Read Kaqchikel Rut 1 Bible Online

Rut 1 - Kaqchikel bible

Rut 1

¹Chupan ri ruwach'ulew Israel, toq k'a ja na ri to'onela' ri yeq'aton-tzij, xk'uluwachitej k'a jun nima-wayjal. Y k'o k'a jun achin aj pa tinamit Belén richin ri ruwach'ulew Judá, ri xq'ax-qa pa ruwach'ulew Moab y xbek'oje' chiri' rachibilan ri rixjayil y ri e ka'i' ruk'ajol.

²Re achin re' rubini'an Elimélec, ri rixjayil rubini'an Noemí y ri e ka'i' ruk'ajol kibini'an Mahlón y Quilión. Rije' e riy-rumam kan ri achin ri xubini'aj Efrata, ri xtz'ukun kan ri tinamit Belén. Rije' xebek'oje' k'a pa ruwach'ulew Moab y xkibanala-qa kachoch chiri'.

³Xk'uluwachitej k'a, chi ri Elimélec ri rachijil ri Noemí xa xken-el toq ek'o chiri', y ri Noemí xmalkanej kan y xek'oje' kan chuwech rija' ri e ka'i' ral alaboni'.

⁴Y toq q'axineq chik juba' q'ij, re ka'i' alaboni' re' xek'ule' kik'in xtani' aj chiri' pa Moab. Jun rubini'an Orfá y ri jun chik rubini'an Rut. Y toq rije' k'o yan la'eq jun lajuj juna' kek'oje' chiri',

⁵jari' toq ri Mahlón y ri Quilión xeken-el, kan chi e ka'i' k'a xeken-el y keri' ri Noemí kan ruyon k'a xk'oje' kan; e maneq chik ri e ka'i' ral y maneq chik ri rachijil chuqa'.

⁶Y k'o k'a jun q'ij xapon rutzijol rik'in ri Noemí ri chiri' pa Moab, chi ri Jehová xujoyowaj ruwech ri rutinamit Israel y kan xrelesaj yan ri wayjal pa ruwi'. Roma ri' rija' kan jari' xuben chi nitzolej pa ruwach'ulew Judá y nel-el chiri' pa Moab yerachibilaj-el ri e ka'i' rali'.

⁷Rija' xuchop k'a el bey y xel-el ri akuchi xk'oje-wi, e rachibilan-el ri e ka'i' rali' richin chi yetzolin pa ruwach'ulew Judá.

⁸Y jak'a toq kichapon-el bey, ri Noemí xubij chike ri rali': Más utz yixtzolin kan pa taq iwachoch chi'ijujunal. Kixtzolin kik'in ri ite' y ri Jehová xtujoyowaj ta iwech y xkixruto' ta, achi'el ri xiben kik'in ri ánima iwachijil y ri ibanon-pe wik'in yin.

⁹Kan ta xtuben ri Dios chiwe chi xtiwil ta uxlanen pan iwachoch rik'in jun chik iwachijil, xcha' ri kalite' chike. Xeri' xerutz'ubaj chi e ka'i' rali' richin nikijech kan ki'; y rije' xkichop k'a oq'ej.

¹⁰Y xkibij k'a chire ri kalite': Man keri' ta; roj xa kan xqojbe chuqa' awik'in wakami re yatzolin-el pan atinamit, xecha'.

¹¹Jak'a ri Noemí xubij chike: Kixtzolin kan wal yin. ¿Achike ta k'a roma niwajo' yixbe chuwij? Yin xa man xkek'oje' ta chik wal, richin chi rix ja ta ri' xke'iwoyobej richin yixk'ule' kik'in.

¹²Kixtzolin kan, kixbiyin kan chi taq iwachoch, roma yin janila chik in ri'j richin chi yik'ule' ta chik jun bey. Y stape' ninbij ta chiwe chi kan k'a banel na richin chi yik'ule' y re wakami tokoq'a', yin yik'oje' ta rik'in achin y kan ja ta ri' yiyawej kan richin chi nik'oje' chik wal.

¹³¿Kan k'a ye'iwoyobej kami rix richin chi k'a toq yenimer na q'anej, k'ari' yixk'ule' kik'in? ¿Xaxe kami koma rije' nikoch'-qa chi man yixk'ule' ta? Man keri' ta wal yin. Roma ri q'axo'n xa pa nuwi' yin rutaqon-wi-pe ri Jehová y ja yin ri k'o chi yik'owisan, y man ja ta rix, xcha' ri Noemí chike.

¹⁴Jak'a rije' kan janila ye'oq'. K'ari' ri Orfá xutz'ubaj kan ri rupalej ri ralite' y xtzolin kan kik'in ri ruwinaq; jak'a ri Rut xk'oje' kan rik'in ri ralite'.

¹⁵Roma ri' ri Noemí xubij chire: Tatz'eta', la awachalka'n xtzolin kan kik'in ri ruwinaq y kik'in ri dios ri nikiya' ruq'ij rije'; katzolej kan chuqa' rat, achi'el xuben rija', xcha' ri Noemí chire.

¹⁶Jak'a ri Rut xubij chire: Man chik tak'utuj utzil chuwe richin chi yatinya' kan y ninch'er kan wi' awik'in. Roma akuchi xkabe-wi rat, chiri' xkibe-wi yin; akuchi xkabek'oje-wi rat, chiri' xkibek'oje-wi yin; ri awinaq, kan ja chuqa' ri' nuwinaq yin; y ri a-Dios, jari' chuqa' nu-Dios yin.

¹⁷Akuchi k'a xkaken-wi rat, chiri' chuqa' xkiken-wi yin y chiri' xkimuq-wi; kan k'a ja na k'a ri kamik ri xtich'aron qichin. Y wi k'o ta chik jun ri nich'aron qichin y ninq'ej ruwi' ri nutzij, xa kan tiqaqa k'a ruk'ayewal pa nuwi' yin, ri nuya-pe ri Jehová, xcha' ri Rut.

¹⁸Toq ri Noemí xutz'et chi ri Rut kan nrajo-wi nibe chirij, kan man jun chik xubij chire.

¹⁹Y keri', rije' kichapon k'a el bey y xe'apon pa Belén. Y toq xe'ok-apo chupan ri tinamit ri', konojel k'a ri winaqi' xekimey ri e ka'i' ixoqi' ri xe'apon, y nikibila' k'a chikiwech: ¿Man ja ta kami re' ri Noemí?, xecha'.

²⁰Jak'a rija' xubij chike: Man tibij chik Noemí chuwe; más utz nibij Mará chuwe,*f1* roma ja bi'aj re' ri más ruk'amon chuwe yin, roma ri Dios ri k'o ronojel uchuq'a' pa ruq'a', xuya' jun k'ayilej k'aslen chuwe.

²¹Toq xinel-el re wawe' ronojel k'o wik'in, jak'a re wakami re xitzolin-pe, xa nuq'eten chik nuq'a', roma ri Jehová keri' ri xrajo' chuwe. Roma ri' man chik k'a tibij Noemí chuwe, roma ri Dios ri nitikir nuben ronojel, xuq'alajirisaj yan chiwech ronojel ri tijoj-poqonal ri xuya' pa nuwi', xcha' ri Noemí chike.

²²Keri' k'a toq ri Noemí xapon chik pa Belén, rachibilan-el ri Rut ri ruk'amon-pe pa ruwach'ulew Moab. Y toq rije' xe'apon pa Belén jari' toq q'ij richin xchap ruq'atik cebada.