Read Kaqchikel Apocalipsis 22 Bible Online

Apocalipsis 22 - Kaqchikel bible

Apocalipsis 22

¹Y k'ari' ri ángel ri uk'uayon wichin xuk'ut jun ch'ajch'ojilej raqen-ya' chinuwech ri niya'on k'aslen. Ri raqen-ya' ri', chay-chay nitzu'un y nalex-pe ri akuchi k'o-wi ri rutz'uyubal ri Dios y ri Karne'l.

²Pa nik'aj chire ri nima-bey richin ri tinamit, chiri' niq'ax-wi ri raqen-ya'. Y chuchi' k'o-wi ri che' ri niya'on k'aslen. Kablajuj bey nuya' ruwech pa jun juna', roma kan ik'-ik' nuya' ruwech. Y ri ruxaq kan aq'om richin yek'achoj ri winaqi' ri e peteneq pa ronojel ruwach'ulew.

³Y ri chiri' man jun ri man ch'ajch'oj ta ri nok-apo. Kan chiri' k'o-wi ri rutz'uyubal ri Dios y ri Karne'l, y konojel ri ek'o chiri' jari' ri xkesamajin richin.

⁴Kan xtikitz'et k'a ruwech ri Dios y chuqa' xtikik'uaj ri rubi' ri Karne'l, nik'aj-kiwech.

⁵Ri chiri' chupan ri tinamit ri', man jun bey xtiq'equmer ta richin nokoq'a-qa. Y konojel ri ek'o chupan ri tinamit ri', man jun xtik'atzin-wi ri rusaqil jun q'aq' o rusaqil ta ri q'ij chike. Roma kan ja ri Dios ri ajaw ri xtisaqirisan kichin. Y konojel re', jere' ri xkeq'aton-tzij richin tibe-q'ij tibe-seq.

⁶Y ri ángel ri uk'uayon wichin xubij chuwe: Re ch'abel re' kan qitzij y kan xkebanatej-wi. Roma kan ja ri ajaw Dios ri xya'on ch'abel pa taq kánima ri e q'alajirisey ri ruch'abel, kan ja chuqa' rija' ri taqayon richin ri ru-ángel richin chi nuya' rutzijol chike ri e rusamajela', chirij ri xkebebanatej yan, xcha'.

⁷Y ri Jesucristo xubij: Yin kan yipe yan, jebel ruwa-kiq'ij konojel winaqi' ri yeniman ri nuq'alajirisaj ri Dios chupan re jun wuj re', xcha'.

⁸Ja yin Juan, ri xinak'axan y xitz'eton ronojel re'. Jak'a toq e wak'axan y e nutz'eton chik, jari' toq xixuke' chuwech ri ángel ri xk'utun ronojel re' chinuwech, richin ninya' ruq'ij.

⁹Jak'a rija' xubij chuwe: Man taya' nuq'ij. Yin xa in jun chuqa' rusamajel ri Dios, junan awik'in rat y kik'in ri ch'aqa' chik q'alajirisey ruch'abel ri Dios, y chuqa' kik'in ri yeniman re ch'abel re e tz'ibatel chupan re wuj re'. Kan ja ri Dios taya' ruq'ij.

¹⁰Ri ruch'abel ri Dios tz'ibatel chupan re jun wuj re', man k'a tawewaj. Kan taq'alajirisaj. Roma ri q'ij richin chi nibanatej ri nubij, xa kan naqaj chik k'o-wi.

¹¹Roma ri' ri man choj ta ruk'aslen, tubana' k'a ri nrajo'. Y ri uk'uayon jun tz'ilolej k'aslen, tubana' k'a ri nurayij. Jak'a ri choj kik'aslen, man tikijel rubanik. Y ri e ch'aron richin ri Dios, kan keri' k'a tikibana-apo.

¹²Kan qitzij chi noqaqa yan ri q'ij chi yin yipe richin nonya' ruk'exel chike chikijujunal achi'el rubanik ri kibanobal.

¹³Ja yin k'a xitikeriban-pe ronojel y kan ja yin chuqa' ri xkik'ison pa ruwi'.

¹⁴Kan jebel ruwa-kiq'ij ri nich'ajch'ojirisex kik'aslen; richin k'o kiq'a' chire ri ruwech ri che' ri niya'on k'aslen, y richin yetikir ye'ok chupan ri okibel ri e richin ri tinamit.

¹⁵Jak'a ri itzel kik'aslen, man xke'ok ta chupan ri tinamit. Keri' chuqa' ri aj-itza', ri achi'a' y ri ixoqi' ri nikikanola-ki' richin yemakun, ri kamisanela', ri yeya'on kiq'ij ch'aqa' chik dios, y ri kan niqa' chikiwech nikitz'uk-tzij.

¹⁶Yin Jesús, nutaqon k'a ri nu-ángel richin nuq'alajirisaj ronojel re' chiwech rix ri molaj nimanela'. Ja yin k'a ri in riy-rumam kan ri rey David ri k'o chi xtipe. Ja yin chuqa' ri achi'el nima-ch'umil ri niyik'lun nimaq'a-yan, xcha'.

¹⁷Y ri Loq'olej Espíritu y ri k'o chi xtik'ule' rik'in ri Jesucristo, nikibij: Katanpe, yecha'. Y konojel ri ye'ak'axan, kan tikibij chuqa': Katanpe, kecha'. Y ri nichaqi'j ruchi', tipe y tuqumu ruya' ri niya'on k'aslen, ri maneq rajel.

¹⁸Yin Juan ninbij chike konojel ri ye'ak'axan ri nuq'alajirisaj ri Dios chupan re jun wuj re', chi wi k'o jun ri nuya-el ruwi', ri Dios xtuya' ruk'ayewal pa ruwi'; achi'el ri ruk'ayewal ri e tz'ibatel chupan re jun wuj re'.

¹⁹Y wi k'o chik jun ri xa nrelesaj ch'abel y nujel rubanik ri nuq'alajirisaj ri Dios chupan re jun wuj re', ri Dios kan xtuben chire chi man nutej ta ri ruwech ri che' ri richin k'aslen, man xtuya' ta q'ij chire richin nok-apo chupan ri k'ak'a' tinamit ri ch'aron roma ri Dios y man xtrichinaj ta ri utz ri nubij chupan re wuj re'.

²⁰Y ri niq'alajirisan ronojel re', kan nubij chuqa': Ja', kan qitzij wi chi yipe yan, nicha'. Y yin Juan ninbij: Kan keri' ta k'a. Katanpe yan k'a, ajaw Jesús.

²¹Y ri ajaw Jesucristo xtuya' ta k'a ri rutzil pan iwi' chi'iwonojel. Kan keri' ta k'a.