Read Kaqchikel 1 Sam 22 Bible Online

1 Sam 22 - Kaqchikel bible

1 Sam 22

¹Y chirij re', ri David xel k'a el pa Gat richin xrewaj-el-ri' chupan ri jul chiri' pa Adulam. Y toq ri rach'alal y konojel ri ek'o pa rachoch ri rutata' xketamaj akuchi k'o-wi chuqa' rije' xbekewaj-ki' rik'in.

²Chuqa' xkimol-ki' rik'in konojel ri e poqonatajineq, konojel ri k'o kik'as, konojel ri man nikikot ta ri kánima. Y ja ri David xok-el aj-raqen pa kiwi' rije' y xerachibilaj-el más juba' e 400 achi'a'.

³Y chiri' pa ruwach'ulew Judá xel-wi-el, y xbe k'a pa tinamit Mispá pa ruwach'ulew Moab, y xubij chire ri rey: Yin nink'utuj utzil chawe richin yek'oje' ta kan juba' ri nte-nata' awik'in, k'a ja toq xtinwetamaj na achike xtuben ri Dios wik'in, xcha'.

⁴K'ari' xeberuxqanej kan rik'in ri rey richin Moab, y chiri' xek'oje-wi, rokik ri David xrewaj-el-ri'.

⁵Y xk'oje' k'a jun q'alajirisey ruch'abel ri Dios rubini'an Gad, y xubij chire ri David: Man utz ta awewan-awi' wawe'. Katel-el y kabiyin chik pa ruwach'ulew Judá, xcha'. K'ari' ri David xbe y xapon k'a pa k'echelaj ri k'o pan Héret.

⁶K'o k'a jun q'ij toq ri Saúl k'o chupan ri tinamit Guibeá, tz'uyul chuxe' jun che' ri nibix tamarisco chire, ri k'o pa ruwi' juyu'. Rija' ruk'uan ri rukum, y konojel ri aj-labal ek'o-apo rik'in. Jari' toq rija' xunabej chi ri David y konojel ri aj-labal xe'ilitej.

⁷K'ari' ri Saúl xubij chike ri aj-labal ri kisutin-apo-rij: Tiwak'axaj k'a re wakami rix nuwinaq ri oj rijatzul kan ri Benjamín. ¿Ninimaj kami rix chi ri ruk'ajol ri Isaí, nuya' iwulew ri tikon chik uva chuwech, o yixruya' aj-raqen pa kiwi' e 1,000, o aj-raqen pa kiwi' ch'aqa' chik tzobaj?

⁸Roma chi'iwonojel rix xa xjunamatej-iwech rik'in, roma man xibij ta chuwe chi ri nuk'ajol Jonatán xa kibanon jun tununri'il rik'in rija'. Kan man jun xjoyowan ta nuwech; chuqa' man jun biyon ta chuwe chi ri nuk'ajol xa itzel ajk'a nuna' chuwe. Xuben chire ri nuto'onel richin yiruq'elebej y wakami ruya'on pikbel pa nubey, xcha' ri Saúl.

⁹Jari' toq xch'on-apo ri Doeg aj-Edom ri rusamajel ri Saúl y xubij: Yin xintz'et kan ri ruk'ajol ri Isaí chiri' pa tinamit Nob rik'in ri sacerdote Ahimélec ruk'ajol ri Ahitub.

¹⁰Y ri Ahimélec xuk'ulubej k'a ri Jehová pa ruwi' ri David y chuqa' xuya-el ruway y ri ru-espada ri Goliat chire, xcha' ri Doeg chire ri Saúl.

¹¹K'ari' ri rey Saúl xuteq k'a royoxik ri sacerdote Ahimélec. Chuqa' xuteq koyoxik konojel ri e sacerdote ri ek'o pa Nob. Y toq konojel ek'o chik rik'in,

¹²jari' toq xubij chire ri Ahimélec: Wakami k'a tawak'axaj rat rijatzul kan ri Ahitub, xcha'. Y ri Ahimélec xubij chire: Jare' ink'o wawe' wajaw, tabij ri achike nubij ri awánima, xcha'.

¹³Jari' toq ri Saúl xuk'utuj chire: ¿Achike roma xjunamatej-awech rik'in ri ruk'ajol ri Isaí richin chi xixyakatej chuwij? Roma rat xaya-el ri kaxlan-wey y ri ru-espada ri Goliat chire, y pa ruwi' ri' xak'ulubej ri Dios pa ruwi' rija' richin chi in ruq'eleben. Y nuyala' pikbel pa nubey achi'el ri nuben wakami, xcha' ri Saúl.

¹⁴Chirij re' ri Ahimélec xubij chire ri rey: ¿Achike k'a chike ri asamajela', kan nuben ri nubij, achi'el nuben ri David y chuqa' rija' kan aji', wajaw yin, y chuqa' aj-raqen pa kiwi' ri ye'ilin awichin, y kan janila ya'on ruq'ij chiri' pan awachoch?

¹⁵Man k'a jun bey ta re' ri nink'ulubej ri Dios pa ruwi' rija', roma xa kan keri' nubanon-pe. Tabana' jun utzil rat nu-rey, man tach'ob itzel chuwij yin, ni ta chikij ri aj pa rachoch kan ri nata'. Roma yin man jun wetaman chirij ronojel re', xcha' ri Ahimélec.

¹⁶Jari' toq ri rey xubij: Wakami k'a, kan xkaken rat y konojel ri aj pa rachoch kan ri atata', xcha'.

¹⁷Jari' toq ri Saúl xubij chike ri aj-labal ri kimolon-apo-ki' chunaqaj rija': Kixanpe, ke'ikamisaj kan konojel ri sacerdote. Roma rije' xa xjunamatej-kiwech rik'in ri David. Rije' xketamaj chi animajineq chinuwech, y man jun xkibij chuwe, xcha'. Jak'a ri aj-labal, man xkajo' ta xkijeluj kiq'a' chikij richin xekikamisaj, roma kan e ru-sacerdote ri Jehová.

¹⁸K'ari' ri rey xubij chire ri Doeg: ¡Ke'akamisaj rat!, xcha'. Y rija' xerukamisaj e jumuch' wo'o' sacerdote.

¹⁹Chuqa' xbe pa Nob, ri kitinamit ri sacerdote, y xerukamisaj kan konojel ri winaqi' chi espada; chi achi'a', chi ixoqi', chi ak'uala', chuqa' ri bóyix, ri wákix, ri bur y ri taq karne'l.

²⁰Y k'o k'a jun chike ri ruk'ajol ri Ahimélec rubini'an Abiatar. Rija' xkolotej kan chupan ri kamik ri', xanimej y xbe k'a akuchi k'o-wi ri David.

²¹Y ja ri Abiatar xya'on rutzijol chire ri David chi ri rey Saúl xuteq kikamisaxik ri e sacerdote.

²²K'ari' ri David xubij chire: Xinch'ob na wi keri' toq ink'o chiri', chi ri Doeg xtiberubij chire ri Saúl. Numak yin keri' xban chike konojel ri aj pa rachoch ri atata'.

²³Wakami k'a kak'oje' kan wik'in yin, y man taxibij-awi'. Ri achike najowan nikamisan awichin rat, chuqa' nrajo' yirukamisaj yin. Kak'oje' k'a wawe' wik'in yin y man jun xtak'uluwachij, xcha' ri David chire.