Read Kaqchikel Apocalipsis 9 Bible Online

Apocalipsis 9 - Kaqchikel bible

Apocalipsis 9

¹Chirij ri' ri ro' ángel xuxupuj ri trompeta, y jari' toq xintz'et chi jun ch'umil xtzaq-pe chila' chikaj y xqaqa chuwech ri ruwach'ulew. Y chire ri ch'umil ri' xjach ri llave richin ri nimalej siwan ri q'equ'm-q'equ'm rupan.

²Y toq xujeq ri siwan xel-pe janila sib, achi'el xa ta jun nimalej horno, keri' ri sib ri' xuq'equmarisaj ruwech ri q'ij y ri ruwach'ulew.

³Y chupan ri sib xebek'ulun k'a pe sak' y xkitaluj-ki' chuwech ri ruwach'ulew. Y xya'ox k'a uchuq'a' chike chi yeti'on achi'el alacrán.

⁴Y xbix k'a chike chi man tikitej ri che', ri tiko'n o ri q'ayis. Jak'a tikibana' ch'a'oj xaxe chike ri winaqi' ri man ya'on ta ketal nik'aj-kiwech roma ri Dios.

⁵Jak'a man richin ta chi yekikamisaj ri winaqi' ri', xaxe richin chi yekiya' pa q'axomal wo'o' ik'. Y ri rukiy kan achi'el toq yaruti' jun alacrán.

⁶Y ri q'ij ri' ri winaqi' xtikikanola' ri kikamik y man xtikil ta, roma ri kamik xa xtrewaj-el-ri' chikiwech.

⁷Y ri kibanik ri sak' ri', achi'el ri kiej ri echojmirisan chik richin yebe pa labal. Ri pa kijolon kikusan achi'el corona ri banon rik'in q'anapueq y ri kipalej kan achi'el kipalej winaqi'.

⁸Kan k'o k'a rusumal-kiwi' achi'el ri rusumal-kiwi' ri ixoqi' y ri key achi'el key ri koj.

⁹Ri ruwa-kik'u'x kan achi'el ch'ich', ri kixik' kan janila k'a niq'ajan, achi'el yeq'ajan e k'iy karruaje ri e qiriren koma kiej richin yebe pa labal.

¹⁰Ri kijey achi'el ri kichin ri alacrán, y chutza'n k'o ri kich'utal. Y rik'in ri kich'utal ri' yetikir k'a yekiya' pa q'axomal ri winaqi', wo'o' ik'.

¹¹Ri aj-raqen pa kiwi' ri sak' ri' ja ri ángel ri rajawal ri itzel siwan ri q'equ'm rupan. Rija' rubini'an Abadón pa ch'abel hebreo y pa griego nibix Apolión chire, re' nel tzij Wululen.

¹²Xq'ax k'a re jun ruk'ayewal re', jak'a k'a k'o na chik ka'i' yekanej kan.

¹³Y toq ri ruwaq ángel xuxupuj ri trompeta, xinwak'axaj k'a jun ch'abel ri xel-pe ri chikikojol ri kaji' uk'a' ri ek'o chire ri porobel ri banon rik'in q'anapueq, ri chuwech ri Dios,

¹⁴y xubij k'a chire ri ángel ri': Ke'asolo' ri kaji' ángel ri e ximil kan chuchi' ri nimalej raqen-ya' Éufrates, xcha'.

¹⁵Y keri' xebesol k'a kan ri kaji' ángel, richin yekikamisaj winaqi'. Ri kaji' ángel ri' kan e chojmirisan chik richin yebe, ri hora, ri q'ij, ri ik' y ri juna'. Y xkekikamisaj jun chire ri oxi' chike ri winaqi' ri k'a ek'o na chuwech ri ruwach'ulew.

¹⁶Y xintz'et k'a chi ri e aj-labal ri yech'oke' chirij taq kiej ri e beneq kik'in ek'o k'a 200,000,000.

¹⁷Y chupan k'a ri achi'el achik' ri xinben, xentz'et ri kiej y ri e ch'okol chirij kikusan tobel ruwa-kik'u'x ri keq nitzu'un achi'el q'aq', q'en achi'el ri chuwilej-abej y raxroj achi'el ri kaj yetzu'un. Y ri kijolon ri kiej ri' achi'el kijolon ri koj, y ri pa kichi' kan nel q'aq', sib y chuwilej-abej.

¹⁸Y kan jak'a ri q'aq', sib y chuwilej-abej ri ye'el ri pa taq kichi' ri kiej, jari' ri xk'ison jun chire ri oxi' chike konojel ri winaqi' ri k'a ek'o na kan chuwech re ruwach'ulew.

¹⁹Re kiej re', ja ri kichi' y ri kijey ri yebanon ch'a'oj, roma ri pa kichi' nel q'aq' y sib. Ri kijey achi'el kumetz y rik'in ri' nikiben-wi ch'a'oj.

²⁰Jak'a ri winaqi' ri k'a xek'ase' na kan man xtzolin ta pe kik'u'x. Xa xkiyala' na kiq'ij ri itzel taq espíritu y ri wachibel ri e kibanon rik'in q'anapueq, saqipueq, abej, che' y ri q'enq'oj-pueq. Jari' ri xkiya' kiq'ij ri winaqi' ri'; xa dios ri man yetzu'un ta, ni man ye'ak'ex ta y ni man yebiyin ta.

²¹Man xtzolej ta k'a pe kik'u'x ri winaqi' ri' rik'in ri Dios, richin xkiyala' ta kan ri kamisanik, ri itz, ri eleq' y ri achi'a' y ri ixoqi' ri nikikanola-ki' richin yemakun.