Read Kaqchikel 1 Sam 23 Bible Online

1 Sam 23 - Kaqchikel bible

1 Sam 23

¹K'o k'a jun q'ij ri aj-Filistea xbekibana' oyowal kik'in ri winaqi' ri ek'o pa tinamit Queilá, y xkeleq'aj-el ri trigo ri k'a juba' tich'ay kan. Y re' xapon rutzijol rik'in ri David.

²K'ari' rija' xuk'ulubej ri Jehová richin nretamaj wi nibe pan oyowal kik'in ri aj-Filistea, o ni. Y ri Jehová xubij chire chi tibiyin y tuberukolo' ri tinamit ri'.

³Jak'a ri achi'a' ri ek'o rik'in ri David xkibij chire: Man natz'et ta chi ri wawe' pa Judá roj janila qaxibin-qi' y k'a ta la' chik xqojbe pan oyowal chiri' pa Queilá kik'in ri aj-labal aj-Filistea, xecha' rije'.

⁴Y k'ari' ri David xuk'ulubej chik jun bey ri Jehová ri achike k'atzinel chi nuben, y ri Jehová xubij chire: Kixyakatej y kixbiyin-qa pa tinamit Queilá, roma yin kan xkenjech pan iq'a' ri aj-Filistea, xcha' ri Jehová.

⁵Keri' ri David y ri aj-labal xebe k'a pa Queilá richin xbekibana' oyowal kik'in ri aj-Filistea. Y kan xech'akon k'a chikij, y xekik'uala' k'a el ri kawej. Y keri' ri David xerukol k'a ri winaqi' aj-Queilá.

⁶Ri Abiatar xberila' ri David pa Queilá, ruk'uan-el jun tzieq richin sacerdote richin nuk'ulubej ri Jehová.

⁷Y xya'ox k'a rutzijol chire ri Saúl chi ri David k'o pa Queilá. K'ari' ri Saúl xubij: Ja ri Dios xjachon pa nuq'a', roma wakami k'o chupan jun tinamit ri yojtikir niqatz'apej ruchi', xcha' ri Saúl.

⁸Jari' toq rija' xerumol konojel ri aj-labal richin nibekisutij-rij ri tinamit ri', roma chiri' k'o-wi ri David y ri ruwinaq.

⁹Jak'a ri David xa xunabej yan y xq'ax chuwech chi ri Saúl k'o niberubana' chire, y xubij chire ri Abiatar chi tuk'ama-pe ri rutziaq richin sacerdote.

¹⁰Y ri David xubij: Jehová Dios qichin roj ri oj aj-Israel, yin ri in asamajel xinwak'axaj chi ri Saúl nrajo' nipe wawe' pa Queilá, richin noruk'isa' re tinamit re' woma yin.

¹¹Wakami k'a Jehová ri at qa-Dios; nink'utuj utzil chawe chi tabij chuwe, wi ri winaqi' e richin ri tinamit Queilá xkinkijech el pa ruq'a' ri Saúl. ¿Nipe kami achi'el ri wak'axan yin ri asamajel?, xcha'. Y ri Jehová xubij chi xtipe.

¹²K'ari' ri David xuk'utuj chik jun bey: ¿Ri winaqi' ek'o wawe' pa Queilá, xqojkijech kami el pa ruq'a' ri Saúl?, xcha'. Y ri Jehová xubij chi xkejach-el.

¹³K'ari' ri David xbe y xeruk'uaj-el ri e 600 achi'a', y xe'el-el chiri' pa Queilá. Y xbekikanola' akuchi xebek'oje-wi. Jari' toq xbeya'ox chik rutzijol chire ri Saúl chi ri David xel yan el chiri', y roma ri' ri Saúl man xbe ta chik pa Queilá.

¹⁴Y ri David xebek'oje' k'a chuwi' taq juyu' richin xbekewaj-ki' pa taq jul chiri' pa tz'iran ruwach'ulew richin Zif. Y ri Saúl kan ronojel k'a q'ij xerukanoj, jak'a ri Dios man xeruk'ut ta chuwech.

¹⁵K'ari' ri David xebek'oje' chik pa k'echelaj, ri k'o pa tz'iran ruwach'ulew richin Zif, roma xretamaj chi yekanox roma ri Saúl richin yerukamisaj.

¹⁶K'o k'a jun q'ij ri Jonatán xbe rik'in ri David k'a chiri' pa k'echelaj, richin xberuya' kan ruchuq'a' pa rubi' ri Dios.

¹⁷Y kere' xubij kan chire: Man taxibij-awi', ri nata' man xtitikir ta xkarukamisaj. Jak'a rat xkaq'aton kan tzij pa ruwi' ri qaruwach'ulew Israel, y yin ri ruka'n chawij rat. Ri Saúl ri nata' chuqa' kan keri' retaman, xcha' ri Jonatán.

¹⁸Chi e ka'i' xkiben jun jikibel-tzij chuwech ri Jehová, y ri Jonatán xtzolej chirachoch. Jak'a ri David xk'oje' kan chiri' pa k'echelaj.

¹⁹K'ari' ri winaqi' richin Zif xebe rik'in ri Saúl pa Guibeá richin xbekibij kan chire: Ri David rewan-ri' re wawe' pa k'echelaj, pa taq jul chiri' chuwa taq juyu', ri richin Haquilá, pa xokon chire ri tz'iran ruwach'ulew.

²⁰Wakami k'a rey, toq rat xtawajo', utz yape y kan ja roj xqojachon-el pan aq'a' ri David, xecha' chire ri rey.

²¹K'ari' ri Saúl xubij chike: Ja ri Jehová xtiya'on urtisanik pan iwi', roma janila nipoqonaj nuwech yin.

²²Wakami k'a kixbiyin y titz'eta' jebel akuchi rewan-wi-ri', y achike tz'eteyon chiri', roma yin wak'axan chi rija' janila nowineq.

²³Kan tibetz'eta' k'a jebel ri akuchi k'o-wi, y k'ari' xtik'en-pe rutzijol chuwe. Y yin xkibe chuqa' chiwij richin xtibeqanik'oj. Wi kan chiri' k'o-wi, yin kan xtinkururej chikikojol konojel ri winaqi' aj-Judá, xcha' ri Saúl chike.

²⁴K'ari' ri aj-Zif, xkitaluj-el-ki' y xenabeyej-el chuwech ri Saúl richin xebe pa kitinamit. Jak'a ri David y ri aj-labal xa ek'o chik pa tz'iran ruwach'ulew richin Maón pa xokon chire ri Arabá.

²⁵Y xebe k'a ri Saúl richin xbekikanoj ri David, y ri David xa xya'ox yan rutzijol chire chi nikanox. Roma ri' rija' xqaqa-qa kojol nima'q taq abej richin ri tz'iran ruwach'ulew Maón. Y toq ri Saúl xrak'axaj re' kan xutzeqelibej k'a el k'a pa Maón.

²⁶Ri Saúl beneq juk'an chire ri ruchi' ri juyu', y ri David y ri achi'a' e beneq ri juk'an chik chire ri juyu'. Anineq k'a xebe richin xe'animej-el chuwech ri Saúl, jak'a ri achi'a' e richin ri Saúl kan kisutin chik kij richin yekichop yan.

²⁷Jari' toq xapon jun ya'ol rutzijol rik'in ri Saúl richin xberubij chike: Chi'anin ri' y kixtzolej-pe, roma ri aj-Filistea xe'ok-apo chupan ri qaruwach'ulew, xcha'.

²⁸K'ari' ri Saúl man xutzeqelibej ta chik ri David. Xtzolej k'a richin xberubana' oyowal kik'in ri aj-Filistea. Xa roma ri' xkibij Sela-hamaj-lecot*f5* chire, ri akuchi xkijel-wi kibey.

²⁹K'ari' ri David xel k'a el chiri' y xberewaj-ri' chiri' pa tinamit En-gadi.