Read Kaqchikel 1 Sam 2 Bible Online

1 Sam 2 - Kaqchikel bible

1 Sam 2

¹Ri Ana kere' xubij: Jehová, wajaw yin, janila nikikot ri wánima, roma rat Jehová, xaya' janila wuchuq'a' richin yitikir ninsol-wi' chikiwech ri etzelanel wichin, y roma ri' yin yalan yikikot rik'in ri akolotajik.

²Man jun loq'olej k'o, achi'el rat Jehová: kan xaxe wi rat ri atk'o. Man jun chik achi'el rat, y man jun chik tobel niqil achi'el ri k'o awik'in rat.

³Man ke'ibij k'a ch'abel rik'in nimirisanen, ni man tel pa taq ichi' ch'abel rik'in nimirisanen, roma ri Dios, ja rija' ri Jehová ri retaman ronojel, y nutz'et ri achike niqaben.

⁴Y rija' kan xuwulaj ri rute-kich'ab ri nikina' chi k'o kuchuq'a' y ri man jun k'o pa kiq'a', xuya' kuchuq'a'.

⁵Ri pa nabey k'o ronojel kik'in, wakami xa xkiya-ki' pa qajik roma juba' kaxlan-wey. Y jak'a ri xewayjan, wakami man yewayjan ta chik. Ri ixoq ri man nik'oje' ta ral, wakami xek'oje' e wuqu' ral. Y ri xek'oje' janila ral wakami xa maneq chik ruchuq'a'.

⁶Ri Jehová nrelesaj y nuya' k'aslen, y rija' nuben chi niken ri wineq y nuben chire chi nik'astej-el ri akuchi nimuq-wi.

⁷Ri Jehová nuben chi ri wineq nok meba' y nuben chi nok beyom. rija' nuqasaj ruq'ij y nunimirisaj ruq'ij.

⁸Nuben chire ri man jun k'o rik'in, richin nrelesaj-pe pa rumeba'il. Jak'a ri molonel nrelesaj-pe pa q'ayis richin nitz'uye' chikikojol ri tata'al, richin niya'ox ruq'ij. Roma ja ri Jehová rajaw ri ruch'okolibal ri ruwach'ulew y pa ruwi' ri' xuch'okoba-wi ri ruwach'ulew.

⁹Rija' nuchajij ri rubinibal ri rukuquban ruk'u'x rik'in, y jak'a ri e itzel taq winaqi' kan xkek'is pa q'equ'm. Y man jun xtich'akon, wi ja ri ruchuq'a' rija' xtukusaj.

¹⁰Ri Jehová xkeruk'is ri etzelanel richin, kan xtuteq-pe koqolajay pa kiwi'. Ja ri Jehová xtiq'aton-tzij pa ruwi' chijun ruwach'ulew y xtuya' uchuq'a' pa ruq'a' ri rey ri rucha'on y xtinimirisex ri ruq'ij, xcha'.

¹¹K'ari' ri Ana y ri Elcaná xetzolin-el pa kachoch k'a pa Ramá. Y ri ak'ual xk'oje' kan pa ruq'a' ri sacerdote Elí richin nusamajij ri Jehová.

¹²Jak'a ri Hofní y ri Finees, kan e itzel taq achi'a', y man nikiya' ta rejqalen ri Jehová y roma ri' man xeniman ta chire.

¹³Rije' chuqa' nikiben chi man jun rejqalen ri ruchojmilal ri k'o chi nikitaqej ri e sacerdote. Toq ri winaqi' nikisuj ri sipanik y toq niroqo ri q'utun, jari' toq ri Hofní y ri Finees nikiteq-el jun kisamajel rik'in jun nim chapbel-ti'ij ri k'o oxi' rutza'n richin nuju-qa y nujik'-el ri ti'ij ri janipe' nrelesaj-pe ri chapbel ri'. Y jari' nuya' chike rije'. Keri' nikiben rik'in ronojel ri sipanik kichin ri winaqi' ri nikik'uaj pa rachoch ri Dios, ri k'o chiri' pa Siló.

¹⁵Y pa ruwi' ronojel ri nikiben, chuqa' yekelesaj-pe ti'ij ri man jani telesex kan ri q'en chirij richin nisuj chuwech ri Jehová. Y keri', napon k'a ri kisamajel y nubij chire ri rajaw ri chikop: Taya-pe re ti'ij chuwe, richin ninbenbana' ri kirayibel ri sacerdote, roma rije' man niqa' ta chikiwech ri ti'ij roqowirisan chik. Xa kan k'a rex na ri nikajo' richin nikisa', nicha' ri samajel.

¹⁶Y wi ri wineq ri' nubij chi nabey k'o chi nik'at ri ruq'anal ri ti'ij pa ruwi' ri porobel y k'ari' nuk'uaj-el xa janipe' ri nrajo', jari' toq ri samajel nubij: K'o chi naya-el wakami yan, roma wi rat man xtaya' ta el, yin xtinwelesaj-el chawech, nicha' ri samajel.

¹⁷Roma ri' ri Hofní y ri Finees kan janila nim ri kimak chuwech ri Jehová, roma man jun rejqalen nikiben chire ri sipanik ri niya'ox chire ri Dios.

¹⁸Ri ti ala' Samuel nuben k'a rusamaj ri Jehová y rukusan jun tzieq banon rik'in lino, retal ri rusamaj.

¹⁹Y ronojel k'a juna', ri rute' nubanala' k'a jun nim raqen rutziaq y nuk'uaj-el toq yebe junan rik'in ri rachijil richin nibekisuju' sipanik chuwech ri Jehová, ri achi'el kibanon ronojel juna'.

²⁰Y ri sacerdote Elí xuya' ruq'a' pa kiwi' ri Ana y ri Elcaná y xubij: Ja ri Jehová xtuya' más awalk'ual rik'in re ixoq re', pa ruk'exel ri jun ri xiya-pe pa rachoch rija', xcha'. Y k'ari' rije' xetzolin-el pa kachoch.

²¹Y ri Jehová xuya' k'a q'ij chi ri Ana xek'oje' chik más ral y roma ri' xyawej chik y xek'oje' chik e oxi' ral alaboni' y e ka'i' xtani' y ri ti Samuel ruchapon ruk'iyinen pa rusamaj ri Jehová.

²²Jak'a ri Elí janila ri'j chik y nrak'axaj k'a ronojel ri itzel ri yekibanala' ri ruk'ajol kik'in ri kiwinaq. Chuqa' yek'oje' kik'in ri ixoqi' ri yesamej chiri' chuchi' ri rachoch ri Dios.

²³K'ari' ri Elí xubij k'a chike ri ruk'ajol, ¿achike roma ye'iben re itzel taq banobel re'? Roma xya'ox rutzijol chuwe chi ri tinamit yexebeloj chiwij roma ri ye'ibanala'.

²⁴Walk'ual, man tiben keri' roma xa man utz ta ri rutzijol ri eleneq chiwij ri ninwak'axaj yin, roma niben chire chi yemakun ri rutinamit ri Jehová.

²⁵Titz'eta' na pe, wi jun wineq nimakun chuwech jun chik wineq, ek'o k'a yeq'aton-tzij pa ruwi', jak'a ri jun wineq nimakun chuwech ri Jehová ¿Achike k'a xtito'on richin?, xubij ri Elí. Jak'a rije' man xeniman ta chire ri kitata', roma ri Jehová Dios ruch'obon chik richin nrelesaj-el kik'aslen.

²⁶Jak'a ri ti ala' Samuel ruchapon nik'iy y ri Dios kan janila qajineq chuwech, y keri' chuqa' ri winaqi'.

²⁷Chirij re' ri Dios xuteq jun q'alajirisey ruch'abel rik'in ri Elí, richin xubij chire: Toq ri iwati't-imama' e ximil pa samaj chiri' pan Egipto, yin xinq'alajirisaj-wi' chikiwech.

²⁸Chikikojol k'a konojel ri tzobaj richin ri Israel, yin xixincha' rix richin xixok nu-sacerdote richin nisuj kamelabel pa ruwi' porobel y niporoj pom chinuwech y richin nikusaj ri tzieq banon rik'in lino, retal ri isamaj. Y xinya' q'ij chike ri aj pa kachoch ri iwati't-imama' richin nikik'en kan juba' chire ronojel sipanik ri nikisuj ri nutinamit.

²⁹¿Achike k'a roma xiben chire chi maneq rejqalen ri kamelabel y ri sipanik? Y chuqa' aya'on más kejqalen ri ak'ajol chinuwech yin. E tiojirineq janila roma kan nikik'en kan ri k'o más rejqalen chire ri sipanik ri kichin ri nuwinaq.

³⁰Roma ri', yin Jehová ri i-Dios ninbij chi stape' yin xibin chi ri aj pan awachoch y ri aj pa rachoch ri atata' ye'ok nu-sacerdote richin q'asen, jak'a re wakami ninbij chi man jun bey chik xtinben kere'. Wakami k'a, ri xtuya' nuq'ij xtinya' ruq'ij, y ri xkinketzelaj, kan xtinben chike chi man jun kejqalen. Ja yin Jehová ri yibin.

³¹Y napon yan k'a ri q'ij richin xkatink'is y chuqa' xkenk'is chijun ri e rijatzul kan ri atata'. Ni jun chike ri iwijatzul ri xtirijix ta el.

³²Xtich'upun k'a ak'u'x y kan xtiq'axon k'a awánima. Yin kan ja ri utz ri xtinben kik'in ri tinamit Israel, jak'a chupan ri awachoch man jun ri xtirijix ta el.

³³Wi xtinya' ta kan jujun chike ri awijatzul richin yinkisamajij, xaxe richin xtikitej poqon. Jak'a konojel ri aj pan awachoch xkeken toq k'a man jani ke'ok-q'anej achi'a'.

³⁴Y k'o k'a jun q'ij xtatz'et ri nima'q taq nubanobal richin retal chi ri Hofní y ri Finees xkeken junan pa jun q'ij.

³⁵K'ari' yin xtincha' jun sacerdote ri kan nuben ri ninbij chire y nuben ri ninwajo' yin. Xkenyek-q'anej ri rijatzul rija' richin q'asen, y xkesamej k'a junan rik'in ri rijatzul ri rey ri nucha'on yin.

³⁶Ri aj pan awachoch ri janipe' xkek'oje' kan, rije' xkebexuke' chuwech ri sacerdote richin chi xtikil juba' kiméro o jun ti ch'ap kiway. Xtikik'utuj utzil chire richin tuya' q'ij chike richin nuya' ta jun kisamaj chikikojol ri sacerdote richin keri' nikich'ek juba' kiway, xcha' ri Jehová.