Read Kaqchikel 1 Sam 4 Bible Online

1 Sam 4 - Kaqchikel bible

1 Sam 4

¹Y k'o k'a jun q'ij ri aj-Filistea xbekibana' oyowal kik'in ri israelita y xkimol-ki' chunaqaj ri tinamit Afec. Jak'a ri israelita kimolon-ki' pa tinamit Eben-ézer.

²Y ri aj-Filistea xekich'ek ri aj-Israel y xeken e 4,000 achi'a'.

³Toq xetzolej k'a el ri israelita ri akuchi ek'o-wi-qa, jari' toq ri rijita'q taq achi'a' ri k'o kiq'ij xkibij: ¿Achike roma ri Jehová xuya' q'ij chike ri aj-Filistea richin xojkich'ek? Wakami tibeqak'ama' ri káxa richin ri rujikibel-tzij ri Jehová ri k'o pa Siló, richin keri' nibe pa qanik'ajal roj, y kan xqojrukol chikiwech ri etzelanel qichin, xecha'.

⁴Y rije' xekiteq k'a el jun tzobaj achi'a' pa Siló richin xbekik'ama-pe ri káxa ri' ri akuchi niq'aton-wi-tzij ri Jehová k'iytisanel richin ronojel, ri k'o chiri' chikikojol ri ka'i' querubín. Y ri Hofní y ri Finees, ri e ka'i' ruk'ajol ri Elí, chuqa' xebe chirij ri káxa.

⁵Toq xetzolin-pe ri akuchi ek'o-wi-qa, ri aj-labal kik'uan chik el ri káxa, jari' toq konojel ri achi'a' xesik'in rik'in janila kikoten y kan xsilon ri ruwach'ulew.

⁶Y toq ri aj-Filistea xkak'axaj chi ri achi'a' yesik'in rik'in janila kikoten, jari' toq xkik'utula-qa chikiwech achike roma yesik'in rije'. Toq xketamaj-qa chi ri káxa ri richin ri jikibel-tzij k'o chiri' ri akuchi ek'o-wi-qa ri israelita,

⁷rije' xkixibij-ki' y xkibij: Ri ki-Dios ri israelita xoqaqa chikikojol. Wakami toq'ex qawech roj, roma man jun bey tibanatej kere'.

⁸Toq'ex qawech roj, roma man jun xqojkolon pa kiq'a' ri ki-Dios rije'. Roma k'o ronojel uchuq'a' kik'in y ja rije' ri xeya'on jalajoj ruwech nima'q taq banobel pa kiwi' ri aj-Egipto toq k'a ek'o pa tz'iran ruwach'ulew.

⁹Y kan tiqatija' k'a qaq'ij roj richin man yojch'akatej pa kiq'a' rije', richin man yojxime' ta pa samaj kik'in, achi'el toq xexime' rije' qik'in roj. Roma ri' kow k'a qojk'oje' richin niqaben oyowal kik'in, xecha'.

¹⁰Xkiben k'a oyowal ri aj-Filistea y kan xekich'ek k'a ri israelita. Toq xech'akatej, chikijujunal xe'animej y xebe pa taq kachoch. Kan janila e k'iy ri aj-labal ri xeken, ri kajlabal e 30,000.

¹¹Y ri káxa ri richin ri jikibel-tzij xkik'uaj kan ri aj-Filistea, y xekikamisaj kan ri Hofní y ri Finees ri e ka'i' ruk'ajol ri Elí.

¹²K'o k'a jun achin rijatzul kan ri Benjamín ri xtikir xanimej-el pan oyowal y xbe pa Siló y rutzeron-el ri rutziaq chirij y ruya'on-el poqolaj pa rujolon richin chi xuk'ut chi janila nibison.

¹³Jak'a ri Elí kan tz'uyul chuchi' ri bey royoben richin chi k'o ta jun niya'on rutzijol chire y ri ránima janila nibaybot roma ri káxa. Y Jari' toq xapon pa tinamit ri achin ri animajineq-el pan oyowal y xuya' rutzijol chike konojel ri winaqi' y rije' xesik'in.

¹⁴Toq xrak'axaj ri Elí chi janila raqoj-chi'ij najin, xuk'utuj-qa achike roma re jun raqoj-chi'ij re'. Jari' toq ri ya'ol rutzijol xapon junanin rik'in ri Elí richin xberuya' rutzijol chire.

¹⁵Y ri Elí k'o chik k'a jumuch' waqxaqlajuj rujuna', y chuqa' moy chik.

¹⁶Y ri achin xubij k'a chire ri Elí chi rija' peteneq pan oyowal, y wakami xtikir xanimej-pe. Y ri Elí xuk'utuj chire chi tuq'alajirisaj ri achike k'a xk'uluwachitej.

¹⁷Y ri uk'uayon rutzijol xubij: Roj israelita xojanimej chikiwech ri aj-Filistea y janila e k'iy qawinaq xeken. Y chuqa' ri e ka'i' ak'ajol xeken y ri káxa richin ri jikibel-tzij xkeleq'aj kan ri aj-Filistea, xcha'.

¹⁸Y toq ri Elí xrak'axaj chi ri káxa xeleq'ex kan, jari' toq xjaq'ajo-el chirij, xq'aj k'a ri ruqul y xken k'a qa chiri', roma rija' yalan ralal y ri'j chik. Chupan ri q'ij ri' jari' toq ri Samuel xq'aton-tzij pa ruwi' ri Israel kawineq juna'.

¹⁹Y ri rixjayil kan ri Finees, royoben k'a richin nibe'alex jun ti ral. Y napon yan ri q'ij richin alanik toq xrak'axaj chi ri káxa xeleq'ex kan, xken ri rachijil y chuqa' ri ralnan. Roma ri' kan xpe ri ruq'axo'n y xalex chi'anin ri ak'ual.

²⁰Y ri ixoqi' ri ek'o rik'in, toq xkitz'et chi niken yan ri ixoq, xkibij chire: Man taxibij-awi' roma xalex jun ti awal ala', xecha'. Jak'a rija' man nuna' ta chik y roma ri' man jun xubij chike.

²¹Y ri te'ej xuya' rubi' ri ti ral y xubij Icabod chire,*f3* roma xeleq'ex kan ri káxa richin ri jikibel-tzij, chuqa' roma xken ri ralnan y ri rachijil.

²²Y ri ixoq ri' xubij: Xk'is k'a ri ruwaq'ijaj richin Israel roma xeleq'ex kan ri káxa richin ri rujikibel-tzij ri Dios, xcha'.