Read Kaqchikel 1 Sam 13 Bible Online

1 Sam 13 - Kaqchikel bible

1 Sam 13

¹Ri Saúl kan k'o chik k'a rujuna' toq xok kan chupan ri q'atbel-tzij y toq k'o chik ka'i-oxi' juna' pa q'atbel-tzij,*f4*

²jari' toq xerucha' e 3,000 aj-labal chikikojol ri ruwinaq. Y e 2,000 achi'a' xek'oje' rik'in rija' chiri' pa Micmás, chiri' pa juyu' Betel. Y ri Saúl k'o k'a jun ruk'ajol rubini'an Jonatán, y ri ch'aqa' chik aj-labal xek'oje' kan rik'in rija' chiri' pa Guibeá. Y ri ch'aqa' chik achi'a' xeruteq-el pa taq kachoch.

³K'ari' ri Jonatán xeruchop chi oyowal ri aj-Filistea ri akuchi ek'o-wi-qa ri k'o pa tinamit Guibeá, y xketamaj k'a ri ch'aqa' chik aj-Filistea. K'ari' ri Saúl xuteq rubixik chi tixupux ri trompeta chupan chijun ri ruwach'ulew, richin xeroyoj konojel ri ruwinaq richin nikiben oyowal.

⁴Y konojel k'a ri israelita xkak'axaj chi ri Saúl xuch'ek yan ri akuchi ek'o-wi-qa ri aj-Filistea ri e etzelanel kichin. K'ari' rije' xkimol-ki' rik'in ri Saúl chiri' pa Guilgal.

⁵Jak'a ri aj-Filistea xkimol-ki' chuqa', richin nibekibana' oyowal kik'in ri israelita. Rije' e kik'uan e 30,000 carruaje richin oyowal,6,000 achi'a' ri e beneq chirij kiej y janila e k'iy aj-labal ri e beneq chikij: Kan man e ajlatel ta k'a. Xejote-q'anej y xek'oje-qa chiri' pa Micmás, ri k'o pa relebel-q'ij chire ri Bet-avén.

⁶Toq ri israelita xkina' chi kan yech'akatej yan koma ri aj-Filistea, xa xe'animej y xkewaj-ki' pa taq jul, chuxe' taq ulew, kojol taq abej y chupan ri nima'q taq jul ri e k'oton.

⁷Y ek'o k'a chike rije' xkiq'axaj ri raqen-ya' Jordán, y xebe pa ruwach'ulew Gad, pa ruwach'ulew Galaad. Jak'a ri Saúl kan k'a k'o na kan chiri' pa Guilgal. Y konojel k'a ri aj-labal ri e beneq chirij, kan janila yebaybot roma xibinri'il.

⁸Ri Saúl xroyobej ri wuqu' q'ij richin napon ri Samuel achi'el rubin kan chire, jak'a ri Samuel xa man jani tapon pa Guilgal. Y ri aj-labal ri ek'o rik'in xkichop nikitaluj-el-ki' pan ewel.

⁹Toq ri Saúl xutz'et keri', xubij chi tuk'uex-apo chuwech rija' ri chikop ri xtiporox jumul y ri sipanik richin nuq'alajirisaj chi nijunamatej-kiwech rik'in ri Jehová. Y kan ja rija' k'a ri xporon ri chikop chuwech ri Jehová.

¹⁰Y toq k'a juba' tik'achoj chuporoxik ri chikop, jari' toq xapon ri Samuel. Y ri Saúl xuk'ul-apo y xuq'ejela'.

¹¹Jak'a ri Samuel xuk'utuj chire ri achike roma keri' xuben. Y ri Saúl xubij: Toq yin xintz'et chi ri aj-labal xkichop nikitaluj-el-ki', y rat man xape ta chupan ri q'ij ri abin kan chuwe, y ri aj-Filistea kimolon chik ki' chiri' pa Micmás richin yeyakatej chuwij,

¹²jari' toq xinbij-qa: Wakami xkepe chuwij ri aj-Filistea pa Guilgal, y yin man nujachon ta wi' pa ruq'a' ri Jehová richin yiruto', xicha-qa. Roma ri' yin k'o chi xinsuj re jun kamelabel re', xcha'.

¹³K'ari' ri Samuel xubij chire ri Saúl: Rat xa kan xach'ujer chubanik re'. Wi ta rat xataqej ri rupixa' ri Jehová ri qa-Dios ri rubin chawe, kan ja ta re wakami xujikiba' ri aq'atbal-tzij pa ruwi' ri Israel richin jantape'.

¹⁴Jak'a re wakami ri aq'atbal-tzij xa man xtiyaloj ta. Roma ri Jehová xukanoj yan jun achin ri kan niqa' chuwech Rija'. Y kan xucha' richin xtok tata'al pa ruwi' ri rutinamit, roma rat xa man xaben ta ri xubij ri Jehová chawe, xcha'.

¹⁵K'ari' ri Samuel xel-el chiri' pa Guilgal y xuchop chik el rubey. Y ri Saúl xerajlaj k'a konojel ri aj-labal ri ek'o rik'in, y xaxe chik la'eq e 600 achi'a' ri ek'o kan.

¹⁶Ri Saúl, ri Jonatán y ri aj-labal ri ek'o kik'in, xkichop kibey y xe'apon-q'anej pa tinamit Guibeá ri k'o pa ruwach'ulew Benjamín. Jak'a ri aj-Filistea ek'o-qa chiri' pa Micmás.

¹⁷Y ri aj-Filistea xkich'er k'a el ki' pa oxi' tzobaj richin ye'eleq' kik'in ri israelita. Jun chike ri tzobaj xebe pa bey richin ri Ofrá ri nibe pa ruwach'ulew Sual;

¹⁸jun chik tzobaj xebe pa Bet-horón, y ri rox tzobaj xebe pa bey ri nitzu'un pa taq taq'aj richin ri Seboím, ri nibe-apo pa tz'iran ruwach'ulew.

¹⁹Y chupan chijun ri ruwach'ulew Israel kan man jun niya'ox ta q'ij chire richin nusamajij ta ri q'eqapueq, roma ri aj-Filistea man nikajo' ta chi ri israelita nikiben ri ki-espada ni ri kikum.

²⁰Roma ri' konojel ri aj-Israel k'o chi yebe kik'in ri aj-Filistea richin nibekibana' rey ri kisamajbal.

²¹Nibekibana' rey ri ki-arado, ri kasaron, ri ikej y ri rutza'n ri koq'bel wákix, rije' kan janila jotol ri xkitoj.

²²Keri' chupan ri q'ij toq xban oyowal chikikojol ri aj-labal xa kan xaxe k'a ri Saúl y ri Jonatán ri k'o ki-espada y kikum.

²³Y k'o k'a jun q'ij jun tzobaj chike ri aj-Filistea xe'el-el ri akuchi ek'o-wi-qa y xbekichajij ri bey ri niq'ax-el pa Micmás.