Read Kaqchikel 1 Sam 21 Bible Online

1 Sam 21 - Kaqchikel bible

1 Sam 21

¹Toq xk'uluwachitej yan ronojel re', ri David xberewaj-ri' pa tinamit rubini'an Nob rik'in ri sacerdote Ahimélec. Y ri Ahimélec kan janila k'a xuxibij-qa-ri' y xubij chire. ¿Achike roma ayon at peteneq y kan man jun peteneq chawij?, xcha' chire.

²K'ari' ri David xubij-apo chire: Ri rey ruchilaben-pe jun taqikil, y xubij-pe chuwe chi man jun tetaman chirij re taqikil re'. Y yin xinbij chike ri aj-labal ri e peteneq chuwij, chi kinkoyobej kan ke taq ri'.

³¿Wakami achike ta k'o awik'in richin nitij? ¿Maneq kaxlan-wey awik'in? Tabana' utzil taya' wo'o' chuwe o xabachike nawil-pe, xcha' ri David.

⁴K'ari' ri sacerdote xubij chire ri David: Maneq relik kaxlan-wey wik'in, xaxe kaxlan-wey ri sujun chik chuwech ri Jehová k'o wik'in. Xtinya' k'a chawe wi ri achi'a' re e peteneq chawij kan e ch'ajch'oj, xa rik'in man ta e warneq kik'in ri kixjayilal, xcha'.

⁵K'ari' ri David xubij chire ri sacerdote: Roj toq yojel-el pa taq oyowal, ri qixjayilal ek'o kan nej chiqe roj. Y stape' xa jun relik taqikil, roma ri' ri achi'a' kan e ch'ajch'oj-wi-pe, k'a ta la' chik re wakami kan nibeqabana' jun taqikil ri kan k'o janila rejqalen, xcha'.

⁶Chirij re', ri sacerdote xujech-apo ri kaxlan-wey chire ri David, roma man jun chik kaxlan-wey k'o ri q'ij ri'. Xa kan xaxe ri kaxlan-wey ri sujun chik, y elesan chik chiri' pa ruk'ojelibal, richin niya'ox kan meq'en pa ruk'exel.

⁷Y chupan k'a ri q'ij ri', jun chike ri rusamajel ri rey Saúl rubini'an Doeg aj-Edom k'o chiri'. Y ja rija' ri k'o más rejqalen pa kiwi' ri e ruyuq'unela' ri Saúl.

⁸Chuqa' ri David xubij-apo chire ri Ahimélec. ¿Maneq kami jun kum o jun espada awik'in richin naya' chuwe? Roma yin man xink'en ta pe ri nu-espada, roma kan anineq xiruteq-pe ri rey; roma ri' man jun nukamisabal xink'en-pe, xcha' ri David.

⁹Y ri Ahimélec xubij: Wawe' xaxe k'o kan ri ru-espada ri ánima Goliat ri aj-Filistea, ri achin ri xach'ek rat chiri' pa taq'aj richin Elá. Ri espada ri' bolqotin kan chupan jun tzieq, ri k'o kan chirij ri efod. Wi nawajo' ri', tak'uaj-el, roma wawe' man jun chik k'o, xaxe ri', xcha' rija'. Y ri David xubij chi tuya-pe, roma jari' ri más utz ri k'o.

¹⁰Y chupan k'a ri q'ij ri', ri David xanimej-el chuwech ri Saúl y xbe k'a rik'in ri rey Áquis pa tinamit Gat.

¹¹Y ri e aj-raqen e richin ri rey Áquis, xkibij chire: Re' jare' ri David ri achi'el jun rey richin ri ruwach'ulew Israel. Jala' ri nikiya' ruq'ij ri ixoqi' toq yetzopilan y nikibixaj: Ri Saúl xaxe e 1,000 xerukamisaj, jak'a ri David e 10,000, xecha' ri aj-raqen.

¹²Y ri David toq xrak'axaj re' kan xk'oje' kan pa ránima re ch'abel re', y janila xuk'en rukiy ri rey Áquis.

¹³K'ari' ri David xujel rubanik chikiwech rije', xuben achi'el ch'u'j chikikojol, nitz'iban kan chirij taq kichi' jay, y ri ruk'axej nibiyin-qa chirij ri rusumal-ruchi'.

¹⁴K'ari' ri rey Áquis xubij chike ri e aj-raqen: Rix xitz'et re achin re' xa ch'u'j. ¿Achike roma xik'en-pe wik'in yin?

¹⁵¿E maneq k'a ch'uja' wawe' richin rix xik'en-pe jun pa wachoch, richin nuben ri nrajo' rija' chinuwech yin?, xcha' ri rey.