Read Kaqchikel 1 Sam 15 Bible Online

1 Sam 15 - Kaqchikel bible

1 Sam 15

¹K'o k'a jun q'ij ri Samuel xubij chire ri Saúl: Ja yin ri xiruteq ri Jehová richin xinqasaj aceite pan awi' richin xatok rey pa ruwi' ri tinamit Israel. Wakami k'a, kan tawak'axaj ri ruch'abel ri Jehová ri nrajo' nubij chawe.

²Kere' rubin ri Jehová k'iytisanel richin ronojel: Yin xtinya' tijoj-poqonal pa kiwi' ri amalecita, roma ojer kan xkipaba-ki' chikiwech ri iwati't-imama' toq xe'el-pe pan Egipto.

³Kixbiyin k'a y tibebana' oyowal kik'in. Tik'isa' kan ronojel ri k'o kik'in, y man tijoyowaj kiwech. Ke'ikamisaj kan chi achi'a', chi ixoqi', chi ak'uala', y chuqa' ri ak'uala' ri k'a yetz'uman na, chuqa' ri kiwákix, ri kikarne'l, ri ki-camello, ri kibur y ronojel ri kawej, rubin ri Jehová, xcha'.

⁴Y ri Saúl xuteq koyoxik konojel ri aj-labal, y k'ari' xusik'ij kibi' chiri' pa tinamit Telaím. Xutz'et k'a chi ek'o e 200,000 aj-labal ri yebe chikaqen; y e 10,000 ri e rijatzul kan ri Judá.

⁵K'ari' ri Saúl y ri achi'a' xenaqajub-apo chunaqaj ri ruk'u'x ri ruwach'ulew kichin ri amalecita, y xkewala-ki' kojol taq siwan, y xekiyala' pikbel pa kibey ri e etzelanel kichin.

⁶Y ri Saúl xuteq rubixik chike ri winaqi' quenita chi tikijech'ej-ki' kik'in ri amalecita richin chi man yek'is ta junan kik'in rije', roma ri quenita xkijoyowaj kiwech ri israelita toq e jotol-pe pan Egipto. Y ri winaqi' quenita xe'el k'a pe chikikojol ri amalecita.

⁷Y ri Saúl kan xeruch'ek k'a, xtiker-pe pa ruwach'ulew Havilá y xapon k'a pa ruwach'ulew Sur, ri k'o pa relebel-q'ij chire ri Egipto.

⁸Y xkichop k'a el ri Agag rey kichin ri amalecita, jak'a konojel winaqi' richin ri tinamit ri' xekikamisaj kan chi espada.

⁹Y ri Saúl y ri aj-labal xa xkijoyowaj ruwech ri Agag, y man xkikamisaj ta. Chuqa' man xekikamisaj ta ri jebelej, nima'q y kokoj taq awej. Chuqa' ronojel ri k'o kejqalen man xkineq ta, jak'a ri xa man yek'atzin ta y maneq rejqalen, jari' xekik'is kan jumul.

¹⁰Y ri Jehová xch'on rik'in ri Samuel y xubij chire:

¹¹Kan niq'axon ri wánima roma xinya' kan rey ri Saúl, y wakami xa xiruya' kan, y man xuben ta ri xinbij chire, xcha'. Y ri Samuel kan janila itzel xuna' toq xrak'axaj keri' y chijun ri aq'a' ri' xoq' chuwech ri Jehová.

¹²Nimaq'a' yan chire ri jun chik q'ij, ri Samuel xbe richin niberuk'ulu' ri Saúl, jak'a xbix chire chi rija' xa xbe pa tinamit Carmel, richin chi xbekibana' jun paban-abej richin natabel richin rija'. Y chirij ri' xbe chik qa pa Guilgal.

¹³Toq ri Samuel xapon rik'in ri Saúl, ri Saúl xubij chire: Ja ri Jehová xturtisan awichin. Yin xinben yan ri xubij ri Jehová chuwe, xcha'.

¹⁴Jak'a ri Samuel xubij: ¿Y achike roma yin ninwak'axaj chi ye'oq' karne'l y wákix?, xcha'.

¹⁵Y ri Saúl xubij: Ri aj-labal xkik'en-pe re', roma man xekikamisaj ta kan ri jebelej taq karne'l, ni ri jebelej taq wákix, y re' nik'atzin richin sipanik richin ri Jehová ri qa-Dios. Jak'a ri ch'aqa' chik ri man yek'atzin ta y ri maneq kejqalen xeqak'is kan jumul, xcha'.

¹⁶Jari' toq ri Samuel xubij chire: Katane-qa chi ch'owen y taya' q'ij chuwe richin ninq'alajirisaj chawe ri achike xubij ri Jehová chuwe re jun aq'a' re', xcha'. Y ri Saúl xunimaj.

¹⁷K'ari' ri Samuel xubij: Stape' pa nabey, rat xana-awi' chi man jun awejqalen. ¿Man banon ta kami chawe chi at jun aj-raqen pa kiwi' ri israelita? Y ri Jehová xarukusaj kan rey pa ruwi' ri tinamit.

¹⁸Ri Jehová xaruteq richin naben re jun samaj re' y xubij chawe chi kabiyin, tabana' oyowal kik'in ri amalecita y ke'ak'isa' kan jumul, xcha' chawe.

¹⁹¿Achike k'a roma man xanimaj ta ri xubij ri Jehová chawe? Y xa xak'en chuwi-kiq'a' ri etzelanel qichin ri k'o rejqalen y xa chirij ri' xbe awánima. Re' kan itzel xaben chuwech ri Jehová, xcha' ri Samuel.

²⁰Y ri Saúl xubij chire ri Samuel: Yin xinimaj rutzij ri Jehová, y xibe akuchi xiruteq-wi, y xenkamisaj kan konojel ri amalecita y xaxe ri Agag ri xinya' kan ruk'aslen y xink'en-pe.

²¹Y ri aj-labal xa xekik'en k'a pe ri e jebel taq karne'l y wákix richin chi nikijech chire ri Jehová, y nikisuj sipanik chuwech rija', ri chiri' pa Guilgal, xcha' ri Saúl.

²²Y ri Samuel xubij: Ri Jehová kan más k'a niqa' chuwech chi ninimex ri rutzij. Man ja ta ri naporoj chikop ri niqa' chuwech, Man ja ta ri nasuj kamelabel ri niqa' chuwech. Rija' kan más k'a nikikot rik'in ri niniman-tzij ke chuwech nasuj kamelabel chuwech. Más rejqalen ri nanimaj rutzij ke chuwech ri ruq'anal ri chikop.

²³Roma ri mak richin ri yakatajinenri'il junan rik'in ri rumak ri nubananej chi niq'alajirisan. Ri nunimirisaj-ri' junan rik'in ri nuya' ruq'ij wachibel. Y roma rat xa man xanimaj ta rutzij ri Jehová, ri Jehová kan xaretzelaj yan. Rija' wakami kan man utz ta chik yarutz'et chi at rey, xcha'.

²⁴K'ari' ri Saúl xubij chire ri Samuel: Yin kan ximakun, roma man xinnimaj ta rutzij ri Jehová y ri ach'abel rat, roma xink'en kikiy ri aj-labal y xinnimaj kitzij. Takuyu' k'a ri numak wakami.

²⁵Y katzolin k'a wik'in richin keri' junan k'a niqaya' ruq'ij ri Jehová, xcha'.

²⁶Jak'a ri Samuel xubij chire: Man xkitzolin ta awik'in, roma rat man xanimaj ta rutzij ri Jehová; rija' chuqa' man utz ta chik yarutz'et chi at rey pa ruwi' re ruwach'ulew Israel, xcha'.

²⁷Y kan jari' toq ri Samuel xupiskolij-el-ri' richin chi nibe, y ri Saúl xujik' kan ri rutza'n ri rutziaq ri ruq'un richin xuq'et-qa, jak'a ri tzieq ri' xa xretzetej.

²⁸K'ari' ri Samuel xubij: Ri Jehová xtrelesaj-el ri q'atbel-tzij pan aq'a' achi'el xretzetej ri nutziaq yin, y xtuya' k'a chire jun chik qawinaq ri más utz chawech rat.

²⁹Roma ri Jehová ri niqaya' ruq'ij roj, man nutz'uk ta tzij, ni man nutzolij ta ri' chirij achi'el jun wineq, xcha'.

³⁰Y ri Saúl xubij chire ri Samuel: Kan qitzij na wi chi yin ximakun, jak'a nink'utuj utzil chawe chi taya' wejqalen chikiwech ri achi'a' ri k'o kiq'ij y chikiwech konojel ri qawinaq, y katzolin chik k'a wik'in richin chi junan niqaya' ruq'ij ri Jehová ri qa-Dios, xcha'.

³¹Y xtzolin chik k'a ri Samuel rik'in ri Saúl, y ri Saúl xuya' ruq'ij ri Jehová.

³²Chirij ri' ri Samuel xuteq rubixik chi tik'amer-pe chuwech ri Agag rey kichin ri amalecita. Y ri Agag rik'in k'a kikoten xapon rik'in ri Samuel, roma xuch'ob-qa chi xq'ax yan ri ruk'ayewal richin ri kamik.

³³Y ri Samuel xubij: Rik'in ri a-espada xe'akamisaj k'iy kal ri qate'. Keri' chuqa' xtuk'uluwachij ri ate' rat, xcha'. Jari' toq ri Samuel xuqupij y xuk'ajij ri Agag chuwech ri Jehová chiri' pa Guilgal.

³⁴Chirij ri' ri Samuel xbe pa Ramá, y ri Saúl xtzolin-el pa rachoch chiri' pa Guibeá.

³⁵Y ri Samuel kan man jun bey chik k'a xberutz'eta' ri Saúl; stape' kan janila nibison roma rija'. Y ri Jehová kan xq'axon k'a rik'in, chi ja ri Saúl ri xukusaj kan rey pa ruwi' ri tinamit Israel.