Read Kaqchikel 1 Sam 14 Bible Online

1 Sam 14 - Kaqchikel bible

1 Sam 14

¹Y ri Jonatán ri ruk'ajol ri Saúl xubij chire ri ruto'onel ri nuk'uan ri rukamisabal: Jo', y qojq'ax-apo la juk'an k'a akuchi ek'o-wi-qa la aj-Filistea, xcha'. Y rija' man xubij ta kan chire ri rutata'.

²Jak'a ri Saúl k'o chunaqaj ri tinamit Guibeá chuxe' jun che' granado, ri akuchi nich'ay-wi trigo, y e rachibilan ri e 600 achi'a'.

³Y chikikojol k'a rije' k'o ri Ahías, ja rija' ri uk'uyon ri efod, ri tzieq banon rik'in lino. Ri Ahías ruk'ajol ri Ahitub, re Ahitub re' runimal ri Icabod ri e ruk'ajol kan ri Finees, y e rumam kan ri Elí. Y kan man jun k'a xnaben-el chi ri Jonatán xa xbe yan.

⁴Y ri akuchi k'o chi niq'ax-wi ri Jonatán richin napon kik'in ri aj-Filistea ek'o ka'i' nimalej taq abej juyu' kibini'an Bosés y Sene.

⁵Jun chike ri abej juyu' k'o pa xaman chunaqaj ri Micmás, y ri jun chik k'o pa xokon chunaqaj ri Guibeá.

⁶Y ri Jonatán kan kere' k'a rubin chire ri ruto'onel: Jo', qojq'ax-apo kik'in la winaqi' la', ri man ketaman ta ruwech ri Dios. Rik'in juba' ri Jehová xqojruto', roma chuwech rija' man jun k'ayew richin yojch'akon, stape' man oj k'iy ta, xcha'.

⁷Y ri to'onel xubij chire: Jo' k'a, roma yin jare' ink'o awik'in. Tabana' ronojel ri ach'obonik, xcha' chire.

⁸Y ri Jonatán xubij: Jo' k'a, y toq xqojapon-qa chupan ri bey, k'ari' xtiqak'ut-qi' chikiwech ri aj-Filistea.

⁹Y wi nikibij chi roj yeqoyobej k'a toq rije' xkexule-pe qik'in, roj kan man xqojsilon ta el ri akuchi ojk'o-wi, y man xqojote' ta q'anej kik'in.

¹⁰Y wi nikibij chiqe chi roj yojote-q'anej kik'in, kan xqojote' k'a q'anej kik'in, roma jare' ri retal chi ri Jehová xerujech yan pa qaq'a', xcha'.

¹¹Y kan keri' k'a xkiben. Xkik'ut k'a ki' chikiwech ri aj-Filistea richin xetz'etetej. Y toq rije' xekitz'et-pe, xkibij: ¡Ke'itz'eta' la taq hebreo, xe'el-pe pa jul ri akuchi kewan-wi-ki'!, xecha'.

¹²K'ari' xesik'in-qa richin xech'on-qa chire ri Jonatán, y xkibij: Kixjote-pe qik'in, q'alaj k'a ri' wi xkixtikir chiqij, xecha'. Kan jari' ri Jonatán xjote-q'anej, roma xq'ax chuwech chi ri Jehová xerujech yan ri aj-Filistea pa ruq'a'.

¹³Y xjote' k'a q'anej ri Jonatán chuwech ri abej juyu', y nijukun k'a beneq-q'anej. Y ri ruto'onel kan rutzeqeliben-el. Rokik e jotol-q'anej, ri Jonatán yeruqasaj kan ri achi'a' pan ulew y ri ruto'onel yerukamisaj kan jumul.

¹⁴Y jare' ri nabey kamisanik ri xkiben ri Jonatán y ri ruto'onel y ri kikojol ri xkiya' jun la'eq juwineq waqlajuj jaj, y xekikamisaj jun la'eq e juwineq achi'a'.

¹⁵Y xpe k'a jun nimalej xibinri'il chike konojel ri achi'a' aj-Filistea ri ek'o chiri', ri ek'o pa juyu', ri chajinela' y konojel ri e beneq pan eleq'. Chuqa' kan xuben k'a jun nimalej silonel chiri'. Y ronojel re' kan ja ri Dios ri xtaqon-pe pa kiwi' rije'.

¹⁶Y ri chajinela' richin ri Saúl ri ek'o pa Guibeá xkitz'et k'a chi ri aj-Filistea sachineq kik'u'x, y kan man nikil ta k'a akuchi yebe-wi.

¹⁷K'ari' ri Saúl xubij chike ri achi'a' ri e rachibilan: Wakami tisik'ij bi'aj y titz'eta' achike ri maneq chiqakojol, xcha'. Xkisik'ij k'a ri bi'aj y xkitz'et chi ja ri Jonatán y ri ruto'onel ri man ek'o ta apo chikikojol.

¹⁸Y ri Ahías ja rija' ri sacerdote, y roma ri' ri Saúl xubij chire chi tuk'ama-pe ri káxa richin ri rujikibel-tzij ri Dios richin nikik'utuj chire ri Dios. Chupan ri q'ij ri' ri káxa kan kik'in ri aj-labal k'o-wi.

¹⁹Y rokik ri Saúl nich'on rik'in ri sacerdote, ri aj-Filistea más xebujbu-q'anej chiri' ri akuchi ek'o-wi-qa, y kan man yetane' ta k'a qa. K'ari' ri Saúl xubij chire ri sacerdote: Wakami man niqoyobej ta chik richin niqak'ulubej-q'anej ri Jehová, xcha'.

²⁰Y xaxe ri' ri Saúl y konojel ri aj-labal ri kan ek'o rik'in xkimol-el-ki', y xebe k'a chi'anin ri akuchi najin-wi ri oyowal. Jari' toq xkitz'et chi ri aj-Filistea xa kiyon rije' nikikamisala-qa-ki' roma kan jumul sachineq kik'u'x.

²¹Y ri israelita ri kan ek'o-pe chikikojol ri aj-Filistea, ri kan e beneq chikij pa labal, xa xjunamatej chik el kiwech kik'in ri kiwinaq israelita.

²²Keri' chuqa' ri ch'aqa' chik israelita ri kewan kan ki' chuwi' taq juyu' richin ri Efraín, toq xkak'axaj chi ri aj-Filistea xe'animej, chuqa' rije' chi'anin xekitzeqelibej richin yekichop chi oyowal.

²³Y xekitzeqelibej más kela' chire ri tinamit Bet-avén. Y keri' ri Jehová xerukol ri israelita chupan ri q'ij ri'.

²⁴Ri Saúl ruya'on rutzij chike, y xubij: K'o chi yeqak'is ri e etzelanel qichin chupan re q'ij re', y kan itzel k'a ruwa-ruq'ij xabachike ri xtitijo ruway, xcha'. Y roma ri' konojel ri aj-labal kan man jun kitijon, y roma ri' maneq chik kuchuq'a'.

²⁵Y xe'apon k'a pa jun k'echelaj ri akuchi k'o k'iy kab ri nikiya' ri taq chikopi', y kan nibiyin pan ulew.

²⁶Xkitz'et k'a ronojel re', jak'a man jun chike ri achi'a' ri xuk'en ta qa ri kab ri', roma konojel kixibin-ki' chuwech ri tzij ri xuya' ri Saúl.

²⁷Jak'a ri Jonatán man xrak'axaj ta chi ri rutata' ruya'on ri rutzij pa kiwi' ri achi'a', y roma ri' rija' xuya-qa ri ruch'ame'y chupan ri kab, y xuju-apo pa ruchi'. Y xaxe toq xutej xk'oje' chik el ruchuq'a'.

²⁸K'ari' xch'on-apo jun chike ri achi'a' y xubij chire chi ri rutata' rubin chi itzel ruwa-ruq'ij ri achike xtiwa'. Y roma ri' konojel rije' man jun chik kuchuq'a' roma man jun kitijon.

²⁹Jak'a ri Jonatán xubij: Ri nata' xa xuk'en-pe ruk'ayewal pa ruwi' ri qatinamit roma re ya'on-tzij re'. Kinitz'eta', wakami k'o chik jun bey wuchuq'a' roma xintej juba' kab.

³⁰Y wi ta qatijon juba' chire ri xqamej-pe chuwi-kiq'a' ri aj-Filistea, wakami xa kan más ta e k'iy chike rije' ri e qakamisan, xcha'.

³¹Chupan k'a ri q'ij ri' ri israelita xekich'ek ri aj-Filistea. Xkichop k'a pe ri oyowal pa Micmás y xe'apon k'a pa tinamit Aialón y ri israelita kan janila e kosinaqi' chik.

³²Y roma ri' kan chi'anin xebe chirij ri k'o rejqalen ri kimajon-pe chuwi-kiq'a' ri aj-Filistea, y xekichop k'a ri karne'l y ri wákix. Xekikamisaj k'a y xekitej toq man jani tel-el ri kik'.

³³Y re' xya'ox k'a rutzijol chire ri Saúl, chi ri aj-labal ye'ajin yemakun chuwech ri Jehová, roma nikitej ti'ij rik'in kik'. Y ri Saúl xubij chike chi kan janila xemakun. Y k'ari' xubij chike ri xeya'on rutzijol chire: Tisurij k'a pe jun abej nim re wawe'.

³⁴Y titaluj-iwi' chupan re tinamit richin tiya' rutzijol chike chi tikik'ama-pe chikijujunal ri kiwákix y ri kikarne'l, y kekikamisaj pa ruwi' re abej re' richin tikitija'. Keri' man chik kemakun chuwech ri Jehová Dios, roma nikitej ri ti'ij rik'in kik', xcha'. Keri', chikijujunal k'a xkik'en-pe ri awej chupan ri jun aq'a' ri', y xekikamisaj chiri'.

³⁵K'ari' ri Saúl xupaba-q'anej jun porobel richin kamelabel chuwech ri Jehová. Y ja nabey porobel re' ri xuben rija'.

³⁶Y k'ari' ri Saúl xubij chike ri aj-labal: Qojqaqa-qa kik'in ri aj-Filistea re aq'a' re', y keqak'isa'. Richin keri' toq xtiseqer konojel xeken yan, xcha'. Y rije' xkibij chi tubana' achike ri niqa' chuwech rija'. Jak'a ri sacerdote xubij chi más utz tikik'utuj na chire ri Dios ri achike ruk'amon nikiben.

³⁷Y ri Saúl xuk'ulubej k'a ri Dios y xubij: ¿K'atzinel ninben oyowal kik'in ri aj-Filistea? ¿Xke'ajech kami pa qaq'a'?, Xcha'. Jak'a ri Jehová man jun xubij chire chupan ri aq'a' ri'.

³⁸K'ari' ri Saúl xubij chike ri rijita'q taq achi'a' ri k'o kiq'ij: Kixjel-pe, y titz'eta' ri achike xmakun chuwech ri Dios.

³⁹Roma ri Jehová ri nikolon ri qatinamit kan k'es-wi. Y yin kan nuya'on k'a nutzij chuwech rija' chi stape' kan ja ri nuk'ajol Jonatán xmakun, k'o chi niken, xcha'. Y man jun k'a chike ri achi'a' ri' ri k'o ta ri xubij-apo.

⁴⁰Y k'ari' ri Saúl xubij chike konojel ri achi'a' chi kek'oje' la juk'an-apo, y ri Jonatán y rija' xkek'oje' ri chiri'. Y ri achi'a' xkibij chire ri Saúl chi tubana' ri niqa' chuwech.

⁴¹K'ari' ri Saúl xubij chire ri Jehová: Tak'utu' chiqawech wakami achike ri makuwineq, xcha'. Xban k'a ri sakinik, y xqaqa k'a pa kiwi' ri Saúl y ri Jonatán, y ri tinamit xtotej kan.

⁴²Y ri Saúl xubij chik: Wakami tiban chik k'a ri sakinik chiqakojol roj oj ka'i', wi niqaqa pa nuwi' yin o pa ruwi' re nuk'ajol, xcha'. Y xqaqa k'a pa ruwi' ri Jonatán.

⁴³K'ari' ri Saúl xuk'utuj chire ri Jonatán chi tuq'alajirisaj ri achike xuben. Y ri Jonatán xubij: Kan qitzij na wi yin xintej ti juba' kab ri xink'en-qa rik'in ri nuch'ame'y. ¿Kan roma kami ri' yiken?, xcha'.

⁴⁴Y ri Saúl xubij: Kan ja ri Dios xtiya'on rutojbalil-mak pa nuwi' wi rat man xkaken ta, xcha'.

⁴⁵K'ari' ri aj-labal xkibij chire ri Saúl: Roj kan man xtiqaya' ta q'ij chi niken ri Jonatán roma ja rija' ri xkolon qichin roj ri oj israelita. Chuwech ri Jehová niqabij, chi ri Jonatán kan man jun rusumal-ruwi' ri xtitzaq ta pan ulew, roma ri xuben kan xuben rik'in ri ruto'onik ri Dios, xecha'. Y keri' toq ri achi'a' ri' xkikol ri Jonatán chuwech ri kamik.

⁴⁶Y ri Saúl man xerutzeqelibej ta chik ri aj-Filistea; y rije' xetzolej pa kiruwach'ulew.

⁴⁷Keri' ri Saúl xok kan chupan ri q'atbel-tzij chiri' pan Israel. Kan xuben k'a oyowal kik'in ri etzelanel richin ri ek'o chunaqaj: Ri aj-Moab, ri aj-Amón, ri aj-Edom, ri aj-Sobá y ri aj-Filistea. Y xabakuchi beneq-wi richin nuben oyowal kan nich'akon-wi.

⁴⁸Xerumol k'a jun tzobaj aj-labal, y xekich'ek k'a ri amalecita ri ye'eleq'an kik'in, y keri' xerukol ri ruwinaq pa kiq'a' ri winaqi' ri'.

⁴⁹Ja kibi' re' ri e ralk'ual ri Saúl: Ri Jonatán, ri Isví y ri Malquisúa. Y chuqa' ek'o e ka'i' rumi'al: Ri nimalaxel rubini'an Merab y ri chaq'laxel rubini'an Mical.

⁵⁰Y ri rixjayil ri Saúl rubini'an Ahinóam rumi'al kan ri Ahimaas. Y ri aj-raqen pa kiwi' ri aj-labal rubini'an Abner ruk'ajol kan ri Ner, ruch'utitata' ri Saúl.

⁵¹Ri Cis y ri Ner e ruk'ajol kan ri Abiel.

⁵²Ri Saúl kan jantape' k'a nikiben labal kik'in ri aj-Filistea. Roma ri' toq nrak'axaj chi k'o jun achin ri maneq xibinri'il chuwech y kan utz richin labal, jari' ri nroyoj.