Read Kaqchikel Apocalipsis 7 Bible Online

Apocalipsis 7 - Kaqchikel bible

Apocalipsis 7

¹Chirij ri' xintz'et k'a chi e kaji' ángel e pa'el pa jujun chike ri kaji' rukajtz'uk ri ruwach'ulew, kiq'aton ri kaji' ruwech kaq'iq', richin chi man ye'apon pa ruwi' ri ruwach'ulew, pa ruwi' ri palou, y pa kiwi' ri che'.

²K'ari' xintz'et chuqa' chi k'o jun ángel ri jotol-pe kere' pa relebel-q'ij, ruk'amon-pe ri sello richin ri k'aslik Dios. Y re ángel re' rik'in ronojel ruchuq'a' xch'on-apo chike ri e kaji' ángel ri kan ya'on uchuq'a' pa kiq'a' richin nikiya' ruk'ayewal pa ruwi' ri ruwach'ulew y ri palou,

³y xubij: Man jun ruk'ayewal tiya' pa ruwi' ri ruwach'ulew, pa ruwi' ri palou y pa kiwi' ri che', k'a toq qaya'on chik na ketal nik'aj kiwech ri rusamajela' ri Dios, xcha'.

⁴Y xinwetamaj k'a chi ri xkik'ul ketal e 144,000 winaqi' e richin ri kablajuj tzobaj richin ri ruwach'ulew Israel.

⁵E 12,000 k'a ri xya'ox ketal chupan chikijujunal re tzobaj re': Ri Judá, ri Rubén, ri Gad, ri Aser, ri Neftalí, ri Manasés, ri Simeón, ri Leví, ri Isacar, ri Zabulón, ri José, y ri Benjamín.

⁹Chirij ri' yin xintz'et k'a chi e janila winaqi' ri kan man e ajlatel ta, richin jalajoj ruwach'ulew, ijatzul, tinamit y ch'abel. Konojel re winaqi' re' e pa'el-apo chuwech ri tz'uyubel richin ri Dios y chuwech apo ri Karne'l. E kikusalon k'a seq ta tzieq y e kik'ualon ruq'a' palma richin nikik'ut ri kikoten.

¹⁰Y konojel rik'in kuchuq'a' nikibij: Re xojkolotej, kan xaxe ri Dios ri tz'uyul chupan ri tz'uyubel ri xbanon, kan xaxe ri Karne'l ri xkolon qichin, yecha'.

¹¹Konojel k'a ri ángel ri e pa'el-apo kisutin-rij ri akuchi tz'uyul-wi ri Dios, ri achi'a' ri k'o kiq'ij y ri e kaji' ri k'o kik'aslen; xkiqasaj-ki' k'a pan ulew richin xkiya' ruq'ij ri Dios,

¹²y xkibij k'a: ¡Kan keri' wi! Ronojel urtisanik, k'ojlemal, etamabel, matioxinik, ruwaq'ijaj y uchuq'a' kan chire k'a ri qa-Dios tiya'ox-wi. Kan keri' wi, yecha'.

¹³Y k'ari' jun chike ri achi'a' ri k'o kiq'ij xuk'utuj chuwe: ¿Awetaman e achike chi winaqi' la seq-seq kitziaq kikusalon y akuchi kepe-wi?, xcha' chuwe.

¹⁴Y yin xinbij k'a chire: Ja rat ri at etamayon e achike chi winaqi' la', xicha'. K'ari' rija' xubij chuwe: Jere' ri e eleneq chik pe chupan ri nimalej tijoj-poqonal, y kich'ajon chik ri kitziaq y kisaqirisan chik rik'in ri rukik'el ri Karne'l.

¹⁵Roma ri' ek'o-apo rik'in ri Dios, chupan ri rachoch y chi paq'ij chi chaq'a' nikisamajij. Y ri Dios ri tz'uyul chupan ri rutz'uyubal xtik'ase' chikikojol y xkeruchajij re winaqi' re'.

¹⁶Konojel man xkewayjan ta chik, man xtichaqi'j ta chik kichi', man xkek'at ta chuwa-q'ij, ni man xtikina' ta chik k'aten.

¹⁷Roma kan ja ri Karne'l ri k'o-apo chunaqaj ri akuchi tz'uyul-wi ri Dios, jari' ri xtiyuq'un kichin achi'el yeyuq'ux ri taq karne'l, y kan yeruk'uaj richin nuya' kiya' ri pa taq alaxibel-ya' richin k'aslen. Y ri Dios kan xtuben k'a chike chi man jun chik q'axo'n ni oq'ej xtik'oje' kik'in, xcha'.