Read Kaqchikel 1 Sam 12 Bible Online

1 Sam 12 - Kaqchikel bible

1 Sam 12

¹Ri Samuel xubij chike ri ruwinaq israelita: Yin xinben yan k'a ronojel ri niwajo' rix. Ri xik'utuj chuwe xinya' chiwe, y roma ri' wakami k'o jun i-rey.

²Wakami k'a, jare' k'o ri i-rey ri xtiyuqen iwichin. Yin xa in ri'j chik y ri rusumal-nuwi' xsaqir yan roma ri nurijixinen. Y ri walk'ual kan ek'o k'a chi'ikojol y yin kan ix nuyuqen k'a pe k'a re wakami.

³Wakami k'a jare' ink'o chiwech. Tiq'alajirisaj ronojel chuwij chuwech ri Jehová y chuwech ri rey. Wi jun chiwe rix ri weleq'an ri rubóyix o ri rubur, tubij. O wi k'o jun nutz'ukun-tzij chirij o nuyoq'on ta, o wi k'o jun ri in rupuaqin, tibij-pe; y xtintzolij chire, xcha' ri Samuel chike.

⁴Jak'a konojel ri winaqi' xkibij chi man jun bey rubanon keri'.

⁵K'ari' ri Samuel xubij: Ri Jehová jari' ri xtz'eton ronojel ri xibij rix. Wakami k'a chuqa' ri rey xutz'et ronojel chuwij yin chi rix man jun itzel xiwil ta chuwij chupan re q'ij re', xcha'. Y konojel ri winaqi' xkibij chi kan keri' wi.

⁶K'ari' ri Samuel xubij chire ri tinamit: Ja ri Jehová, ri xerucha' ri Moisés y ri Aarón richin xerelesaj-pe ri qati't-qamama' pan Egipto. Y ja rija' ri xtz'eton ronojel ri xinben yin.

⁷Wakami k'a chuwech ri Jehová xtinbenataj chiwe ronojel ri kolotajik ri rubanon-pe qik'in roj y ri xuben kik'in ri qati't-qamama'.

⁸Toqaqa k'a chi'ik'u'x toq ri Jacob y ri rijatzul xe'ok pan Egipto, y ri aj-Egipto xekiya' pa tijoj-poqonal ri qati't-qamama'. Rije' xesujun chuwech ri Jehová chire ri tijoj-poqonal ri nikiq'axaj, y roma ri' ri Jehová xuteq ri Moisés y ri Aarón richin xerelesaj-pe pan Egipto ri qati't-qamama', y xeruya' kan re wawe'.

⁹Jak'a rije' xa xkimestaj kan ri Jehová ri qa-Dios. Roma ri' rija' xerujech pa ruq'a' ri Sísara, jun aj-raqen kichin ri aj-labal richin ri Jabín, rey richin ri tinamit Hasor. Xerujech chuqa' pa kiq'a' ri aj-Filistea, y pa kiq'a' chuqa' ri moabita.

¹⁰Y ri qawinaq xtzolej k'a kik'u'x y xkibij: Jehová, roj kan xojmakun chawech, roma xatqamalij kan y xeqasamajij ri Baal y ri Astarté. Tabana' jun utzil, qojakolo' pa kiq'a' ri etzelanel qichin, y kan xkatqasamajij k'a, xecha'.

¹¹Roma ri' ri Jehová xeruteq ri Jerubaal, ri Barac, ri Jefté y yin Samuel richin xixqakol pa kiq'a' ri etzelanel iwichin ri ek'o chi'inaqaj. Y keri' rix kan kuqul k'a ik'u'x ix k'es.

¹²Jak'a toq xitz'et chi ri Nahas ri rey kichin ri amonita xyakatej-pe richin nuben labal iwik'in, jari' toq xibij rix chi niwajo' jun i-rey richin nuq'et-tzij pan iwi', stape' ri rubanon-pe kan ja ri Jehová ri qa-Dios, jari' ri qa-rey roj.

¹³Wakami ja k'a i-rey re' ri xicha' rix. Ri Jehová kan xuya' k'a chiwe ri i-rey ri xik'utuj chuwe.

¹⁴Kan iwik'in k'a rix y ri rey nik'oje-wi kan: Wi nik'oje' rukiy ri Jehová chiwech, wi xtisamajij, wi xtiwak'axaj ri ruch'abel y wi kan xkixok nimey-tzij richin ri ruch'abel ri Jehová.

¹⁵Jak'a wi rix man xtiwak'axaj ta ri ruch'abel ri Jehová y kan man xkixniman ta chire, jari' k'a toq rija' kan xtuya' ri rutojbalil-mak pan iwi' rix y pa ruwi' ri i-rey.

¹⁶Tiwoyobej k'a re wakami, y titz'eta' re jun nimalej banobel richin retal ri xtuben ri Jehová chiwech rix.

¹⁷Wakami jare' ri q'ij richin nik'ol ri itiko'n richin ri trigo, jak'a yin xkich'on rik'in ri Jehová, richin nuteq-pe koqolajay y job richin xtinabej y xtitz'et chi kan janila nim ri imak ri xiben chuwech ri Jehová, chi xik'utuj jun rey, xcha' ri Samuel.

¹⁸Ri Samuel xch'on k'a rik'in ri Jehová, y ri Jehová xuteq k'a pe koqolajay y job chupan ri q'ij ri', y chijun k'a tinamit xkik'en rukiy ri Jehová, y chuqa' ri Samuel.

¹⁹K'ari' konojel ri winaqi' xkibij chire ri Samuel: Tabana' utzil kach'on rik'in ri Jehová ri qa-Dios pa qawi' roj ri oj rusamajel richin chi man yojken ta, roma pa ruwi' ronojel ri mak ri qabanon kan xqaben chik re jun mak re', xecha'.

²⁰Ri Samuel xubij chike: Man tixibij-iwi', kan qitzij wi chi rix xiben re mak re', xaxe k'a ninbij chiwe chi man k'a timalij kan ri Jehová, xa kan tisamajij k'a rik'in ronojel iwánima.

²¹Man tich'er kan iwi' richin yixbe chikij ch'aqa' chik dios ri man yixkito' ta, ni man yixkikol ta, roma xa man jun kejqalen.

²²Ri Jehová kan man xtumalij ta kan ri rutinamit, roma ri nimalej rubi'; roma kan xrajo' richin xojok rutinamit rija'.

²³Roma ri', kan nej ta k'a k'o chuwe yin chi xkimakun chuwech ri Jehová, richin man yich'on ta pan iwi' rix rik'in ri Jehová. Yin xa kan xkixintijoj k'a chupan ri choj laj bey.

²⁴Xaxe k'a nik'atzin chi kan nik'oje' rukiy ri Jehová chiwech y kan qitzij tisamajij rik'in ronojel iwánima. Kan toqaqa chi'ik'u'x ronojel ri rubanon iwik'in rix.

²⁵Jak'a wi xa ja ri etzelal ri xtiben chuwech ri Jehová, kan tiwetamaj k'a chi rix y ri rey xkixk'is chi'iwonojel, xcha'.