Read Kaqchikel Rut 2 Bible Online

Rut 2 - Kaqchikel bible

Rut 2

¹Chiri' pa Belén k'o k'a jun achin ri rach'alal kan ri ánima Elimélec, ri rachijil ri Noemí. Re achin re' rubini'an Booz, rija' jun nimalej beyom y kan k'o ruq'ij.

²Y k'o k'a jun q'ij ri Rut xubij chire ri ralite': Tabana' utzil, taya' q'ij chuwe richin chi yibe pa juyu', richin yibepich'olin pa rulew ri xtijoyowan nuwech, xcha'. Y ri Noemí xuya' k'a el q'ij chire.

³Ri Rut xbe k'a richin nibepich'olin. Y toq xapon pa jun ulew akuchi niq'at-wi cebada, xuchop nipich'olin chiri' kik'in ri yesamej; y ri akuchi xbepich'olin-wi, xa richin ajk'a ri Booz, ri rach'alal kan ri ánima Elimélec.

⁴Y toq ri Rut najin nipich'olin, xapon k'a ri Booz ri peteneq pa Belén, y xubij chike ri rusamajela': Ja ri Jehová xtik'oje' iwik'in, xcha'. Y ri rusamajela' xkiq'ejela' chuqa'.

⁵Xeri' ri Booz xubij chire jun rusamajel ri k'o pa kiwi' konojel ri samajela': ¿Achike k'a xten la k'o chila'?, xcha'.

⁶Y ri samajel xubij chire: Ja k'a xten la' ri aj-Moab ri peteneq rik'in ri Noemí.

⁷Rija' xuk'utuj utzil chuwe chi ninya' q'ij chire richin nipich'olin juba' wawe' y nitzeqe' chikij ri q'atonela'. Kan nimaq'a' okineq-pe y jala' k'a k'o na wakami; xa juba' ok uxlawineq, xcha' ri samajel chire ri Booz.

⁸K'ari' ri Booz xch'on rik'in ri Rut y xubij chire: Nána, kan kinawak'axaj k'a, man kabe juk'an chik ulew richin yabepich'olin, xa kak'oje' wawe'. Tatunu-apo awi' kik'in la waj-ik' ixoqi'.

⁹Ke'atzeqelibej ri ixoqi' ri akuchi niban-wi samaj. Man taxibij-awi', roma yin xinbij yan chike ri nusamajela' achi'a' chi tikiya' q'ij chawe richin chi yapich'olin. Y toq xtichaqi'j-pe achi', kabiyin-apo akuchi k'o-wi ri yakbel-ya' y taqumu' ri ya' ri nikiqum ri nusamajela', xcha' chire ri Rut.

¹⁰K'ari' ri Rut xulukuba-qa-ri' y kan xuqasaj-qa-ri' k'a pan ulew chuwech ri Booz y xubij chire: ¿Achike roma rat janila utzil naben chuwe, y yin xa man in awinaq ta?, xcha' chire.

¹¹Y k'ari' ri Booz xubij: Yin xinwetamaj yan ronojel ri utzil ri abanon rik'in ri awalite', achapon-pe naben utzil chire rija', kan ja toq xken-el ri awachijil; y roma ri awalite' xe'aya' kan ri ate-atata', xaya' kan ri aruwach'ulew y xatok'oje' re wawe' chiqakojol roj ri man jun bey awetaman qawech.

¹²Ja ri Jehová ri qa-Dios roj xtiya'on rajel ruk'exel chawe roma ri yatajin chubanik y kan xtak'ul rajel ruk'exel pa ruq'a' ri qa-Dios roj ri aj-Israel, ri achoq ik'in akuquban-wi ak'u'x rat, xcha' ri Booz.

¹³Y ri Rut xubij: Táta, kan jantape' ta xtink'ul utzil awik'in, roma ri ch'abel ri xabij chuwe kan xapon k'a pa wánima y janila nukuquba' nuk'u'x, roma kan xach'on wik'in rik'in ajowabel, stape' xa man in asamajel ta, y chuqa' man in jun ta chike ri awaj-ik'a', xcha' ri Rut.

¹⁴Y toq jari' yebewa', ri Booz xubij chire ri Rut: Katanpe richin yawa', k'o wey qik'in y junan xtakeq' away qik'in chupan re q'utun ri k'o vinagre rik'in, xcha'. Y ri Rut xtz'uye' k'a apo junan kik'in ri samajela', y ri Booz xuya' cebada k'ilin chire y jebel xwa', y rija' xuyek k'a janipe' ri man xuk'is ta chire ri xukochij.

¹⁵Y toq ri Rut kolawineq chik, y xyakatej yan el richin chi xuchop chik jun bey nipich'o'l, jari' toq ri Booz xubij chike ri rusamajela': Tiya' q'ij chire richin yerumol-el ri ruwi' taq cebada ri yetzaq kan chire ri boraj y man jun tibanon chire chi man yerumol ta el.

¹⁶Y chuqa' tibana' utzil chi kan pa rubanik tibana' chi nitzaqala' kan juba' richin numol-el rija', y man kixch'olin chirij, xcha' ri Booz chike.

¹⁷Ri Rut xpich'olin k'a y xqasan-q'ij chiri'; y ronojel ri xumol xuch'ey, y toq xch'eyetej xuben más juba' jun arroba.

¹⁸Y jari' xuk'uaj-el y xtzolin pa tinamit. Y toq ri ralite' xutz'et ronojel ri rupich'o'l ri xuben chupan ri q'ij ri', jari' toq ri Rut xberelesaj-pe chuqa' ri cebada k'ilin ri man xuk'is ta ri paq'ij, y xuya' chire ri ralite'.

¹⁹Roma ri' ri ralite' xuk'utuj chire: ¿Akuchi k'a xapich'olin-wi? Ja ta ri Dios xtiya'on urtisanik pa ruwi' ri achin ri xato'on, xcha' ri Noemí. Y ri Rut xutzijoj k'a chire ri ralite' chi ri ulew ri akuchi xpich'olin-wi, richin jun achin rubini'an Booz.

²⁰Y ri Noemí xubij k'a: Ja ta ri Dios xtiya'on rutzil pa ruwi' rija', roma janila utz ri najin chubanik qik'in roj ri k'a oj k'es na kan, y xa kan jun utzil chuqa' ri najin chubanik chike ri ánima taq qachijilal. Ri achin ri' xa kan qach'alal-wi, roma ri' kan yojruto' y tikirel chi nok jun kolonel qichin, xcha' ri Noemí chire ri Rut.

²¹Y ri Rut xubij: Ri achin ri' xubij chuqa' chuwe chi utz chi yitzeqe' chikij ri raj-ik'a' ixoqi' y keri' ninben k'a toq xtik'is na ri q'atoj, xcha'.

²²K'ari' ri Noemí xubij chire ri Rut: Kan utz ri junan yabe kik'in ri aj-ik'a' ixoqi', richin man yabe ta pa jun chik ulew, y keri' man jun yanaqon, xcha'.

²³Y ri Rut kan keri' xuben; xk'oje' chikikojol ri raj-ik'a' ri Booz. Xpich'olin chiri' k'a toq xk'is na ronojel ri ruq'atik ri cebada y chuqa' ruq'atik ri trigo. Y rija' kan ronojel k'a q'ij nitzolin rik'in ri ralite'.