ri' ja ri Rey pa Kiwi' Konojel ri e Rey, y Ajaw pa Kiwi' Konojel Ajaw.

¹⁷Jari' k'a xintz'et jun ángel pa'el pa ruwi' ri q'ij. Re ángel re' rik'in ruchuq'a' xubij chike ri aj-xik' taq chikopi' ri yebiyaj chikaj: Kixanpe. Timolo-pe-iwi', roma ri Dios nuya' jun nimalej wa'in chiwe.

¹⁸Ri wey ri xtuya' ri Dios ja ri kich'akul ri rey, ri aj-raqen, y ri achi'a' ri janila kuchuq'a'; kich'akul chuqa' kiej y ri e ch'okolibeyon kichin; kan ja ri kich'akul konojel winaqi', chi loq'on samajel y chi totajineq, chi ch'uti'q chi nima'q, xcha' ri ángel.

¹⁹Y jari' k'a toq yin xintz'et chik ri keq rij chikop e rachibilan ri rey richin ri ruwach'ulew, y kan e janila chuqa' aj-labal ri e kachibilan-el. Y konojel re' kan kimolon-ki' richin nikiben oyowal rik'in ri jun ri ch'okol chirij ri seq rij kiej y kik'in chuqa' ri e tzeqelibeyon richin.

²⁰Jak'a ri keq rij chikop xchap el, rachibilan ri jun achin ri nibin chi q'alajirisey ruch'abel ri Dios y xa man qitzij ta, ri xerubanala' meyel taq banobel chuwech ri chikop, ri rik'in ri' xeruq'ol ri winaqi' richin chi xkik'ul ri ketal nik'aj-kiwech o ri pa taq kiq'a', y kan kiya'on-pe ruq'ij ri ruwachibel ri chikop. K'ari' ri chikop y ri jun ri xeq'olon ri winaqi', kan e k'es xek'aq chupan ri q'aq' ri achi'el choy ri xolon rik'in chuwilej-abej ri nik'a'on.

²¹Jak'a ri ch'aqa' chik ri e beneq kik'in xekamisex konojel. Xekamisex rik'in ri jun achi'el espada ri nik'ulun-pe pa ruchi' ri ch'okol chirij ri seq rij kiej. Y ri kich'akul konojel ri xekamisex, kan ja ri aj-xik' taq chikopi' ri xetijo. Kan xkinojisaj k'a kipan rik'in ri ti'ij ri'.