Read Kaqchikel Rut 4 Bible Online

Rut 4 - Kaqchikel bible

Rut 4

¹Toq xpaq'ijer k'a q'anej, jari' toq ri Booz xbetz'uye' chuchi' ri tinamit ri akuchi nikimol-wi-ki' ri winaqi'. Y xq'ax k'a el keri' ri ach'alalri'il ri achoq pa ruwi' ch'owineq-wi y ri Booz xubij k'a chire ri achin ri': Táta, katanpe na juba' wawe' y katz'uye' wik'in, xcha' chire. Y ri achin ri' kan xpe k'a y xtz'uye' rik'in.

²Jari' toq ri Booz xuk'utuj utzil chike e lajuj rijita'q taq achi'a' ri k'o kiq'ij chupan ri tinamit y xubij chike: Tibana' utzil, kixtz'uye' wawe' qik'in roj, xcha'. Y rije' kan xebetz'uye' k'a chiri' kik'in ri e ka'i' achi'a' ri'.

³K'ari' ri Booz xch'on rik'in ri ach'alalri'il ri' y xubij chire: Ri Noemí ri tzolejineq-pe pa ruwach'ulew Moab, nrajo' nuk'ayij juba' chire ri ulew ri richin kan ri qach'alal Elimélec.

⁴Y xinquqa' jebel chi ja rat ri ruk'amon chi yaloq'on kan ri ulew ri' chikiwech re achi'a' re', ri k'o kiq'ij chupan re qatinamit. Tabij chikiwech rije' wi nawajo' naloq' kan y wi man nawajo' ta kan taq'alajirisaj jumul, roma wi keri' kan ja yin ri xkiloq'on kan ri', roma yin kan in rach'alal kan chuqa' ri Elimélec, xcha' ri Booz. Y ri rach'alal xubij chi kan nuloq' kan ri ulew ri'.

⁵Y xeri' ri Booz xubij chuqa' chire ri rach'alal: Chupan ri q'ij toq rat xtaloq' kan ri ulew chire ri Noemí, chuqa' ja q'ij ri' nik'atzin chi yak'ule' rik'in ri Rut ri aj-Moab, ri malkawineq kan, richin keri' man nik'is ta qa ri rubi' ri ánima Elimélec pa ruwi' ri rulew, xcha'.

⁶Y toq ri ach'alalri'il xrak'axaj keri', xubij: Wi keri', más utz man ninloq' ta kan ri ulew, roma pa ruk'exel chi nok-qa wichin, xa nel chik kan pa nuq'a' y ri walk'ual xa man xtikichinaj ta kan re'. Más utz ninya' kan pan aq'a' chi ja rat kaloq'o ri ulew, roma yin man yitikir ta ninloq', xcha' ri ach'alalri'il.

⁷Y k'o k'a jun banobel richin retal ri kan ojer ri' k'o pe chikikojol ri aj-Israel, chi toq ek'o e ka'i' nikiben jun loq'oj o jun k'ayij, k'o chi ri nik'ayin nrelesaj jun ruxajab richin nuya' kan chire ri niloq'on. Y kan ja k'a retal re' chikiwech konojel ri winaqi' ri ruchojmilal ri xkiben.

⁸Ri ach'alalri'il xubij chik k'a chire ri Booz: Más utz taloq'o' kan rat ri ulew ri', xcha'. Y jari' toq xrelesaj jun ruxajab richin xuya' chire ri Booz.

⁹Y jari' toq ri Booz xubij chike ri rijita'q taq achi'a' ri k'o kiq'ij y chike ri winaqi' ri ek'o chiri': Rix xitz'et re xbanatej re wakami, chi yin ninloq' kan ronojel chire ri Noemí, ronojel ri kichinan kan ri Elimélec, ri Quilión y ri Mahlón.

¹⁰Y chuqa' yik'ule' rik'in ri Rut aj-Moab ri rixjayil kan ri Mahlón, richin man nik'is ta qa ri rijatzul rija'. Xtinben k'a keri' richin chi k'o ta jun ak'ual ri xtik'oje' pa ruk'exel y keri' man xtiyojtej ta ri rubi' chiqakojol roj ri qach'alal y ri qawinaq y richin chuqa' xtrichinaj kan ri ulew. Wakami k'a, kan ja rix ri xixtz'eton ronojel ri xbanatej, xcha' rija'.

¹¹Y konojel k'a ri winaqi' ri ek'o chiri' ri e kachibilan ri achi'a' ri k'o kiq'ij, xkibij: Qitzij, roj xqatz'et ronojel re'. Ja ri Jehová xtiya'on ri urtisanik pa ruwi' ri ixoq ri xtapon pan awachoch y chuqa' xtik'oje' ta k'iy awalk'ual rik'in achi'el xuben chike ri Raquel y ri Lea, ri oj kiy-kimam kan roj. Y rat Booz kan ta xkatok jun nimalej tata'aj chikikojol ri e rijatzul kan ri Efrata, wawe' pa Belén.

¹²Ri Jehová kan ta xtuben chi ri awalk'ual ri xkek'oje' rik'in ri ixoq ri', xke'ok ta nima'q y xtik'oje' ta janila kitzijol, achi'el xe'ok ri rijatzul ri Fares, ri xalk'ualex roma ri Judá rik'in ri Tamar, xecha'.

¹³Y keri' ri Booz xuk'en k'a ri Rut richin xk'ule' rik'in. Y toq junan chik k'a ek'o chi e ka'i', chi achin chi ixoq, ri Jehová xuben k'a chi ri Rut xyawej kan chirij ak'ual y xalex jun ral ti ala'.

¹⁴Y jari' toq ri ixoqi' richin ri tinamit xkibij chire ri Noemí: Niqaya' ruq'ij ri Jehová roma xuya' jun awiy, ri xtichajin awichin y niqarayibej k'a chi xtok ta jun nimalej achin chiqakojol roj ri aj-Israel.

¹⁵Wakami ja rija' k'a ri xtikuquban ak'u'x, y ja rija' chuqa' xtilin awichin toq xkarijix. Y ri awali' qitzij chi janila yarupoqonaj; rija' kan más k'a rejqalen ke chuwech ek'o ta e wuqu' awal alaboni', xecha' chire ri Noemí.

¹⁶Y jari' toq ri Noemí xberuk'ama-pe ri ak'ual, y xuch'elej k'a, y kan ja rija' ri xk'iytisan richin.

¹⁷Y ri ixoqi' xkibij: Wakami ri Noemí kan k'o k'a jun ral ti ala', xecha'. Y kan ja rije' k'a xekanon rubi' ri ak'ual; y Obed ri rubi' ri xkiya'. Y ri Obed jari' ri rutata' ri Isaí y chuqa' rumama' ri rey David.

¹⁸Jare' k'a ri e rati't-rumama' ri David: Ri Isaí, ri Obed, ri Booz, ri Salmón, ri Nahasón, ri Aminadab, ri Hesrón y ri Fares.