Read Kaqchikel 1 Sam 6 Bible Online

1 Sam 6 - Kaqchikel bible

1 Sam 6

¹Ri káxa richin ri jikibel-tzij xk'oje' k'a el wuqu' ik' pa kiruwach'ulew ri aj-Filistea.

²K'ari' rije' xekoyoj ri e ki-sacerdote y ri nikibananej chi ketaman ri peteneq chikiwech y xkik'utuj k'a chike ri achike nikiben rik'in ri káxa. Chuqa' xkik'utuj ri achike ruk'amon nikiben richin nibekitzolij kan ri akuchi kik'amon-wi-pe.

³Y rije' xkibij: Wi niteq-el ri káxa richin ri rujikibel-tzij ri Dios kichin ri aj-Israel, k'o chi niya' jun sipanik chire richin nitoj ri kuyubel-mak chire ri Dios. K'ari' xkixbek'achoj y xtibeq'ax chiwech achike roma ya'on re jun q'axo'n re' pan iwi', xecha'.

⁴Y ri aj-Filistea xkik'utuj achike k'a ri nik'atzin richin nikuyutej kimak. Y ri e sacerdote y ri ketaman ri peteneq chikiwech xkibij: Tibana' wo'o' ruwachibel ri sipojik rik'in q'anapueq, achi'el ri kajlabal ri e tata'al y tibana' wo'o' ruwachibel ch'oy achi'el ri kajlabal ri e wo'o' qatinamit ri xya'ox nima-ruk'ayewal pa qawi', roma chi wo'o' tinamit oj poqonatajineq.

⁵Ke'ibana' k'a ri wachibel ri' roma ja re ch'oy re' ri yek'ison yan re qaruwach'ulew. Y rik'in re' kan tiya' k'a ruq'ij ri ki-Dios ri aj-Israel. Rik'in juba' xtuben richin xtrelesaj-el ri q'axo'n ri k'o qik'in y ri k'o pa kiwi' ri qa-dios y pa ruwi' ri qaruwach'ulew.

⁶¿Achike k'a roma ikowirisan ri iwánima, achi'el xkiben ri aj-Egipto y chuqa' ri ki-rey toq xukowirisaj-ri'? Roma k'a ja toq ri ki-Dios ri israelita xuya' na jalajoj ruwech ruk'ayewal pa kiwi', k'ari' toq xuya-el q'ij chike richin xe'el-el chiri'.

⁷Wakami k'a kan tibana' jun carruaje k'ak'a' y tikanoj e ka'i' ixoqi' taq wákix ri ek'o alaji' kik'in y ri man jun bey e ukusan ta richin jun samaj. Jari' xke'uk'uan-el ri carruaje y man tiya' q'ij chike chi ri nima-alaji' taq wákix yebe chikij. Xa kan kek'oje' kan pa coral.

⁸K'ari' tiya-el ri káxa chupan ri carruaje. Chuqa' tiya-el jun chik káxa chupan y niya-el chupan ri wachibel ri e banon rik'in q'anapueq richin niqasuj ri sipanik richin niqatoj ri itzel qabanobal chuwech ri ki-Dios ri aj-Israel. Y k'ari' niya-el q'ij chike ri wákix richin yebe kiyon.

⁹Titz'eta-el jebel wi choj xkebe pa jotol k'a pa Bet-semes, kan ja k'a ri Dios ri' ri yoyon re jun nimalej q'axo'n re' chiqe y wi man keri' ta, xtiqetamaj chi re jun q'axo'n re' xa choj keri' k'o pa qawi' y man ja ta ri Dios ri banayon, xecha'.

¹⁰Ri achi'a' kan keri' k'a xkiben. Xekikanoj k'a ka'i' ixoqi' taq wákix ri ek'o alaji' taq wákix kik'in y xekiya-el chuwech ri carruaje y ri alaji' xeya'ox k'a kan pa ki-coral.

¹¹K'ari' xkiya-el ri káxa chupan ri carruaje y chuqa' ri jun chik káxa ri ek'o-el ri wachibel kichin ri ch'oy y ri sipojik ri e kibanon rik'in q'anapueq chupan.

¹²Y ri wákix ri' xebe k'a q'anej choj chupan ri bey ri napon pa Bet-semes. Kan ye'oq' k'a e beneq y kan choj e beneq. Ni man xebe ta pa kijkiq'a' ni pa kajxokon. Y ri e tata'al kichin ri aj-Filistea xekitzeqelibej-el k'a xe'apon na pa ruk'ulba't ri tinamit Bet-semes.

¹³Y ri winaqi' ri aj-Bet-semes yeq'aton trigo pa jun taq'aj. Y toq xetzu'un-q'anej pa jotol, xkitz'et ri káxa richin ri rujikibel-tzij ri Jehová. Y kan janila k'a xekikot toq xkitz'et.

¹⁴Ri wákix xe'apon k'a pa rujuyu' ri jun achin rubini'an Josué ri k'o chiri' pa Bet-semes. Y chiri' xek'oje-wi akuchi k'o-wi jun nimalej abej. Y ek'o k'a achi'a' levita chiri'. Y rije' xkiqasaj k'a ri káxa ri' y chuqa' ri jun chik káxa ri ek'o ri wachibel chupan. Y xekiya-q'anej pa ruwi' ri abej ri'. K'ari' ri achi'a' ri ek'o chiri' xkiben si' chire ri tz'alem richin ri carruaje y xekikamisaj ri wákix richin xekiporoj chuwech ri Jehová.

¹⁶Y ri wo'o' tata'al aj-Filistea xkitz'et kan ronojel re' y kan chupan k'a ri q'ij ri' xetzolin-el pan Ecrón.

¹⁷Ri wo'o' wachibel ri e banon rik'in q'anapueq xkiteq-pe ri aj-Filistea chire ri Jehová richin kuyubel kimak ri wo'o' tinamit: ri Asdod, ri Gaza, ri Ascalón, ri Gat y ri Ecrón.

¹⁸Y ri ch'oy ri xkiben rik'in q'anapueq xekiben achi'el ri kajlabal ri wo'o' tinamit ri' rik'in ri kokoj taq kitinamit. Ri nimalej abej ri achoq pa ruwi' xya'ox-wi ri káxa richin ri rujikibel-tzij ri Jehová, k'o pa Bet-semes pa rujuyu' ri Josué y k'a niq'alajin na k'a chikiwech ri winaqi'.

¹⁹Jak'a ri Dios xuben chike richin xeken e oxk'al lajuj achi'a' ri ek'o chiri' roma xkinik'oj-qa rupan ri káxa richin ri rujikibel-tzij ri Jehová. Y ri winaqi' richin ri tinamit janila xe'oq' roma ri Jehová kan xuya' ruk'ayewal pa kiwi'.

²⁰Y ri aj-Bet-semes xkibij: ¿Achike k'a xtitikir xtipa'e' chuwech ri Jehová ri Loq'olej Dios? ¿Achoq ik'in chik k'a xtibe-wi ri káxa toq xtel-el qik'in roj?, xecha'.

²¹Y xekiteq k'a q'anej achi'a' richin xbekiya' rutzijol chike ri winaqi' aj-Quiriat-jearim y xkibij: Ri aj-Filistea xkitzolij-pe ri káxa. Wakami kixbiyin k'a y tibek'ama', xecha'.